採訪當日,色彩繽紛的假髮滿佈房間, Annie說:「呢兩隻兔仔係同時代廣場合作時,佢哋送畀我,我再幫佢哋整咗兔仔耳假髮。」 

青雲路

假髮天后

Ads by Google

「三千煩惱絲,一絲又一絲」,自古以來不論男女,都為頭髮而煩惱。若頭髮如時裝,可以天天新款,相信是不少人的夢想。
假髮設計師 Annie Woon(溫小蘋)擁有「假髮天后」的稱號,她除了曾參與演唱會、 fashion show及電影的假髮設計工作外,她更認為假髮是每個人都可擁有的飾物,故致力發展醫療假髮及假髮作品,令大眾及病人受惠!

 


13年 1月, Annie(左)於時代廣場舉辦了首個個人展覽「奇妙髮現—— WOON WIG WONDERLAND」,圖中小儀帶着的 1.5米闊的假髮正被申請成為健力士記錄世界最闊假髮。 

採訪當日, Annie準備了一系列造型誇張的假髮讓記者參觀,要高有高,要鮮艷有鮮艷,讓人目不暇給,「有啲喺時裝展用過,平時唔會拎出嚟!」香港的假髮設計師不到 10位,在行內 Annie雖被冠以「假髮天后」的稱號,但原來她小時候的夢想是當一位律師。
「自細已經好鍾意講嘢,仲做過辯論隊隊長。自從睇咗電視劇《火鳳凰》後,覺得 DoDo姐做律師真係好型,就立志做律師!」另一方面,因爸爸乃皮鞋設計師,在他的薰陶下,令 Annie對美術、畫圖及手作都有一定的興趣。
95年, Annie如願於大學修讀法律系,在學期間,她曾到紐約探朋友,得到很大啟發,「行街見到櫥窗展示咗一系列賓尼兔嘅公仔,衫、褲、鞋、襪、袋都襯到好靚,但就冇髮型配襯,覺得有啲沉悶,心諗時裝表演嘅 model都會襯唔同嘅假髮,如果配埋髮型,視覺效果一定好好多!」

玩票心態造假髮

回港後, Annie抱着玩票性質的心態生產假髮,「假髮喺香港唔太普及,有發展空間,於是我當係 part time,睇咗好多設計書同相關資料,研究做假髮嘅步驟。我覺得假髮等於飾物,就設計咗幾款自然系列,用纖維製造,仲有長有短,畀人戴出街襯衫。我交畀內地廠商生產,然後搵 model影相,製作咗本小 catalog。」
Annie打算將假髮放到髮型屋寄賣,每個售價由$850起。奈何, Annie受到多次拒絕,「我 cold call過五、六十間 salon,有啲好耐先覆,一係見都唔見,都有少少氣餒。但我覺得創業唔可以怕麻煩,唔得就再約,每次都講多啲假髮喺香港嘅市場潛力。」最後她成功與 10間髮型屋合作,當中包括大品牌如 Private Eye、 Headquarters Salon、 Beijing Hair Culture等。

用真髮最自然

由於當時市面上的假髮產品不算多,質料亦相當參差,比較難找到自然及像真度高的假髮,「一般售價$1,000以下較平嘅假髮都係用纖維造,望落會好膠同好假。我設計第一批貨都係用纖維,望落始終有啲唔自然,之係我開始採用真髮,主要喺歐洲及印度等國家購入頭髮。」
有 stylist巧合地看到 Annie設計的假髮,便邀請她擔任 98年鄭伊健演唱會的假髮設計師。「演唱會嘅假髮設計對我嚟講好新鮮,變化好大!有時要比正常假髮長 1倍、有時要加高、有時要 highlight唔同顏色。」
Annie的訂單愈接愈多,試過一天收到 70個大大小小的活動或工作邀請。同年,仍未畢業的 Annie決定捨棄律師夢,成為全職的假髮設計師。她自言幸運地得到家人的支持,「可能我從小比較自主獨立,父母都明白我喺造假髮上攞到更大滿足感,會支持我所做嘅事。」

與大星合作


Annie(箭嘴)於 VTC教授髮型課程,並與一眾同學合照,「培訓新一代的年輕人加入假髮行業,將傳統的工藝與創意藝術結合,希望可以藉此為他們創造多一個就業機會。」 

因做出口碑, Annie於娛樂圈中闖出一點名氣,容祖兒、楊千嬅、 Twins等明星都跟她合作過,除了演唱會、時裝表演外,她亦參與過電影《花樣年華》、《 2046》及《色戒》等的假髮設計,每次收費約$20,000起。

 


