在微距鏡頭下,昆蟲呈現出的美感深深吸引着 Winza,令她不枉花費大量時間和精力也要繼續拍攝下去。

Ads by Google

青雲路
昆蟲角度看世界
有人愛觀鳥、有人愛賞花,萬物皆有所好之人,但相信討厭昆蟲一定比喜愛的人多, 80後室內設計師 Winza卻愛上昆蟲攝影,把家中過萬張昆蟲大頭照視若珍寶,在萬千昆蟲世界中看到人類社會的縮影,「其實𠵱家佔中嘅學生似蜜蜂,蜜蜂受襲先至出針攻擊,政府唔係欺壓在前,班學生點解要拎自己嘅前途同你對抗?」原來影昆蟲都看到大世界。

 


「昆蟲都有表情,我影相時,佢哋會好奇咁望住個鏡頭;昆蟲好多動作,脫殼、飛行、交配及進食,落雨後嘅昆蟲會將翅膀張開加快晾乾;昆蟲又唔一定污糟,佢哋會好似貓咁用前肢清潔,有啲似招財貓,幾得意㗎!」一個個詳細的昆蟲描述,想不到全出自 80後女子 Winza之口,有時人跟昆蟲一樣都不可貌相。
採訪當日,記者看着 Winza一身黑色裝束,長袖衫褲,戴着手套,在近 30度的高溫下穿成這樣,真是有點「自我虐待」,「清晨、黃昏及雨後都會多昆蟲出沒,昆蟲冇咁怕黑色,所以去影昆蟲都係着黑衫,雖然影完一定成身汗,但唔着長袖衫實俾蚊咬死。自己都驚曱甴、蜜蜂,但真係鍾意影昆蟲,冇計喇。」想不到 Winza竟對昆蟲攝影如此熱愛,一影便 7年了。

柄眼蠅
雙眼尤如手柄,外形奇特,吸引 Winza花費數月來尋找牠的踨影。

藍跳甲
在雨後把翅膀張開,晾乾水份。

六月瓢蟲
交配是昆蟲攝影常遇到的情景之一。

桔潛跳甲
正在進食綠葉,葉上留下一條痕跡。

橘枯葉蛾
形態像一塊枯葉,隱身自然之中。

蓑蛾
利用枯葉建蛹巢,以欺騙捕食者。
探索自然搵靈感
Winza是室內設計師,同時亦是知專設計學院的兼職講師,主要教授室內設計的相關科目,她希望學生能多探索大自然,「𠵱家上網方便,好易就搵到好多資訊,少咗好多親身體驗,讀設計嘅更需要去接觸唔同事物,有時叫學生去大自然搵樣嘢去觀察,好似貝殼、植物、蜘蛛網咩都好,因為呢啲嘢平時少接觸,在窺探大自然奧秘之餘,亦可以搵到新靈感。」
由喜愛攝影,繼而對昆蟲產生好奇,在微距鏡頭下的昆蟲深深吸引着 Winza,「小學去旅行,屋企人畀咗部傻瓜機我去影相,由嗰陣開始就鍾意咗攝影,之後喺電視上睇到外國介紹動物嘅節目,好似 Discovery Channel、 National Geographic,見到放大咗嘅昆蟲畫面,覺得好靚,估唔到放大咗之後個樣會係咁,自己好想去影。」
每星期上山 3次
礙於拍攝昆蟲需要一定的器材需求,在學的 Winza實在難以負擔,「如果用菲林影昆蟲,真係燒錢!直至 06年出咗第一部 full framer嘅數碼單鏡反光相機,於是就即刻買咗佢,開始自己嘅昆蟲攝影之旅。」瘋狂時每星期上山 3次,現時忙碌的 Winza仍每月至少上山 1次,追尋昆蟲的身影。
身為室內設計師的 Winza,認為設計不時可取材於大自然,「參照昆蟲結構嘅設計有唔少,好似水立方嘅設計藍本係蜻蜓嘅翅膀;英國有個旅遊點 Eden Project,個建築主體係參照昆蟲嘅巢。其實昆蟲嘅結構好精密,加以變化就可以整出美觀同實用嘅設計,自己作空間設計時,都會用嚟參考。」
影蟲如尋寶
要拍攝一款昆蟲, Winza形容尤如一場解謎尋寶遊戲,「影昆蟲嘅人唔想太多人蜂擁去一個地方,好易破壞環境,多數唔會公開準確嘅昆蟲拍攝地點。有次喺網上見到有人分享柄眼蠅嘅相,見佢形體好靚又想影,於是就去搵資料,只知拍攝地喺山中嘅瀑布附近,根據佢棲息地、食乜嘢,逐個地點去查,雖然搵咗成 3個月先影到,但個滿足感好大。」
拍攝了過萬張昆蟲相片,除了令 Winza不像其他女生見到昆蟲就大叫外,還讓她練就了無限耐性,「自己係白羊座,個性衝動,好多嘢諗到就做,但影昆蟲唔係自己想點就點,要捕捉昆蟲唔同體態, hold住部機半個鐘或以上係好平常嘅事,心唔可以急,𠵱家我 EQ好高,有時同學仔都嫌我講道理好長氣。」

