ILIKE

呼吸底衫

Ads by Google

毅行者月中開波,對我哋呢啲唔可以好快完成賽事嘅人嚟講,點都要喺山上行住過夜。夜晚涼涼哋,著短 tight太凍,著外套又嫌焗,準備衫嗰吓都幾頭痛。上個禮拜就見到 Compressport新出咗件 On/Off Multi-sport Tank($590),上山行到氣來氣喘,彈性開窿衫身會隨住胸腔擴張排汗,保持件衫乾爽, jog落山嗰陣就合番埋達到保暖效果。賽事當日著住呢件衫打底,日頭唔會太熱,夜晚又唔使特登帶多件外套,好用喎。


彈性貼身衣料睇落好似密不透風,但一拉氣孔即時打開,可以保持衫身乾爽,夜晚吹住風都唔會太凍。

@周群雄
幻想重生
有打開機,一定識《 Final Fantasy》系列。近年係咁將歷代遊戲變成手機版,如果好似我咁已經玩齊咁多集,就唔多吸引。最近廠方搞搞新意思,推出一隻名為《 Final Fantasy Record Keeper》(須日本賬戶下載)嘅新作,故事講述主角要用未來科技,將歷代經典場面封印入畫,參與作品包括《 Final Fantasy I》到《 Final Fantasy XIII》,可以用另一角度睇番舊作嘅名場面,單係呢點都有下載價值。不過,用全高清屏幕手機玩嘅時候,有啲場面起格問題都幾嚴重,呢一刻先發現入門手機嘅生存價值。

遊戲入面可用番歷代角色,仲可以抽裝備,新鮮感比復刻舊作高好多。

@勞耀全
袋支靚筆
上個禮拜去 Montblanc影嘢,公關臨尾拎多支筆俾我睇,原來佢哋之前同 Samsung玩 crossover,專登整咗支 e-StarWalker筆俾 GALAXY Note 4用,用料靚不在話下,作為行政人員甚至老闆級人馬,喺西裝袋拎支 Montblanc筆出嚟,再喺手機面篤篤篤,即刻好似高咗幾個 class。不過代價係$3,970,差唔多等於 2/3部 Note 4,抵唔抵真係見仁見智。


支筆粗到塞唔入手機套,不過既然係用嚟 showoff,梗係插喺西裝袋啦!

@潘健文
剪片話咁易
上月中嘅 iPad Air 2發布會,中間(例牌)加插 app開發人員親自示範,其中一個剪片 app,「 Replay」,相當過癮,二話不說, download咗先(免費)。識拍片嘅,固然有好效果,唔識嘅,亂拍嘅,崇尚「浪拍流」嘅,「求其」 import幾條片入去,一樣得!用法簡單,出嚟嘅成果有「大師級」風範,有齊矯色、 zoom-in zoom-out、偷格、慢鏡、音樂襯底,夾 beat……正正係令我要四圍向人推薦嘅理由。

示範人員話用配備 A8X處理器嘅 iPad Air 2拍片剪片最 fit,不過我就覺得 iPad實在太掗拃,都係用 iPhone拍同剪方便啲。

@劉定邦

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()