陳敏之開店前,一早已大派曲奇餅給圈中好友試味,又將出品做自己的婚禮囍餅,個個讚好。

飲食特務 B

天后賣曲奇 陳敏之 

Blesscuit Bakery 地址:天后電氣道 13-41號凱旋大廈 35號 B鋪 電話: 2782 1778

Ads by Google

「索腿天后」陳敏之啱啱新婚,轉頭曲奇餅店又開張,敏之首次做老闆,特別興奮:「自己一直都好想做生意,不過因為忙拍劇冇時間去諗,次次都傾唔成。我覺得做生意一定要自己鍾意,先至事半功倍,咁啱有朋友介紹一班 partner,我一聽到 Blesscuit『祝奇餅』呢個店名,就決定要參與。因為我由細到大都好鍾意食曲奇餅,店名有送上祝福的意思,希望可以通過曲奇餅,送上一份祝福同分享一份正能量俾大家,相當有意思。」


金鑽黑松露曲奇用上意大利松露醬及竹炭粉,一開已經聞到陣陣菌香,面層更鋪上一抹食用金粉,相當矜貴。

敏之其實唔識整餅,笑稱:「我淨係識得食!為了生意,曾親自去工場跟師傅學做餅。師傅之前在中環蘭桂坊酒店做甜品,係一個思想正面嘅人,我覺得一切都係緣分,好難得成個團隊都擁有同一信念。」敏之投資七位數字,主要負責俾意見,包括味道、店鋪設計同包裝。「我好鍾意食黑松露,出街食飯會點黑松露菜式,就提議用來整曲奇。曲奇餅加入意大利松露醬同竹炭粉製成,一焗出來好香,好多人試過反應都好好,成為餅鋪主打。」曲奇有十四款口味,選用法國麵粉同牛油製成,又混合使用黑糖、黃糖及海藻糖,不加防腐劑及化學膨脹劑。最特別係番茄、鯷魚味幾款鹹味曲奇,用上意大利貨,落重本製作。

(上起)香橙、綠茶、紅莓水果茶曲奇
敏之第二最愛為香橙味,以海藻糖浸過法國橙皮,橙香濃郁。綠茶及紅莓水果茶均有清淡茶香,入口清新。

番茄(左)、鯷魚曲奇(右)
鹹味曲奇冇想像中奇怪,番茄味道似 pizza,番茄味不算重。鯷魚加肉鬆及香草製成,帶微微鹹香。

醇香咖啡(左)、情迷朱古力曲奇(右)
除了四方形狀,亦有兩款扭花曲奇,質感更加鬆化,焦糖咖啡味香甜濃郁,朱古力用法國可可粉製成,味道甘香。
今次開店籌備約一年,平時咁忙,坦言唔會成日落鋪。採訪當日敏之抱恙都要宣傳:「做生意一定辛苦,開鋪雖然令自己更加忙,不過好似見住自己嘅 BB出世,而且係自己嘅興趣,辛苦都值得!我哋已經準備開分店,下年年頭就會開張,希望可以成為香港人的手信,全世界嘅人都食到我哋嘅餅,收到我哋嘅祝福!」

單口味曲奇$45有 8塊,紙盒用上敏之最鍾意的紅色,每日在工場新鮮製作。(黑松露及紅莓水果茶賣$55)

共有七款禮盒裝,各有不同口味,全部獨立包裝,保持鬆脆。細盒裝$138-$148/24-26塊,大盒裝$278/51-52塊,另有一款限量版,共 30塊黑松露味,售$188。


Blesscuit Bakery
地址:天后電氣道 13-41號凱旋大廈 35號 B鋪
電話: 2782 1778
營業時間: 11am-9pm

撰文:張頌婷
攝影:譚俊軒
nextplusone@nextmedia.com

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()