這張 Elly的大頭照, Vicki花了七小時才完成,神情動態都生動。

Ads by Google

寵物家
8小時 即學即畫好
為屋企的寵物親手畫一幅畫,是不少人的心願,但很多人無藝術天分。
最近見有寵物油畫班,唔識教到識,由零開始,八小時就能完成畫作。咁神奇?美女導師 Vicki拍心口話「無問題!」小班教學,先學畫花、蘋果,再勾勒貓狗輪廓,直情真嘅狗一樣,似張相。
原來 Vicki教畫寵物,又做寵物布藝用品的背後,除了為理想外,還為了有需要的狗狗籌款。又靚又有善心,撐! 


畫動物靠日光
在英國讀小學已開始學畫畫的 Vicki,得獎無數,後來修讀時裝設計。四年前回港, Vicki一如所有在外國讀 fashion design的學生,發覺在港找不到自己喜歡的工作,打工約九個月就辭職。隨後以自己的專長創業,設計寵物布藝用品,工餘時仍會畫畫,客人看見,就叫她幫忙畫寵物的大頭照。初初 Vicki都會接來畫,見客人將她畫的畫掛滿屋更是滿足。「最近太忙無時間畫,我就同客講,不如我教你畫。好多都答我唔得㗎,連畫筆都未揸過。我話無問題,繪畫唔講天分,講勤力。」學生帶住疑惑的心情執起畫筆,八小時後,果然能捧住親手畫的油畫走,勁滿足!習藝能遇上好導師真難得,不過畫班只在日間開班,不設晚上時段。原來畫寵物一定要用天然光,不然在不同色溫的燈光下,看到的毛髮顏色會不準確,調色時就會出錯,畫出來也不似。

小班教學,最多五個學生,指導更細心。

一屋兩狗兩貓一鸚鵡,不過 Vicki話貓貓暫時未同鸚鵡熟落,怕有意外,遲啲先帶佢兩位見人。

課程共八小時,首一小時會先教你畫花和蘋果,學習如何觀察事物,以筆畫出,還有熟習畫線條和混色技巧。
暫養成癮
坊間有不少教畫寵物的畫班,但少有讓學生帶寵物同來, Vicki卻不怕麻煩,貓狗雀仔都歡迎。「香港少有讓狗狗參與的活動。主人學畫畫,一畫就幾個鐘,倒不如把狗狗帶來,邊玩邊畫。最重要是我也可以玩狗。」如此愛動物,但其實 Vicki從出世開始就對毛髮敏感,不論貓狗,總之污糟一點的毛就會令她氣管收縮要食藥。「媽咪為咗我,逼住將五隻狗送給其他人。不過我實在太愛動物,大學時偷偷養貓,媽咪極度反對,但都無辦法。」 Vicki現在更成為暫養家庭,棉乾絮濕地照顧最纏身的貓狗 BB,要訓練小狗行為,又要每兩小時餵貓貓飲奶, Vicki仍大呼好玩。

兩幅畫都看似完成?右邊一幅已完成,但左邊的還欠點睛,鼻兩旁的鬍鬚和身上的毛髮,還未畫得夠仔細。

客人傳來寵物照片後, Vicki會打印出來,在照片和畫布上劃分數格,讓學生容易照住來畫。

畫筆、畫盤和畫布等, Vicki都會為學生準備好。
自製狗床義賣
當初 Vicki成立工作室,除了賺錢,另一主要原因是為動物籌錢。「每個月捐錢都唔捐得好多,於是諗到車啲狗仔床俾慈善機構義賣,咁先可持續。」密密車, Vicki一年差不多捐出三百張狗床。
Vicki亦會做狗袋、狗樓梯給客人訂購,布料內膽都可選不同質料,如帆布、棉布、棉花、海綿等,有些狗狗愛流口水或尿尿,可選防水布,有些狗狗喜歡軟綿綿的感覺,就可用棉花做內膽。有時客人的要求嚇她一跳,如一張單人床般大的狗床,或者為方便狗狗上落而做幾呎長的斜坡,想不到怎樣做時,就會跟同樣擅長縫紉的媽媽商量。「有次客人的狗狗大髀位置生了個血瘤,為了不讓牠舔傷口,想為牠做條褲。我車好讓牠試著,來來回回改了三四次才完成,但好有滿足感。真係幫到狗狗,令我覺得我嘅工作係為大家解決生活上的小難題,好有意義。」

車一張狗仔床平均要三四小時,都幾花心機。

為方便清洗, Vicki設計的狗床、狗樓梯都可以把外層拆出來。怕狗狗誤食拉鏈,開口位會用魔術貼。

Vicki推介這款狗仔出街袋,「我用咗好多時間去設計,狗仔伸個頭出嚟時,係咪好似著咗件西裝同打呔呢?」

除了狗床可度身訂造外,狗樓梯亦可以,狗狗愈年老,梯級可愈闊愈疏,斜度愈平,方便上落。(狗床$188起、樓梯$439起)
查詢: http://www.Biscuit-House.com
收費: 8小時畫班課程$900

撰文:吳韻菁
攝影:胡春輝

全站熱搜

tvb4life 發表在 痞客邦 留言(0) 人氣()