八卦陣

姓周就當周永康?

Ads by Google

由罷課到佔領,維穩部隊一直透過唔同途徑收集學聯成員個人資料,甚至搵同鄉會嘅人走去學生屋企,「溫馨提示」叫學生唔好搞事,學聯正、副秘書長周永康同岑敖暉,據聞係重點打擊目標。

 


不過,呢類低水平組織做事馬虎,搞錯晒學生資料。一位周媽媽上星期先後收到兩間報館記者查詢,問佢係咪周永康阿媽,同埋有冇捐物資俾佔領運動,呢位唔關事嘅周媽媽梗係否認:「唔通姓周嘅就係佢個仔?」
咁點解記者會搵呢位周媽媽呢?唯一解釋就係姓周嘅囝囝同周永康年紀、身形相若,讀埋同一間學校,來自中產家庭,同樣參加社運,加上七一留守遮打道亦曾被捕,相信維穩部隊已經幫佢開咗 file,仲放料俾傳媒追查,之不過擺咗個大烏龍搞錯咗人,唔知咁樣收唔收到維穩費呢?
胡亂放料同抹黑唔係新鮮事,愛港行動支持者「 Andre Dwyer」喺 facebook老屈位於香港仔嘅「周記茶餐廳」,話係周永康嘅家族企業,揚言發起一人一奶茶行動,暗示乘機投訴周記唔衞生。周記就貼出澄清啟事,話同周永康冇任何親戚朋友關係,其實周記係賣點心嘅,伙記同記者講,佔中同反佔中都唔支持,好彩冇藍絲帶嚟抗議。
學生唔騷韓連山
佔領行動已持續個幾月,三子同學生嘅分歧愈嚟愈大,有人話背後係保衞香港自由聯盟嘅韓連山同何芝君係咁獻計俾學生,實質搞分化。但據本刊了解,兩人雖然經常黐住學生,想搶奪話語權,但其實學生唔多想騷佢哋,仲覺得佢哋幾煩添。
何芝君係民間支援陣線推選嘅代表之一,有份出席佔中「大會」嘅四方會議(三子、學界、泛民、民間團體),會上經常發言,但由於意見不切實際又成日離題,唔多受人重視。
經常寫文針對三子、溫和泛民、教協,批評佢哋想退場嘅韓連山,就成日搵唔同民間團體要求加入四方會議,但冇人騷佢,惟有喺可以見到學生嘅公開場合,拉埋學生一邊密密斟,不過學生有佢哋嘅考慮同盤算,根本唔會聽佢兩個講。如果兩人影響到學生的話,真係要借用張超雄嗰句,「太睇得起佢哋喇!」

保衞香港自由聯盟嘅韓連山(黃圈),近年喺社會運動上成日黐住班學生,人人以為佢好有 say,查實佢喺學生心目中冇乜地位。(《蘋果日報》圖片)

韓連山經常公開批評佔中三子及溫和泛民嘅取態,有泛民中人直言韓連山行徑古怪,「好似全香港得佢一個最民主」。
四太搵細路迎賓

四太梁安琪(左二)與一眾保良局小迎賓拍照後,急急腳入場,小朋友都未必知道,呢位 auntie係保良局屬校校監。

外國記者協會上星期六搞晚會幫保良局籌款,去到灣仔會展會場門口,記者見到一群幼稚園生做迎賓,一齊叫 Hello、 Welcome。佢哋見到中國人面孔,就即刻轉 channel用廣東話叫「歡迎光臨」,令到班著 deep V晚裝嘅女士好雀躍,拉住啲小朋友影相。
原來呢班小朋友都係保良局旗下幼稚園學生。班小朋友罰企做迎賓好似好慘咁,但老師話佢哋喺呢度接觸到較多外國人,可以練大膽啲,學到社交禮儀。講講吓,四太梁安琪帶埋幼女何超欣到場。四太今年係保良局主席,梗係要同班小朋友影張大合照,但佢似乎好忙,影完相即刻入場,睇怕小朋友都未必識呢位 Auntie係保良局大水喉。
保皇環團老屈佔領者

