專題 Log In

期間限定復活  Toyota Land Cruiser 70

Ads by Google

Honda CR-Z話復刻; Toyota 86又話復刻,但除咗個名之外同元祖有咩關係?今年 Toyota又有復刻之作,但睇中嘅係當年香港用作工程車為主嘅 Land Cruiser 70!威在並唔係好似扮 FJ40嘅 FJ Cruiser咁抽水,堅係跟當年車款製造!
其實 70系列可以話係 Land Cruiser車系嘅實用代表,而且今次廠方趁佢停產 10年推出紀念車系 30周年嘅「期間限定復活」夠晒 gimmick,只會復刻推出 1年, 2015年 6月 30日 cut單,每個月大概只可生產 200部,即係話數目一定喺 2,500部之內,罕!四驅狂人 Bobby當然第一時間入咗全港 1部,仲親身試車話畀大家知佢復活 70有幾巴閉!

 


Bobby表示已經有幾個客訂咗車,未來一個月大概有 7部到港。 

其實 Land Cruiser車系歷史悠久,點解車廠偏偏揀 70復刻? Bobby:「其實愈舊嘅 Land Cruiser愈值錢,愈有復刻價值。不過舊款嘅設計始終久遠,未必啱現今世代用, 70喺日本由 1984年開始生產到 2004年,足足 20年咁耐,證明耐用性同受歡迎程度都好高。停產 10年唔長唔短,吊一吊市場癮,趁住 30周年先出一次,一定爆紅!」

80%忠於舊作

眾多越野車當中, Land Cruiser一定唔係咩豪嘢、貴嘢,大把車比佢豪、比佢貴,不過 70就好似牛一樣,以耐用、穩定性高而響朵,喺日本出足 20年,其實喺澳洲及北美根本冇停過,到今時今日仲出緊!而今次日本市場翻生嘅 70,其實就係同澳洲版接軌,外表同以前日本版有少少分別,改用大盞頭燈,而且前輪沙板冇咁明顯,令成份車頭都大件咗。「我成日去澳洲工幹都見到呢個樣嘅 70,係就係冇以前方形角燈咁有味度,但車身好多細緻位都忠於舊作,好似方形電鍍門手抽、方形電鍍鏡、加長泵把,呢啲設計都好少出現喺新款車上,別有一番味道。」
筆者覺得如復刻版 70用返 30年前嘅初版面貌會更加吸引,畢竟現時呢個外表唔夠舊,大概只有 80%似初代版本。


短陣 70車身只長 4,235mm,軸距更只有 2,310mm,對爬坡極大幫助。 

88年初代 70嘅分體式角燈極之有型,令車頭造型更硬朗。 

復刻版已轉為 facelift版嘅一體式頭燈,同澳洲版一樣。 

復刻 70嘅車身長,但車頭進入角仍然有 33度,都幾難撞底。 

歷史長車系廣


車側除咗有車名章外,仲有 30周年紀念章。 

「 Land Cruiser」呢個名係由 1955年推出嘅 Land Cruiser 20系列開始,然後至 1984年嘅 70系列將佢分成 3條 line。 70系列因為太受歡迎而自立一條分支,日本喺 2004年先停產。另一分支就沿用 Land Cruiser一名,但不斷出新款,包括 80、 100及 200系列走豪華路線。最後一組分支係 1990年自立門戶嘅 Land Cruiser Prado,分別有 70、 90、 120及 150系列,細部少少又年輕啲。

 

40系列價值最高
第二代嘅 40系列雖然唔係第一款 Land Cruiser,但一定最值錢!由 1960年生產至 1984年,足足 24年!正因為佢極受歡迎,就算後期已推出新款 55及 60系列, 40系列仍同時生產,直至 70系列出現。本港都有唔少人收藏,據知早前就有賣家為一部油渣 40開出近百萬車價,而且唔少人有興趣。

 

90系列 Prado中港王
90年代中港交流愈來愈多,喺 1996年推出嘅 90系列 Prado可以話係最紅一款 Prado!當年亦造就唔少水貨車行以 Prado致富,不過自從歐洲 SUV掘起後, Prado已冇當年咁巴閉。

 

100系列豪華行宮
同樣係 90年代出現、 1998年推出嘅 100系列 Land Cruiser,可以話係第一部注入豪華元素嘅越野車,同 70系列嘅簡樸有好大分別。此外,由 100系列開始,北美市場都換上 Lexus LX車系名字,可想而知有幾豪。

Toyota Land Cruiser 70 Spec.


雖然係復刻,但外表已唔算好古老。 

引擎: 3,955c.c.V6
馬力: 231ps/5,200rpm
扭力: 36.7kgm/3,800rpm
傳動: 5前速手波
懸掛:前車軸式、後車軸式配葉片彈簧
制動:前、後透氣碟
車身: 4,810× 1,870× 1,920(mm)
車重: 2,120kg
耗油: 6.6km/L
車價:未定
查詢: 4X4 HK( 2669 9657)

