創業通

激玩 Hunger Games

Ads by Google

電影《 Hunger Games》(《饑餓遊戲》)中,女主角 Katniss Everdeen( Jennifer Lawrence飾演)的百步穿楊箭術,令人留下深刻印象,同時亦帶起一股弓箭熱。熱愛射箭的阿豬,在今年 8月成立 Safe Archery Fun Limited,開辦香港首個以弓箭進行的 war game遊戲「激箭」,可說真人版《 Hunger Games》。今次訪問,找來新城電台《美女困獸 Music Show》的節目主持 DJ Joey(陳禮賢),與一眾靚女 model做測試專員,體驗電影中以原始武器撕殺的臨場快感。

遊戲規則

1.每場比賽 5分鐘,先將對方隊員全部(或按人數而定)擊中或擊落所有分數牌的一方為之勝利。
2.每名玩家開始時獲發兩支箭,並由底線開始進攻。
3.玩家任何部位中箭後即判定為死亡,需暫時離場。
4.若有隊友成功接住對方射出的箭,則可讓隊友復活,先出先進。
5.場上設有安全區,玩家可進入安全區拾取箭支,任何玩家不得攻擊安全區內玩家,安全區內玩家亦不能發出攻擊。
6.若玩家於安全區內逗留超過 10秒或越過安全區,將判斷為死亡。


場內有阻礙物讓玩家進行掩護,再尋找攻擊機會。 

遊戲進行途中,玩家可進入安全區拾取箭支。 

遊戲中把分數牌全部擊落,也是得勝的方法。

 


DJ Joey帶同一眾嘉賓分為 A組及 B組對戰,落場體驗弓箭 war game的好玩度。估唔到都幾易上手,遊戲要避開對方嘅箭,又要搵機會射人,幾緊張同刺激,而且個遊戲都好講求 team work,每場都有唔同變化,玩多幾場都唔會悶。5分鐘好似唔長時間,但運動量唔講得笑,連續玩幾局都有啲攰,不過有人射中咗你,下局你就想復仇,玩得都幾激動,想介紹畀朋友一齊玩。 

採訪當日, DJ Joey與 model成為「激箭」的試玩專員,分成兩組進行比賽,事前阿豬為他們講解如何拉弓射箭、配戴裝備,及遊戲規則。遊戲甫開始,眾人即 Katniss Everdeen上身,箭來箭往,玩得大呼小叫,就知道遊戲玩味十足!
Safe Archery Fun Limited創辦人阿豬說︰「其實個 game好易上手,女仔都可以好快學識。以弓箭打室內 war game,好多人都未試過,夠新已經好吸引。」
阿豬正職是工廠維修員,對射箭有濃厚的興趣,「讀書時參加戶外康樂營,接觸過射箭,雖然覺得幾有趣,但一直冇時間認真去學。直到上年年頭,我先去報讀射箭訓練班,之後愈玩愈投入,每個月都會去 4、 5次射箭。」

弓箭 war game

對於定靶射擊漸不滿足,阿豬於是尋找另外一些弓箭活動,由尋找玩樂變成了創業念頭,「喺網上搵到美國有個用弓箭進行嘅 war game活動,叫 Archery Tag,有專用嘅箭及弓,主要玩法係雙方對戰,在限時內擊破對方分數牌或者射中對手令其出局,但當時香港就未有呢樣活動,覺得係商機,不如自己搞。」
阿豬在今年 3月開始思考創業可行性,「起初有諗過直接引入 Archery Tag,但佢哋採用 28磅嘅弓,比較適合外國人嘅體型及所需嘅場地又比較大,香港未必啱,於是自己就托玩箭嘅朋友搵廠,訂造 22磅及 15磅嘅弓,適合男女新手,容易啲控制。」
另外,舉辦團隊遊戲,場地是阿豬首要面對的難題,「香港最難就係搵地方,有諗過租一個地方畀人玩,但地方大就租貴,加上唔知市場反應,風險太大。當時留意到有室內足球場,場地四周有網圍住,唔會影響到其他人,於是決定租個辦公室嚟放設備,有人玩先去 book室內足球場進行活動。」

