新車激試

強細爆發  MINI JCW GP& AUDI S1 SPORTBACK

Ads by Google

自古以來,車仔配強力引擎就會有好大市場迴響,原因唔難理解,全都係出於「刀仔鋸大樹」心態,細細部車都可以 K.O.外表嚇鬼嘅跑車,咁先戲劇性!最近 Audi為車廠中最細小嘅 A1車系推出頂級版 S1, 231匹馬力、四驅、手波,睇 spec.都完全體現到小鋼炮威力!甚至連一直被推為小鋼炮代表嘅 MINI JCW GP都被比下去。為咗知道 S1有幾堅,特別搵嚟 New MINI Club會長、 MINI JCW GP車主 Benny,試一試 S1底蘊。

 


其實 Audi喺 80年代都有一部 Audi Sport quattro S1嘅戰車,不過當年係落場車,而家 S1只係 A1頂級版,分別好大。 S1對比 A1都有頗大改動,尤其係外觀, Benny一見到都話靚仔:「試車用白色車身好靚喎,同啲黑色配件好襯!而且 5門版都好 sporty,肯定比 3門版實用先啦!」

S1(左)用上全新車頭包圍,論跑味唔會輸畀 JCW GP。

New MINI Club會長、 MINI JCW GP車主 Benny
精煉外觀嚇人
其實 S1 Sportback用上 5門設計,又點會及 3門版靚仔,單係車身門窗嘅線條都比較複雜,如果唔係醒目地為車身上半統一用黑色,外觀一定更雜亂,對比 Benny部 JCW GP,就會睇到 3門車車身簡潔有力得多。「我部 JCW GP就比較極端,一睇就覺得似落場車。 S1唔同,外表設計得恰到好處,大幅加強跑味,又未至於落場車咁 hardcore,好似頭燈內嘅紅色裝飾、車尾門黑色裝飾、同埋四出式尾喉,都低調得嚟話畀人知佢係高級車咁,唔錯!」
眼前 S1同 A1有大分別,除咗因為本身嘅包圍設計唔同,用上大型頭尾泵把之外,測試車仲加埋屬 option嘅 Competition Kit包圍套件,尾翼直頭有兩層,氣勢唔會輸畀 JCW GP嘅碳纖尾翼。

頭燈罩內隱藏紅色框線,就好似雙眼有紅筋一樣,凶狠!

換上四出式尾喉及新款泵把,車尾當堂惡晒!

車主可額外選配雙層式車頂尾翼,型!
鮮紅凳背吸晴


買得 S1同 JCW GP呢類小鋼炮,有幾多個會預料車內有舒適空間?肯定少之又少啦!所以筆者認為 S1 Sportback嘅 5門設定有啲多餘,乾脆只得 3門更加瀟灑!以車身比較, S1比 JCW GP長 201mm,理應有更好車廂空間,可惜今次難以比較!因為 JCW GP太極端了!只得前座,冇後座!而 S1嘅後座好唔好坐? Benny就話:「其實都預咗唔會好好坐,腳位都叫做剛夠用,最估唔到係後座坐得好直,搞到好似同前座好近咁。」其實 Benny第一眼接觸 S1,最吸引佢目光係前座背一大幅鮮紅色裝飾,而且好鬼型咁加上 quattro字樣。據知呢幅凳背裝飾有多色選擇,連碳纖都有,比 JCW GP一對前座更型!此外,中控台上嘅冷氣風口框、波棍台、波棍頭,都可以同凳背襯色,玩味媲美 MINI。
MINI JCW GP

無獨有偶, JCW GP嘅車廂都以紅黑為主色調。

JCW GP最出位係冇尾座設計,換嚟一條加固車身嘅尾 tower bar。

JCW GP嘅猄皮座位比 S1嘅真皮座位更好,包承力豐富。
AUDI S1 SPORTBACK

S1前座造工精美,而且喺頭枕位刻上 S1字樣。

車廂配以紅色出風口及波棍台裝飾已經非常有型,但最吸引都係平底軚盤,普通 A1唔會有。

Benny表示 S1後座腳位空間可接受,但背部比較畢直。

S1前座凳背可選碳纖或鮮紅色,而且印咗 quattro字樣。

首批到港 S1配有 BOSE音響系統。

S1嘅 3隻腳踏靚仔到暈,更難得係操作容易,唔易死火。
四驅會更穩健
或者 Audi已預料買 S1嘅人會係死忠車迷,速度已未必滿足到佢哋,佢哋要好玩、要隨心所欲去操控部車,所以 S1只得最原始嘅 6速棍波設定!此舉一定令好多唔識揸棍波嘅「左腳廢人」卻步,但 Audi一於少理,更甚者為 S1配上同級獨家四驅系統,真正車迷聽到都興奮!
Benny部 JCW GP都係配 6速棍波,但就只用前驅,揸落去兩者分別如何?「其實如果純以棍波嘅操作嚟講, S1真係好易掌握,極力子接觸點較我部 JCW GP低,而且油門好似更敏感。」 Benny講得啱, S1唔單只極力子易用,仲增配 Audi Drive Select,可以調節到 Dynamic模式令油門反應更敏銳,拖波補油動作會更自然。 Audi為咗令 S1可以有更快速穩定行車表現,除罕有為細車配四驅外,甚至尾懸掛都同普通 A1唔同,以四連桿取代複合式連桿,目的就係活化車尾動態,令彎路表現更生動。

