Webber

治療系一家 吉爺與餅哥 x Tamara

Ads by Google

記者真係好唔明,點解貓貓咁善良,咁可愛,總係有人抿滅人性去虐貓?人有七情六慾,喜怒哀樂。貓都一樣,點解有啲人唔可以將小動物當作自己朋友一樣去愛護?其實貓有一種好神奇嘅魔力,就好似 facebook page「吉爺與餅哥」入面嘅貓貓咁,好多人見到佢哋可愛樣之後,所有壓力或者日常生活不快都會一掃而空,就等我哋一齊深入認識下佢哋一家人啦!

Tamara Wong Webber's Profile
facebook page:吉爺與餅哥
Like: 15,000
著作:《薯餅這一家》
毛毛、星星、爆炸糖問:嫲嫲 Tamara,到底我哋三兄妹係點樣嚟到呢個世界㗎?
Tamara:話說你哋嘅薯餅爸爸係我有次經過寵物店發現嘅,嗰時佢好慘俾其他貓恰。我覺得好慘要去救佢,所以冇理佢係咩品種就接咗佢返嚟,但之後先發現原來佢係有骨嘅病變嘅摺耳貓。其實我哋唔想餅爸有下一代㗎,怕後代有機會遺傳到。不過因為唔想加重餅爸嘅痛楚,所以未幫佢絕育。天意弄人,咁啱你哋媽媽牛奶妹嚟咗嘅短短時間內,薯餅反而好精靈,於是就搞出你哋三條貓命喇!

薯餅(爸爸)
出生日期: 2011年 1月 18日
品種:蘇格蘭摺耳貓
性格:喺仔女面前係大男人,背後係隻嗲嗲 B。

牛奶妹(媽媽)
出生日期: 2012年 9月 6日
品種:曼基貓
性格:有啲 cool、有啲惡、有啲公主病。

星星(大哥)
出生日期: 2013年 5月 4日
品種:摺耳曼基貓
性格:唔好動、但又唔冷漠。

薯餅問:媽媽,因為你,我成為咗大明星,成日都要拍廣告影相,點解你當初會為我哋開個 page嘅?
Tamara:我男朋友 Ben本身係攝影師嘛!成日會 post你同你個狗 best friend吉爺啲相,有網友就提議不如開個 fans page,慰藉吓貓奴同狗奴。於是我哋就決定玩一個遊戲,就係 upload一張你嘅相,如果多過 200個 like,我哋就開個 page,最終超額完成,更發放好多正能量比好大壓力嘅香港人。

毛毛(二哥)
出生日期: 2013年 5月 4日
品種:蘇格蘭摺耳貓
性格:超級活躍,極度八卦。

牛奶妹問:我都知我平時咁 cool搞到你好煩,咁照顧我哋有咩令你頭痕呢?
Tamara:你 cool係你嘅性格,點會覺得煩呢?其實因為我有鼻敏感,你哋換毛時我就慘喇,因為你哋會 5隻一齊換。另外就係你哋大食囉!食到星星咁肥就知啦!就嚟食窮我喇!不過見你哋食得、瞓得、玩得,唔似薯餅要受苦,呢啲頭痕算得係咩!

爆炸糖(三妹)
出生日期: 2013年 5月 4日
品種:蘇格蘭摺耳貓
性格:最嗲、最易開心。

薯餅問:媽媽,媽媽,我哋係唔係好唔識體諒你唔開心嘅時候呀?
Tamara:雖然有人話狗好識主動去安慰人類,譬如我媽媽過身時,我爸爸好傷心流眼淚嗰陣,你另一個狗 best friend Stewie會主動走去舔走爸爸嘅眼淚。但其實你哋都會治療到我心靈,只不過你哋用嘅方式唔同,有時我自己唔開心,你哋會走埋嚟反肚,我一見到就會開心番。

撰文:陳可兒
攝影:傅新發

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()