最好的年代

外表 80%復刻初版,車廂就更加面目全非,不過筆者認為影響程度唔及外表大,因為復刻版 70嘅車廂冇刻意搞到現代化,整體設計以至用料都有極濃厚 90年代風味!即係點?有揸過 80年代尾或 90年代頭 Toyota車嘅朋友就會明,由中控台、表板、座位,以至細小到簡單一粒鎖門嘅掣,都極之簡約,冇美感,不過用料上乘,用廿年、三十年都唔爛先恐佈! Toyota之所以有今日良好商譽,好大因素由 8、 90年代呢批車建立。「其實呢部 70個籠真係好似以前啲車咁齋,好少電子嘢,不過咁先啱一班 hardcore四驅友,布料座位冇電動又唔可以多種摺法,少個香爐少隻鬼!包唔會有嘢壞!」


門板布料、塑膠及開門掣都用返 90年代最好嘅物料。 

天線可以電動升降,方便進出叢林。 

對應寒冷地區,後座冇冷氣,只有室溫風及暖氣。 

駕駛席下方有出風口,而且可調節角度。 

新電油引擎

2004年喺日本停產嘅 70採用 4.2公升 V6柴油引擎,如果復刻版都用呢副偈就發達,可惜因為市場及廢氣問題,廠方為復刻版配上編號 1GR-FE嘅 3,955c.c.V6引擎,其實同現行嘅 Prado及 FJ Cruiser一樣,不過唔知點解冇咗 Dual VVT-i系統,只得普通 VVT-i系統,令馬力只有 231匹,比 Prado少 45匹。不過大馬力對越野車冇乜意義,扭力仍可有 36.7kgm先係重點,配合最原始 5速手波,已經有力拔山河氣勢!「我當然覺得電油引擎唔夠油渣好啦!但原廠只得呢個配搭都冇計。好彩波箱仍然保留原始款,手動切換 L4、 H4同 H2最穩陣同耐用!仲有車廠冇郁過 70最出名嘅陣式車架,令到佢原裝車都已經有相當厲害越野表現,換四條胎已夠晒玩!」
70用原始嘅葉片彈簧尾擔,行車硬橋硬馬,同現今世代如 Prado一類新車好唔同, on-road比較彈跳,似坐 Hiace貨 van,但入山就有優勢,結構簡單而且可對應大幅度落差,四驅友就會明佢有幾可愛。


引擎來自 Prado,但由於只有單 VVT-i系統,馬力下調咗 45匹。 

Bobby對電油引擎表現滿意,但如有油渣更好! 

 

 


1988 LC70復刻版用咗 90年代嘅內籠,當然唔及初代咁 man,但勝在質量超班。 

2014 LC70 

後座設計仲簡單過貨 Van,中間位冇頭枕,而且只可摺凳背。

冇電動前座、冇天窗,但愈齋就愈受四驅友歡迎。 

由於地台冇路軌,令尾廂空間大到無倫,相信可以直入一部單車。 

表板設計簡單到暈,一望就令人諗起 90年代嘅 Toyota。 

5速手波夠晒原始,再加上手動切換四驅,包冇電子問題。 

冇油渣偈始終差啲


1988年Land Cruiser 70車主 Edmund 

其實以實用見稱嘅 70,當年喺香港大部分都係工程車或地盤車,數量一定比 40多,不過質素比較參差,今次搵嚟嘅 70車主 Edmund,就擁有過多部 Land Cruiser及其他四驅車,但最愛始終係眼前呢部 1988年初代油渣引擎短陣 70。「呢部車之前係中電嘅工程車,我都玩咗成 8年,車價就唔方便講嘞,買嘅時候部車狀態都已經唔差,可以能係因為佢係香港行貨啩。買咗返嚟之後我主要簡單翻新一下車身,換晒啲電鍍裝飾同噴油。 70雖然喺日本停產 10年,但澳洲等地仍然有賣,所以搵零件完全冇難度,而且部車好耐用,咁多年來冇大問題,正常保養就 ok。」
復刻 70最令本港四驅友卻步可能就係用電油引擎, Edmund既擁有油渣 70,又有電油 70,佢又覺得邊款引擎好?「梗係要油渣偈啦!復刻版好多方面都吸引,只係冇油渣偈始終差啲,咁大部車又重,唔玩油渣好重皮!」

 

 


由於用油渣引擎,轉速紅區比電油引擎低,大概 4,000rpm已「見紅」。 

手波波箱 30年來如一日,可見實用又耐用。 

短陣版後座唔用雞翼窗,用手動趟窗更實際。

短陣版尾廂空間有限,大概同一般七人車咁大。 

Edmund部 70採用 3.4公升油渣引擎,佢話最緊要係好力又慳油。 

復刻版採用一體式頭燈,令車頭大咗,但就冇咁 classic。 

初代版指揮燈同大燈分開,而且有明確沙板位,型到暈! 

後記 如果賣 55萬,你買唔買?

今次復刻加上 30周年,再加上一年限定復活,預計到復刻 70唔會便宜。據日本本土賣價達 360萬日元,如果加埋本港稅及利潤,車價可望$550,000埋單。現時一部企理嘅中古 70可以叫價 20萬以上,如果係油渣版, 30萬都唔出奇。既然用 30萬可以買到部正宗中古 70,點解要多花廿幾萬玩復刻?唯一理由就係全新車!完全唔需要為翻新而投資,因為舊車翻新嘅金錢可以好恐佈,所以冇麻煩、冇鑊氣嘅新車對好多玩車嘅人嚟講相當吸引。


撰文:袁國基
攝影:葉偉豪

    全站熱搜

    tvb4life 發表在 痞客邦 留言(0) 人氣()