Benny話 S1嘅棍波操作比 JCW GP更 easy,油門反應亦更敏銳。
MINI JCW GP

JCW GP嘅波棍行程同 S1好相似,而且檔位清晰,唔難掌握。

JCW GP最勁就係用 6-pot鮑魚,制動力比普通 Cooper S更堅! S1都唔夠佢勁!
AUDI S1 SPORTBACK

近年嘅棍波 Audi都變得易操作, S1波棍唔需要好用力都可以轉到波。

配 225/35R18輪胎,令 S1嘅馬步極之穩健,入彎定過抬油!
特強版最吸引
雖然 S1唔係咩特別版,但可以視為特強版,廠方為佢大幅改良,令性能大大提升,就算唔係好似 MINI JCW GP咁限量,但都一樣會成為車迷收藏對象。類似嘅特強版細車,其實其他車廠都有推出。


超跑血統  Abarth 595 Turismo
由 Fiat 500改良而成嘅 Abarth 595 Turismo雖然只係用 1.4公升 turbo引擎,但得到同集團嘅 Ferrari優良血統,可以爆出 160匹馬力,同 cute爆外表形成強烈對比。車價$419,000起


有買趁手  smart Brabus Xclusive Cabrio
已公布轉款嘅 smart fortwo其實一直有最強版本,不過最強一般會喺普通版推出一、兩年先面世,所以𠵱家有買趁手。 Brabus Xclusive Cabrio用 1.0公升、 102匹引擎,懸掛及車架都特別強化,車仔細細加速力驚人。車價$259,900起
兩種 Go-Kart感受

兩部小鋼炮各有特色, JCW GP輕咗 255kg,入彎清脆利落;而 S1就因為有四驅及新尾懸掛,高速表現穩定。

人人話 MINI有好濃厚小型賽車感覺,未試過嘅人唔會明白,其中 JCW GP可以話係將 Go-Kart感覺發揮得最極致,玩車仔嘅人就係想要呢種感受, S1畀唔畀到?「我發覺 S1嘅軚感同轉向比例都比 JCW GP含糊及慢,大概似一部 Cooper S。而且車身高少少,入彎冇 JCW GP咁 sharp。不過要佢同 JCW GP比較係有啲唔公平,因為 JCW GP比 S1輕成 255kg,例如少咗兩隻門、後座、四驅系統組件等,反應快啲都好正常。」
其實為咗令 S1有更強大加速力,廠方喺細小車頭內塞咗副 2.0公升 turbo引擎,輸出 231匹馬力,扭力更大到 37.7kgm,比 JCW GP足足多 13匹及 11.2kgm!正因為咁,如果冇四驅系統管制一下,起步時會容易打滑,有四驅就可以有效分配輸出,令到 0-100km/h起步只需 5.9秒,比 JCW GP快咗 0.4秒!
話雖如此, S1係就係有更快嘅實際速度,但 Go-Kart感覺唔及 JCW GP,簡單講就係「夠快但唔夠過癮」,正如 GT-R係好快,但唔夠 Elise好玩。

2.0公升 turbo引擎可爆發 231匹馬力,仲勁過 Golf GTI。

AUDI S1 SPORTBACK
引擎: 1,984c.c.直四 turbo
馬力: 231hp/6,000rpm
扭力: 37.7kgm/1,600-3,000rpm
傳動: 6前速手動
懸掛:前支柱式、後四連桿
制動:前透氣碟、後實心碟
0-100km/h: 5.9秒
耗油: 7.3L/100km
車身: 3,975× 1,746× 1,423( mm)
車重: 1,415kg
車價:$462,800起
查詢: Audi HK( 2528 1862)

JCW GP可以喺 1.6公升容積底下搾取 218匹馬力,實在唔簡單。

MINI JCW GP
引擎: 1,598c.c.直四 turbo
馬力: 218hp/6,000rpm
扭力: 26.5kgm/1,750-5,750rpm
傳動: 6前速手動
懸掛:前支柱式、後多連桿
制動:前透氣碟、後實心碟
0-100km/h: 6.3秒
耗油: 7.1L/100km
車身: 3,774× 1,683× 1,393( mm)
車重: 1,160kg
車價:$549,000

由於 JCW GP車身比 S1短一截,所以就算冇四驅,都可以有出色彎路表現。

Benny覺得 S1引擎最勁係可以喺低至 1,600rpm就有 37.7kgm扭力,配合埋四驅系統,起步可以輕易放甩 JCW GP。

撰文:袁國基
攝文:葉偉豪

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()