每次上山影昆蟲,一段 15分鐘的路, Winza要走 1個鐘,「昆蟲好細,要慢慢睇先唔會走漏眼。」

Winza將自己拍攝的昆蟲相片,給一間環保印刷公司印製 2015的月曆。
昆蟲哲學
長期觀察昆蟲,令 Winza有自己的「昆蟲哲學」,「昆蟲要保護自己有唔同嘅方法,好似蝴蝶嘅翅膀有富攻擊性嘅假眼紋;枯葉蝶就有融入身邊物件嘅擬態等。其實人類都同樣有各式保護自己嘅處事方式,好似今次和平佔中,學生壓上自己嘅時間、學業甚至前途,只係想保護返自己所愛嘅地方。」
現時 Winza最希望能與人分享拍攝昆蟲的點滴,「之前有喺 yahoo開 blog,但佢停咗之後就冇再搞,近排喺 facebook開番分享昆蟲拍攝嘅專頁,最大心願係將昆蟲相片結集成書,將自己一啲感悟或者相片分享畀更多人,令更多人認識昆蟲嘅世界。」

拍攝昆蟲 7年的 Winza,收藏了過萬張昆蟲照片,「冇好系統咁記得影咗幾多種昆蟲,但至少有 300種以上,有時都會 print出嚟比朋友睇。」

作為知專設計學院的兼職講師 Winza,主要教授室內設計的相關科目,在每次上堂前都會用心準備教材及給學生的筆記。

昆蟲可以作為設計參考素材,好像 Winza的一名學生就以毛毛蟲的身體作藍本,設計出一體性又富靈活變化的建築。(作品出自 HO YIN LAM)
後記︰慢活世界
住在坪洲的 Winza每次出外都要坐半小時的船,記者只是入內採訪已大呻不方便, Winza反而笑說很享受,「呢度可以保持你自己嘅生活速度,其實太快,你可能錯過好多值得欣賞嘅嘢。」 Winza愛過節奏慢的生活,所以能用 1小時影一隻昆蟲,但記者卻愛打機轉珠,節奏要明快,懂得選擇適合自己的生活才是最好的。
點入行?
有興趣從事室內設計的人士,可報讀坊間的室內設計課程, Winza說:「除基本嘅專業知識外,做室內設計師要有對事物探求嘅精神,了解唔同嘅資訊對設計都有幫助,好似當你為養貓人士設計家居時,就算自己冇養過貓,最好了解養貓人士會有咩習慣,個設計先會令使用嘅人覺得方便及舒適。」
查詢: http://www.hkdi.edu.hk 
課程名稱:室內設計高級文憑
舉辦機構:香港專業教育學院
內容:建築設備及設計商務、傢俱結構及設計詳情、住宅設計、物料與飾面、商業空間設計等。
修讀年期: 2年
學費:$49,800
入學要求:香港中學文憑考試五科成績達第二級或以上,或同等學歷。
晉升階梯
創作總監  10年或以上經驗 $30,000以上

高級室內設計師  5年或以上經驗  20,000-$30,000

室內設計師  1年或以上經驗 $12,000-$20,000

見習室內設計師 室內設計課程畢業無需經驗 $9,000起

撰文:曾志恒
攝影:彭自維、傅新發

tvb4life 發表在 痞客邦 留言(0) 人氣()