香港環境保護協會主席樊熙泰連日在佔領區回收膠樽,卻突兀地喺環保報告指控佔中有超過二億元不明來歷物資。(網上圖片)

香港環境保護協會主席樊熙泰早排接受《文匯報》專訪及發表「佔領行動環境監察報告」,指佔領造成大量浪費,一個月消耗一千萬支飲料,更以環保人士身份,質疑有兩億元不明來歷嘅物資。有網友笑稱佢曲線撐佔中,皆因一日消耗超過三十萬支水,假設每人每日飲六支,每日佔領人數高達五萬人,係好強大嘅民意。
有資深環保人士話,九○年成立嘅環協好少監察政府環保政策,聲稱有人大、政協做顧問,專做同大陸有關嘅環保工作,本地嘅就只係有回收桃花、聖誕樹、新年桔活動。最騎呢嘅係,呢個會其中一個合作伙伴係《文匯報》,樊今年初曾去信文記北京分社執行總編輯凱雷,「揭開」馬航失蹤之謎,但結論只係「有很多謎團未解」;樊一一年喺公開場合點名指應該要頒個「傑出環保宣傳獎」俾《文匯報》喎,唔通《文匯報》特別鍾意回收垃圾?
樊熙泰回覆話,佢哋一向有低調地向政府提出環保意見。佢又話佢個會冇會址,只有義工冇員工,因為要將資金攞嚟做環保事業,記者提到該會舊址喺舊中環鱷魚恤大廈(現為中國農業銀行),佢先話係十幾年前借用朋友辦公室喎。
尖啤:老董煮死田少
田北俊一句「梁振英應考慮辭職」,影響「保梁」軍心,轉個頭就被逐出政協行列。同田少同病相憐嘅前政協委員劉夢熊形容此乃「以言入罪」事件、「回歸十七年來統戰工作的失敗標記」。
佢透露田少被搣柴同董建華有直接關係:「佢身為政協副主席,坐鎮香港,好留意佔中發展。佢讚梁振英處理佔中『好得很』,點知田少隔幾個鐘頭就話佢『好個屁』,阿董即刻龍顏大怒!」尖啤叫記者諗番○三年七月,田北俊臨場轉軚令廿三條通過唔到,老董道氣谷住谷住,「阿董喺習近平面前講得上說話,於是就新賬老賬一齊算。」
劉夢熊對董建華「保梁」嗤之以鼻,「要董生出馬本身就好笑,佢自己○三年沙士、廿三條,同埋公務員減薪都處理錯誤,腳痛落台!仲要幫梁振英保駕?」尖啤話:「如果我仍然係政協,我都會叫 CY辭職!」
上週三記者會已經有記者問田少,覺唔覺得董生「煮佢米」報廿三條之仇,田少話認識嘅董生好和氣,唔信同董生有關。佢又指當年辭去行政會議成員後,董生委任自由黨周梁淑怡加入行會。睇嚟應該冇隔夜仇啦。

劉夢熊又爆大鑊,話董建華係懲罰田北俊嘅幕後黑手,以報○三年田少臨陣倒戈,唔支持廿三條之仇。

(莫智謙攝)
Happy hour田少蒲頭

想約田北俊訪問,千祈唔好揀咁早, happy hour就啱啱好。(郭永強攝)

田北俊被搣政協柴,辭埋自由黨黨魁,佢話可以暢所欲言,不過上週三記者會後,田少變得好低調,記者約訪問大食檸檬。當日記者會後,有電台立即約佢翌日早上七點做訪問。田少話:「嘩,咁早,九點就得。」
肥水不流別人田,田少想高談闊論,當然留番俾自己友先。自由黨青年團就喺週三 happy hour搵田少做嘉賓,網上報名已經有二百人話會去捧場。 Happy hour由晚上六點半至九點,睇嚟要約田少,呢個時段最適合。

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()