Webber

我團火 甜筒輝

Ads by Google

喺大銀幕上嘅甜筒輝,永遠都係被人蝦、被人玩嘅傻仔角色,但銀幕下嘅佢,其實係一個成熟老練嘅創作人。以前嘅甜筒輝年少氣盛,對睇唔過眼嘅人同事都會拍枱走人。人愈大,甜筒輝脾氣收斂咗好多,但對創作嘅一團火,就愈燒愈旺!可能有讀者問:呢個欄目明明係 webber,點解會有拍電影嘅人上嚟?其實,甜筒輝已帶住佢創作團火,開始拍片擺上 YouTube,做新一代 webber!

 

Webber's profile
YouTube channel: timtonfai
拍片資歷: 1個月
總 hit rate:約 3萬
facebook page:甜筒輝
作品:《食神》、《行運一條龍》、《喜劇之王》
Q:從來都冇拍網上片經驗嘅你,點解會參加一個 YouTube嘅拍片比賽?

呢段就係甜筒輝嘅「拍片處男作」:《跆拳少女打傻賊》。

今年年中,與一個開畫室的朋友閒聊,佢本身有興趣拍片,而畫室又有好多學生同家長有興趣做演員。咁我就諗,其實我做電影同漫畫編劇都好多年,但一直都冇做過網上影像作品,就不如試下拍啦!本身都冇諗住參加,突然有朋友同我講〈香港最強 CREATOR新秀戰 2014〉,無心插柳下就去參賽喇!
Q:第一次拍網上片,遇到嘅難題多唔多?你又希望透過拍片學到啲咩?

甜筒輝喺新片入面演淫「筒」?我接受唔到呀!

一直以嚟我都係做編劇為主,所以拍第一條片嘅時候真係瞎子摸象,包括攝影、同演員溝通、剪接。今次透過同其他 YouTuber合作,各人都憑佢哋專長去擔當不同崗位,我從中學到好多技巧。此外,佢哋好多已經拍咗片一段時間,會 feel到邊類片網民會 buy啲,呢個真係要時間沉澱出嚟,我希望可以盡快學到技巧同 sense。
Q:寫故仔同拍片其實係兩樣唔同崗位、唔同範疇嘅嘢,到底你想做咩多啲?

輝哥自編自導自演,演埋女人都冇所謂。呢團拍片火真係燒到無極限。

其實我本身一直有團火喺心入面,做電影時我除咗做編劇之外都有做副導演。後來機緣巧合下就做咗傳媒,加上曾經去國內工作,團火就慢慢熄咗。直到舊年我個女要返香港讀幼稚園,我就返嚟,當時因為大陸封鎖,我未接觸過 YouTube。到今年年頭因為接咗啲 social media嘅工作,我先開始認識一啲 webber,例如司徒夾帶、伍仔。呢半年我不斷睇好多 YouTube片,個癮就開始嚟。
Q:接觸多咗網絡世界,你覺得你哋嗰代同宜家呢代年青人嘅創意有咩分別?

我最懷念,始終係《喜劇之王》內嘅甜筒輝。

其實無論咩年代,創意都係 the same thing,視乎當時嘅人點去感受生活,去創作佢哋覺得過癮嘅。最大分別只不過媒體唔同咗,以前可能只有電視、電台或者電影,今時今日有 YouTube,可以好容易就俾你寫嘢、拍嘢擺上網發布。據知,周星馳同如花、梁朝偉以前係同學嚟,三個人成日攞住部機周圍拍。自編自導自演,梁朝偉做壞人,周星馳做好人,然後拍低兩個人互打,星爺有可能係第一代 YouTuber!
香港最強 CREATOR新秀戰 2014
網址: http://www.dimbo.tv
YouTube channel: dimbo.tv點播

撰文:陳可兒
攝影:傅新發

    全站熱搜

    tvb4life 發表在 痞客邦 留言(0) 人氣()