韓國版《交響情人夢》叫《明日如歌》,經過幾番換角,最後由《陽光姊妹淘》女主角沈恩京擔正做鋼琴天才,觀眾覺得最合適。 

電視精

韓版《交響情人夢》 民意勝利

Ads by Google

韓流日漸強大,喺亞洲幾乎處於帶頭位置,不過發展得太快,好容易乾塘,唯有用現成貨,就係改編。
日劇《交響情人夢》喺 2006年大受歡迎, 8年後的今日,被改編成為韓劇《明日如歌》。呢一套以古典音樂為主題嘅電視劇,男女主角千秋王子及野田妹兩位音樂奇才,是靈魂所在。韓版找來新一代實力男演員周元,以及依據民意棄用少時允兒而選擇《陽光姊妹淘》女主角沈恩京孭飛,希望可以青出於藍!

跟足漫畫原著

《交響情人夢》本來是一套少女漫畫,以音樂大學為背景,男主角是萬人迷鋼琴家,立志成為世界著名的指揮家,遇上天才橫溢、卻懵然不知的女主角。漫畫描述他們如何追尋自己的夢想,以及互相吸引並墮入愛河, 2006年被拍成日劇而大受歡迎,之後仲去到古典音樂的聖地歐洲拍攝電影版,大收旺場。男女主角千秋王子玉木宏,以及野田妹上野樹里,憑作品一炮而紅,躋身一線演員之列。有咁多威水史,韓劇要翻拍都不無道理。不過《明日如歌》嘅製作團隊似乎好怕被比較,開播之前再三強調,韓國版並唔係翻拍日劇,而係改編漫畫,希望可以轉移視線。睇完頭幾集,如果有睇過日劇版,就知道係大同小異,無論係女主角嘅造型打扮、男主角嘅高傲態度,甚至係搞笑劇情的處理手法,都甚有日劇的影子。其實都唔係壞事,有好榜樣跟吓都無壞啫!


日版同韓版兩位女主角,上野樹里同沈恩京早前見過面,真係有幾分相似。 

《明日如歌》以音樂大學為背景,男女主角當然要識玩樂器,周元用咗五個月苦練小提琴及鋼琴,希望演出更加逼真。 

劇組特登為劇中管弦樂團舉行公開試鏡,有成一千名音樂人報名試鏡,不過最後都係揀大學生,起碼同班主要演員年齡差唔多。

女主角不二之選

《明日如歌》開拍之前,曾經因為選角而鬧出風波。起初劇組選定由《陽光姊妹淘》的女主角沈恩京擔任韓版野田妹,不過由於佢有其他電影在身而辭演,其後傳出少女時代嘅允兒執二攤頂上,不過心水清嘅觀眾都知道,允兒同野田妹嘅爆笑形象,大纜都扯唔埋,一片反對聲中,允兒以有另一套電影開拍作為下台階。最後民意戰勝,沈恩京眾望所歸做番女主角。無論外表氣質,沈恩京嘅鄰家女孩形象,都同野田妹不謀而合,喺劇中佢表現出傻大姐性格,同男主角嘅鬥嘴互動非常有趣,網民大讚。至於飾演千秋王子嘅,係新一代型男周元,佢曾經喺《麵包王金卓求》及《 Good Doctor》入面演出,嶄露頭角,今次做萬人迷,散發魅力引死女劇迷,唔知可唔可以跑出成為新一代男神?


沈恩京為咗演好角色放下形象,扮超天然傻大姐,全神演繹漫畫中的世界,仲試過因為演得唔好而淚灑片場。 


周元同沈恩京喺劇中係歡喜寃家,打情罵俏的場面最多,其次就係一齊演奏的場面。 


撰文:關錦雯

    全站熱搜

    tvb4life 發表在 痞客邦 留言(0) 人氣()