謝霆鋒(中)有老闆楊受成(左)照住,由英皇財務借埋錢俾佢買鋪,身家嘭嘭聲咁升囉。

Ads by Google

中環人語
霆鋒買殼 尋$7億鋒味
謝霆鋒同王菲復合,何止愛情得意,身家更加得意。上星期,佢將創辦嘅電影後期製作公司 PO香港、其中六成權益,以一點二二億元賣俾漢傳媒( 491)。 


霆鋒獲得漢傳媒一成九股權,做埋單一大股東。咁計落,佢間製作公司價值兩億元,而漢傳媒復牌後急升近一倍!至本週二,霆鋒手頭股份賺一億三千萬。大家等緊佢嘅下一步,仲唔係進身上市公司主席?
低調投資的霆鋒,身家又點只咁少!小宗翻查土地註冊處資料,霆鋒搵代理人揸物業,單係中環擺花街,就有四個鋪,已經市值四億。另持有赤柱 Ocean Bay豪宅一間,市值又億七。唔只、唔只,過去幾年炒賣幾件豪宅,有干德道金徽閣、沙田世界花園等,夾夾埋埋賺幾千萬,當中有件貨,仲係英皇財務承造按揭。原來早於九八年,只有十六歲嘅霆鋒已經有投資經驗,當年佢掹住阿媽狄波拉衫尾,一齊炒賣樂活道柏樂苑單位,持貨一個月就沽出,淨賺二十萬。而家霆鋒只係三十四歲,計落起碼七億身家!佢未來嘅另一半,就真係飲得杯落,嗒落好有鋒味囉!
基金跑輸恒指 陳德霖減薪嗎?

外匯基金投資港股蝕咗兩億,莫非攞命陳喺高位入市?插圖:王健威

小宗記得陳德霖講過:「外匯基金是穩定香港的最後一道防線。」因此基金的宗旨正是保本同穩定。係呀,原則好緊要㗎,不過咁噃,外匯基金今季由盈轉虧,蝕咗成一百八十七億!
恒指由七月至今,由二萬三千幾點重上二萬四千點,即係話今季金管局乜都唔做,投資港股部分都應該有微利,但偏偏呢方面,佢哋就蝕咗兩億元!而歐元、日圓同英鎊齊齊貶值,亦成為外匯基金嘅重災區。事實上,日本已事先張揚會推出量化寬鬆政策,有 sense嘅人都知日圓會下跌,普遍貨幣亦會繼續貶值。唔通陳德霖喺操作上,有難言之隱?戴晒頭盔嘅佢解釋話:今季市況波動。
攞命陳每年𢭃九百幾萬,份糧當中,有二百幾萬係同表現掛鈎,佢使唔使減薪平息民憤?
街坊富臨上市 一哥︰用錢解決咗

阿一鮑魚早前入稟告街坊富臨侵權,不過件事已經用錢銀解決咗。

幾個月前出現咗場富臨羅生門,阿一鮑魚富臨知道「街坊富臨」打算上市,入稟控告對方侵權,影響對方上市進度。不過,街坊富臨今個星期二已公開招股,集資五億。即係侵權事件已經解決,以後雙方都可以各有各用「富臨」做生招牌。點解決?據招股文件披露,一個字:錢!
街坊富臨會分兩期俾 cash阿一,第一期俾咗,第二期喺「街坊富臨」成功登記商標嘅七個工作天內俾。至於幾多錢?招股書有講過,富臨嘅商譽值五千幾萬,賠償點都有番咁上下啩。小宗問過一哥楊貫一,佢話唔方便講,但就無幾千萬咁多,仲話佢自己係小股東,乜都唔知,全部都係大股東邱氏家族負責。一哥說:「我一毫子都無袋㗎,公司資金多咗係好事。以前嘅嘢就算喇,唔好再提!」聽落有錢齊齊搵噃!
上九肚山住四百呎
由嘉里( 683)等發展的九肚山豪宅玖瓏山,上週突然開出價單,準備隨時開售。呢幅係限量地,規定發展商要起九百幾個單位,結果除咗千呎複式外,發展商不斷「劏、劏、劏」,劏出八十個四百呎嘅一房單位。計小宗話,上九肚山住四百呎,可進駐呢個傳統豪宅地段,用來報地址都抵呀!照價單三房折實呎價一萬元計,一房單位估計只係四百幾萬。不過咁噃,睇番樓書,呢類一房細單位,只有客廳同睡房,係同一方向有一扇窗。而大部分單位嘅廁所同開放式廚房,氣窗都無個,煮嘢食油煙大少少、又或者去個便便臭少少,都幾難散氣,正式是豪宅嘅價錢、公屋嘅享受!

九肚山玖瓏山一房單位,廁所廚房無窗。無錢買大單位,忍吓啦!(關永浩攝)

插圖:祝健中
金牙大狀講嘢 好打得變作百彈齋主

好打得變作百彈齋主,唔通咁就好實際?

林鄭指「辭職公投」不切實際,除咗嘥公帑,更無助表達民主發展的訴求,因為經過個幾月嘅佔領行動,無論特區政府抑或中央政府都聽得好清楚香港人嘅聲音云云。除咗林鄭,老董先前一樣話中央有各種渠道掌握香港嘅情況,好清楚香港人嘅想法。當真?
睇落就唔似啦!君不見,林鄭同學聯見面,所謂讓半步,除咗設立個平台俾各方參與政改商議,咪仲包括向港澳辦提交個民情報告咩?如果中央真係學得林鄭同老董所講,咁清楚香港嘅情況,請問個民情報告又用嚟做乜?整色整水乎?用嚟耍班無知學子乎?
呢樣不切實際,嗰樣又不切實際,唔通林鄭個民情報告就好切實際?自己乜都唔做,好啦,人哋幫你諗計仔,你就做百彈齋主,唔通咁就好實際?你唔係好打得嘅咩?
中環人語迷你版


“美國解放黑奴 100年,黑人才有平等投票權。”

估中邊個中環人講呢句說話,送你 JWATCH J-37水晶版藍寶石鏡面限量版手錶一隻有意參加者,請於十一月五日(星期三)下午一時後,將答案、姓名及聯絡電話電郵至 centralman@nextmedia.com小宗只接受電郵,郵寄免問。

本刊員工及直系親屬不得參加。
為求公平及杜絕偷步搶答起見,請於每個星期三下午一時後來電郵競猜答案;在此之前發出之電郵作廢。
超過一位讀者估中,先到先得,恕不接受上訴。
答案及中獎者姓名將於下期本欄揭曉。
上週人語揭曉答案


“自己犯法,卻要警察嚴厲執法保護自己。”

高永文
得獎者: Bo William
中獎時間: 1:00pm 29/10/14
(宗菁華)

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()