必影位 

Geek友講場

吉蒂女人四十  Hello Kitty Go Around!!

Ads by Google

Hello Kitty不經不覺已經誕生 40年啦!由幼稚園已經開始認識你,陪住我升學、出社會工作,雖然近年你成日 crossover、搞到鬼五馬六,但我仍然好記得你條藍色工人褲、仍然咁喜歡你張冇嘴貓樣,估唔到準備為你安排 40歲大壽前,你忽然話自己唔係貓,其實係一名倫敦女生,實在太意外!但唔理你係人定係貓,我仍然會咁愛你㗎!知道你喺九展大搞生日嘉年華 Hello Kitty Go Around!!,我哋全港吉蒂粉實落嚟祝你:女人四十. Happy Birthday!

必影位  Hello Kitty摩天輪

摩天輪,象徵著時代嘅變化,同陪伴著我哋成長嘅純真美夢!呢架 Hello Kitty摩天輪上面, Kitty嘅最好朋友都會喺齊度!呢張相,真係點影都靚!

Hello Kitty週年館

Kitty 40年來咁多造型有乜唔同?男人識條鐵!我哋自己 Kitty fans一入到週年紀念主題館,梗係一眼認出旋轉木馬上分別有 25、 30、 35及 40週年嘅 Kitty,勾起種種回憶。

Sanrio Friends特急號

同 Hello Kitty一齊坐過山車呢個咁特別嘅童年夢想,今日終於可以實現喇!


Hello Kitty時裝夾公仔

Hello Kitty不嬲都係卡通明星界嘅 fashion queen嚟,你可以走埋入夾公仔機,同 Kitty一齊扮公仔合照。

Sanrio電影院

呢張超長又識郁嘅「 Sanrio上河圖」,會喺 3分鐘之內由日轉夜,仲有齊哂 Sanrio 40位角色喺小鎮出沒,快啲用手機 Panorama功能影低佢啦!


Kitty皮/木
手作坊
有愛請動手

場內有 Kitty手作工房,可另費參加 Kitty皮革、木製品製作班,最吸引應該係用木板同燈泡自組 Kitty旋轉木馬檯燈。
日期及時間:可參考 Hello Kitty Go Around手機 App
費用:$360-$590/位(包專人教學及材料)



玩可愛遊戲 贏盡 Cute爆 Kitty禮物


Kitty展向來都唔係得個睇字,今年一樣有數個互動小遊戲,食番主題 key art上嘅旋轉木馬,場內遊戲全部以嘉年華為題材,好似銀仔擲彩虹、豆袋掟公仔等等,女仔有機會拎到巨型禮品、同行男士亦可一展身手。

彩虹蝴蝶結

用 Bling Bling嘅 Hello Kitty金幣擲彩虹,目標係終極大獎: 30吋高巨型 Hello Kitty!

爸爸的閱讀室

要幫 Kitty爸爸分發報紙,呢個任務都唔易㗎!搞得掂嘅話你就可以贏到 Kitty攬枕喇,正!

Ichigoman正義聯盟

Ichigoman(草莓俠) 2012年登場之後,就一直同佢嘅伙伴 Darkgrapeman同 Honeymomo守衞地球!遊戲係用吸管吸起波波並從天而降,再用背上布袋收集,愈多愈高分。


媽媽的烘培室



Kitty最愛媽媽親手整嘅蘋果批,一於入去學埋一份。將材料掉去相應嘅位置,全對就可以贏到限定嘅爆谷型 Kitty!超想要吖!


買代幣抽閃咭

玩攤位遊戲需用 1張遊戲券,每玩一個遊戲無論輸贏都可獲得 Hello Kitty經典造型咭 1張,全套共有 42張。遊戲券單張$25,買 5張優惠組合($100),同時加送多 1張經典造型咭。

大注目!會場必買限定!

 


Hello Kitty Go Around 10 

會場限定 Tee(黑/白)各$280 

Hello Kitty頭箍$120 

文件夾套裝$70(一套 3款) 

離開前別忘記!

玩完哂記得唔好就咁走,買返張明信片,再蓋個 Hello Kitty專屬郵戳,將美好嘅回憶帶返屋企!