為了迎合不同年齡層需要, Annie會為假髮染色,如啡色、金色及灰色等,「後生女鍾意淺啡色,年老人士嘅花白髮色都有,假髮用真髮製造,用番平時嘅染髮劑就可以,但要小心一定唔可以染到假髮嘅頭皮,因為用布造,洗唔甩。」 

直至 99年, Annie於銅鑼灣租了一個 200呎單位成立公司。「 03年 SARS對我影響好大,生意差到兩個月只有一單 job,於是我暫時執咗間鋪,變番 freelancer。」
Annie有感不能只靠大型表演工作來維持生計,這讓她想到做假髮的初衷,「希望視假髮為飾物,令假髮融入生活。」因此,她打算擴大目標客群至一般大眾。
07年經濟好轉,她於北角設立門市,更於網站及報章登廣告宣傳。「有位客人睇到廣告嚟搵我,佢有 cancer,因做化療令啲頭髮甩晒,佢好想買一個自然、像真度高嘅假髮。因為呢一次,我就想接觸埋醫療假髮嘅市場,幫到甩頭髮嘅病人。」

夕膠邊唔易甩

大型表演講求造型與視覺效果,醫療假髮則採用真髮之餘,更需講求實用性及舒適度, Annie說:「一開始頭套嘅膠質較重,比較焗身,於是我改用絹面嘅布,會透氣啲。同埋,病人戴假髮會易甩,所以我喺假髮邊緣加咗夕膠。夏天咁熱,我仲加啲放退熱貼嘅位!」
現時 Annie創立的假髮品牌月賺約 80至 100萬, 60%生意來自接外國 fashion show, 20%則做醫療假髮,其餘為禮品設計。「 SARS及 08年金融危機,令生意差咗好多,雖然好大壓力,但自己冇諗過放棄,會諗其他方法解決,好似假髮冇乜生意,我就做埋禮品設計,搵多啲出路。希望將來醫療假髮發展得更好,嚟緊打算送一批假髮畀北京醫院嘅腫瘤科病人。」


黃小姐客人我本身有白頭髮,同埋好稀疏,希望戴咗假髮後,睇落後生啲。我未戴過假髮,諗咗好耐先買。 Annie會從我嘅角度出發分析問題及提供專業意見,感覺好好! 

今年 4月, Annie被邀請參與北京中國腫瘤醫院舉辦的「髮絲牽動你我,真情傳遞美麗」活動。 Annie(左)表示很開心可以跟受惠者小曼見面,「捐假髮畀癌症病人,可以幫到佢哋,覺得好有意義。」 

Annie於頭套的前額加設含蘆薈精華的絹布,增加透氣度。另外,亦於假髮邊緣加設夕膠貼,「冇頭髮嘅客人,冇咁易甩假髮。」

後記:認真梳頭

採訪兩次, Annie不單對公仔上的假髮很有要求,全都要梳理好才進行拍攝,她對自己的髮型亦很講究,「呢度啲頭髮遮唔遮到?我想鬆起少少會好睇啲……」旁人眼中,她可能有點姿整,但記者明白,就是 Annie對每一吋髮絲的執着,才可能踏上成功路。好吧,今天開始,記者也要認真梳頭!


Annie現於店中售賣的假髮,全都可作醫療用途,每個假髮的訂製收費由$2,000起,視乎頭髮長短及顏色而定。 


點入行?

對假髮有興趣並有志入行者,可先修讀髮型造型課程,了解各種髮型設計工具及髮質特性,再修讀假髮專門課程。 Annie表示:「𠵱家好難請人,我哋都歡迎有興趣入行嘅年輕人,可以由店面助理做起,一邊做一邊學,再選擇做設計師或行政方向。」

課程:髮型助理基礎證書課程
機構:匯縱專業發展中心
費用:全免(但需符合入讀資格)
時數: 160小時
內容:認識及掌握髮型助理的基本工作知識及技巧,例如頭髮的結構及髮質認識、頭皮及頭髮的保養及日常護理。了解本港美髮業行業的文化及要求,掌握顧客服務知識及技巧,協助學員入職髮型助理工作。
查詢: 3907 6789

 

晉升階梯
假髮設計師(約需 10年或以上經驗)
$16,000至$30,000

假髮造型師(約需 2年經驗)
$15,000至$28,000

店面助理(無需經驗)
$11,000至$13,000

Woon 電話: 2833 2811


撰文:霍芷晴
攝影:傅新發、彭自維、葉偉豪
部分圖片由被訪者提供

    全站熱搜

    tvb4life 發表在 痞客邦 留言(0) 人氣()