一隻 game兩份玩,想搵朋友雙打就更加容易。

Ads by Google

Sony最近頻頻在遊戲界出招,先有配合自家新手機、 tablet串流玩 PS4遊戲的 Remote Play功能;上個禮拜,又再為 PS4推出韌體更新,追加 Share Play網上分享遊戲,讓玩家可以經互聯網,免費借遊戲俾朋友玩,或邀請無買到遊戲的朋友玩雙打,認真着數。


畫面同步
以前想同朋友網上對戰或協力打機,一定要每人買一隻遊戲碟或下載版本,但新功能就可以俾玩家,免費在 PlayStation Network上同朋友分享遊戲。分享模式有兩種,一是將遊戲控制權交俾對方,其次是讓朋友成為 Player 2。兩者的原理都是將自己的遊戲畫面串流到朋友的 PS4上,然後系統再讀取朋友的操控指令,達到一隻 game兩地玩的功能。擔心畫面的同步問題?用《 FIFA 15》及《 Drive Club》測試後發現,兩部機的畫面幾乎無時滯問題,被分享一方的操控指令,基本上即時反映在「主人家」畫面上,玩對戰,主人家不會有明顯優勢。

Share功能以前可用來直播打機過程,而家就連遊戲都可以分享埋。

雖然每節限時一個鐘,但操控權在「主人家」手上,隨時可終止分享。
限玩一個鐘
之不過,免費借玩遊戲都有一定限制,首先對方必須是自己 friend list內的朋友,以及每次只可讓一個朋友一齊玩;而在分享過程中,主人家部 PS4必須長開。除此之外,最好婉拒朋友妄想用 Share Play打爆遊戲的要求,因為每節借出時間限定一個鐘,就算你肯長開 PS4,都要每個鐘重新做一次 share手續。
計我話, Share Play最大作用不外乎搵朋友雙打解悶,或借朋友對手過關。想搵朋友着數?就要快上 YouTube用「 Share Play Walkthrough」關鍵字,搜尋連接方法。

試玩《 FIFA 15》對戰,兩部機的畫面傳輸幾乎無時滯,不過為遷就網絡串流,被分享一方的畫面會有輕微跳格,不及主人家流暢。

自己過不到版,大可搵高手代玩。

只要預先邀請朋友進入 PSN的「 Party」房,遊戲中就可隨時按「 SHARE」掣,同朋友分享遊戲。

text:周群雄
photo:潘樂文

全站熱搜

tvb4life 發表在 痞客邦 留言(0) 人氣()