朋友試玩


懂得射箭的阿豬在遊戲開始前,會向參加者介紹玩法及教授射箭的技巧。 

籌備了約半年,最後在 8月成立 Safe Archery Fun Limited,「最初搵朋友嚟試玩,預計番 set場要幾多時間、幾多人對戰較好及一場比賽時間幾長等。同埋都想佢哋將呢個遊戲宣傳出去,主要都係靠 facebook及口碑宣傳。」

現時每小時收費$3,000,阿豬建議遊戲人數大約是 14至 20人,可分多組進行比賽,每場比賽 5分鐘,在限時內首先擊破對方分數牌,或射中對手至特定人數為勝方,這些規則都是阿豬在實戰中慢慢探索出來。
「有啲規則都係聽取客人意見嚟改善,好似之前擊中分數牌會復活隊友,同埋要射中晒對方先當贏,但客人反映咁會令個比賽拖得好長,之後取消咗擊中分數牌會復活,同埋視乎比賽人數,一方得番某數目隊員就當輸。」

一腳踢

為了節省成本,公司由成立到營運都是由阿豬一手包辦,「買器材、整卡片、搵場地、宣傳都係自己搞。自己仲有份正職,每晚放工都搞到凌晨 1、 2點,星期六、日仲冇得休息。𠵱家嚟 book場嘅客人都係集中喺星期六、日,平日好少人,如果平日有客嚟 book,睇吓就唔就到放工時間,就唔到先會請假,都係 1日、半日冇咩所謂。不過 set場真係需要多啲人手,有人 book場我都會請 part time幫手。」
活動推出後,反應不俗,同時競爭者亦相繼出現,「到目前為止,市面大約有 4間公司提供類似活動,呢個活動算新,市場仍然有待開發,如果話俾人搶生意就未係太驚住,多人搞反而令呢個活動畀到更多人認識。反而驚有人做得唔好,好似安全性唔夠,令客人對呢樣活動留下壞印象。」


阿豬表示現時參加者不少是公司客,藉着遊戲訓練團體精神。 

遇上有客人 book場時,阿豬便會聘請 part time幫忙 set場,以加快活動流程。 

俾弦彈中

活動的先決條件是安全,阿豬表示引致受傷的原因反而是玩家自己,「箭頭係海綿,被對方射中只係有少少痛,反而拉弓姿勢唔啱,拉弦放箭時有機會俾弦彈到手臂,或者比箭嘅羽毛𠝹親手指,落場人士一定要戴面罩同護臂,注意番姿勢,問題都唔大。」
雖然弓箭 war game是新興玩意,但阿豬覺得仍要不時加入新元素,增加可玩性,「近排都幾多關於弓箭嘅影視節目,好似《 Hunger Games》、《 Arrow》等,令弓箭多咗人玩,嚟緊我會引入多啲有關弓箭元素嘅遊戲,好似國外有個 game係用弓箭不斷射個波,將個波推入對方龍門,玩法都幾有趣,希望畀到客人多啲新意。」


另外玩家亦需戴上面罩,以保護眼睛和臉部。 

玩家落場前要將護臂戴在拿弓的前臂上,防止被弓弦彈傷。 

 

開業成本
租金︰$33,000(2按 1上)
器材︰$100,000
雜費︰$35,000
總投資︰$168,000

每月收支
租金︰$11,000
人工︰$15,000
(老闆及 3名兼職員工)
器材損耗︰$5,000
營業額︰$45,000
盈利︰$14,000

報名方法:
bookclass.net或 whatsapp/Line/Wechat
+852 6990 8312


撰文:曾志恒
攝影:傅新發、羅巧怡

    全站熱搜

    tvb4life 發表在 痞客邦 留言(0) 人氣()