Bye Bye 

「 Hello Kitty Go Around!!」

日期: 2014年 10月 30日
至 2014年 11月 16日
開放時間: 11am- 8pm
地點:九龍灣國際展貿中心地
門票:星期一至五 成人$80小童$60
星期六及日 成人$100小童$80
詳情可參閱網址: http://www.hellokittygoaround.com 
手機 app: Hello Kitty Go Around

全球獨家! Hello Kitty農莊初體驗

Hello Kitty商機處處,基本上諗得出嘅產品或服務都有推出。之不過當中仲有漏網之魚,就係全球獨家 Hello Kitty有機薈低碳農莊,設於元朗錦田!負責人 Raymond話大家除了可以見到 Kitty農夫同稻草人從中守護,亦可以自己種菜耕田,體驗綠色生活,甚至預告於 12月推出時令「 Kitty頭」士多啤梨,陪你過冬。

A.Kitty證婚不失童真

Raymond提到,農莊預計 12月會正式推出 Hello Kitty證婚服務,把原本派對場地劃為香草園-Hello Kitty及 Dear Daniel之婚姻專區,沿路及場地會種滿香草、洛神花,俾一對新人同親友參與富有清新芳香及童真嘅有機婚禮。當然證婚人及法律文件需要自備,否則 Big Day變 Bad Day就大件事。

B.自己蔬果自己種

好習慣應從小開始培養,所以農莊開設小農夫計劃,家長可租下小耕地同小朋友種植蕃茄、粟米等易種蔬果,培育健康飲食習慣,而旁邊亦有玩樂區共享親子樂。耕種過程可能辛苦,不過食到自種蔬菜,咩成功感都返嚟啦!(租貸價錢面議)




C.農莊限定 Kitty頭士多啤梨


農莊限定嘅「 Kitty頭士多啤梨」究竟係點?由於 12月才收成,所以暫時冇圖冇真相。不過我哋就喺 Raymond手上取得設計圖,並模擬成品,望落都幾可愛。如果有興趣的話,可以到時於農場購買,每磅售價約$80至$100。

Raymond談農莊:稻草 Kitty充滿親切感!

做咗全職農夫約一年的 Raymond坦言,開辦 Kitty農莊純屬緣份,朋友嘅朋友巧合係日本 Sanrio員工,去過 Kitty農莊嘅前身「有機薈農莊」後印象難忘,才提出合作計劃,更取得版權推出農莊專屬造型產品,包括稻草人及小農夫匙扣。
Raymond笑稱自己本身對 Kitty認識不多,所以在構思相關造型時需經過多次修改。不過當看到稻草人成品跟自己健康膚色極襯時,就覺得充滿親切感,並大讚日本設計團隊嘅細心,先可以令形象咁突出。

Raymond Cheng
Hello Kitty有機薈低碳農莊負責人



小農夫造型花盤$68 

小農夫造型匙扣$80 

稻草人造型匙扣$88 

Hello Kitty有機薈低碳農莊

地址:新界元朗錦田四排石(港鐵錦上路站 A出口 步行 3分鐘)
開放時間: 9:30am-6pm(逢星期二、三休息,公眾假期除外)
入場費:$20(平日)、$30(星期六、日及公眾假期)
查詢: 5579 2178


世界各地點同 Kitty慶祝?

大家有否發覺 Hello Kitty Fans之多,就好似 7-11一樣梗有一個喺左近!所以作為 Kitty 40大壽,世界各地都有不同慶祝活動,甚至祝賀到下年。 Let's celebrate!

日本

日本政府透過新型科技,以人造衞星將 4厘米高嘅 Kitty送上太空,仲拍片為記。片中見到佢好專心坐喺太空艙內回望地球,唔知佢會唔會畏高呢?



高雄

又係展覽!冇錯,不過呢個由日韓台聯合製作嘅百變 Hello Kitty 40週年特展,結合不同藝術範疇,隨時見到 Kitty化身夢露同差利造型示人,展期至下年 1月 4日。


馬來西亞

Kitty聚會只在 10月 31日至 11月 2日期間,於柔佛州新山 Hello Kitty樂園舉行!唔知大家會想同佢一齊做啲咩?仲有時間,買定機票慢慢諗都未遲。


洛杉磯

最大型 40周年慶祝活動,可能係設於洛杉磯日美國家博物館嘅回顧展!當中固然會 Show返歷年經典作,但個人覺得大家見到「埃及妖后頭」造型,又或者將成個人體架構著上身嘅 Kitty,心情應該好複雜。


巴黎

呢個活動其實關乎台北、巴黎兩地,因為長榮航空會加開 Hello Kitty彩繪機來往由台北至巴黎,正式進軍歐洲,而香港嘅朋友同樣可選搭,並經台北轉機。下次去巴黎鐵塔前,不妨會一會 Kitty,之後先漫遊花都。




撰文:陳可兒、蘇家華
攝影:黎韋邦、羅巧怡

全站熱搜

tvb4life 發表在 痞客邦 留言(0) 人氣()