壹知全解

秘魯人參得啖笑

Ads by Google

男士護膚品愈出愈多,花巧度不遜於女士護膚品,最近市面更推出一種加入了「秘魯人參」(又叫瑪卡, Maca)的植物,聲稱可以趕走暗啞乾肌膚,而更神奇的是,有人指它是「秘魯偉哥」,可以壯陽,究竟真唔真?佢又係唔係真人參呢?


現時有不少參茸海味店都有售瑪卡,價格頗貴,記者買大概七、八粒較大顆的瑪卡,已經要價百五元有多,並不比真正人參便宜。

原來這種秘魯人參已悄悄來到香港,上環海味街不少店鋪都有得賣,一個個形狀有點似蜜棗,一點也不似一般見慣的韓國高麗參,它有分大小,價錢不算便宜,一間參茸店老闆郭先生向記者說:「細嘅一斤六百八十,大嘅一斤八百八十,最貴嗰種係黑色嘅(叫黑色瑪卡),一兩一百二十幾蚊,一斤要差不多二千元,因為當地人話佢好稀有,所以就比較貴。」
郭先生說不少客人對這種新產品覺得好奇,於是「買嚟試吓」,有些會要求店鋪打粉,回家沖水飲,他也飲過,記者問他感覺如何,他說:「飲咗覺得個人精神啲舒服啲,瞓得好啲。如果唔打粉,可以切片用嚟焗茶,啲茶淺黃色,味道好似大頭菜同菜脯咁。」
皮膚科專科醫生何家強指出,瑪卡含有維他命 B、微量元素(如鋅)和胺基酸等,以往只當補充品食用改善睡眠、提神等功效,但用於男性護膚品上,只是近幾年的事,究竟係咪可以改善肌膚質素?「有研究發現瑪卡用喺動物皮膚,可以預防因為紫外光令皮膚受損(因為紫外光會分解游離基,傷害皮膚基因),可能一般男士比較多戶外工作及活動,皮膚容易暴曬受損,所以產品就以男士做賣點,但如果話佢可以促進細胞新陳代謝,就未有相關研究證實。」
不能壯陽

男士護膚產品愈出愈多,近來更新出一隻精華露,聲稱加入秘魯人參可以活膚,趕走暗啞膚色。

至於流傳指它可以壯陽,是「秘魯偉哥」,又係咪真?曾對此做過研究的泌尿外科葉維晉醫生一聽就笑說:「又唔見秘魯人性方面勁啲,或者性慾大啲!」
葉醫生解釋,瑪卡是秘魯人的日常食物,原產於南美洲安第斯山脈,屬十字花科植物,類似薯仔番薯之類的東西,含有碳水化合物、蛋白質及脂肪等,食後可以補充體力,但就不能壯陽,「秘魯有研究話有效,但這可能只是心理因素影響,冇乜實際效用,因為美國食物及藥物管理局都無將瑪卡列為可以壯陽(類似偉哥)嘅食物。而一些秘魯婦科醫生又會用佢來醫收經症狀,好奇怪,點解會一隻藥男人又得,女人又得呢?」至於為何叫人參,他指可能是因為有人想抬高價錢,所以就張冠李戴一番,但其實瑪卡真的不是人參,大家唔好被呃到。

撰文:林丹霞
攝影:郭永強

tvb4life 發表在 痞客邦 留言(0) 人氣()