王生在上環賣蟹賣了十幾年,手上的大閘蟹「腳撐撐」,十分生猛,他說蒸時緊記反轉蒸,就不會浪費蟹膏。

Ads by Google

食大閘蟹時節又到,今年價格屬十年新低, facebook上已不斷有大閘蟹相「洗版」,看得人垂涎三尺,巴不得立即買幾隻回家拆來吃,但原來除咗點揀點食有學問,食得太多亦對身體不好,究竟食幾多先好?


名牌大閘蟹老店老三陽門庭若市,老闆祁廣楠笑言今年「蟹抵食呀」!三至四兩太湖大閘蟹一隻只賣四十元,有些更賣到一百元三隻,可謂十年來新低,難怪客人都比以往多三成,有熟客覺得「機會難逢」,更誇張到連食一個禮拜。
祁解釋為何今年大閘蟹又平又靚:「今年江蘇天氣相當好,少落雨氣溫又唔太高,去年就試過連續十幾日熱到四十幾度,太高溫啲蟹就會死,今年就唔同,而且七、八月係大閘蟹脫殼期,大閘蟹脫七次殼才能成長,而最後一脫(即第七脫)好緊要,今年脫殼之後有大閘蟹重咗一倍,四兩變八兩,而且天氣好死亡率低,蟹就多咗。加上今年內地打貪唔送得大閘蟹,就多咗八九兩嘅大蟹入口香港。」
大閘蟹今年雖然又平又美味,但註冊營養師潘仕寶就奉勸,大家一日不要吃多於一隻,特別是大閘蟹蟹膏多,小心食到膽固醇超標,增加堵塞血管機會,「一百克(即二兩半)分量嘅大閘蟹,有二百六十七毫克嘅膽固醇,一般人每日攝取膽固醇上限係三百毫克。因為一般魚肉、雞蛋(一隻中型雞蛋約有二百一十三毫克膽固醇)都已經有膽固醇,如果一日內已經食了肉,食大閘蟹就唔好多過五十克。」

蟹腳有金黃毛,濃密且長為之好。

吃時切勿吃蟹內臟,蟹肺(黑色部分)在蟹蓋中蟹膏的中間位置,而腮亦很骯髒,吃了會肚痛。
肝臟功能欠佳者,更要戒吃,當年有傳肥姐沈殿霞一次過吃六隻大閘蟹而昏迷入院,原來都與此有關,腸胃肝臟科專科醫生姚志謙就說:「佢(肥姐)個肝功能已經唔係太好,有脂肪肝問題,可能食咗大閘蟹令病情急速轉差。」姚說因為大閘蟹的脂肪及三酸甘油脂含量高,一次過食太多(如超過兩、三隻),可以在很短時間內將體內血脂推高,增加肝臟負荷,嚴重的可以令人昏迷。所以即使今年是大造,大家有病冇病都好,都要忍吓口,兩、三兩重的,每次食一隻夠了。
腥先係正
在上環賣大閘蟹賣了十幾年的店主王先生教揀蟹:「大閘蟹生唔生猛,就要睇啲眼識唔識郁,捏吓啲腳睇吓實唔實。正宗陽澄湖大閘蟹啲關節位同啲爪好尖、好㓤手,蟹腳有金黃毛,好濃密同比較長。」在旁邊的王太更道出一個多年揀蟹心得,「聞落去好腥先係正嘢,因為佢食蝦食魚仔,食完隻手第二日都係腥。蒸嘅時候要將蟹反轉背嚟蒸,如果唔係啲膏會漏咗好多出嚟。」

撰文:林丹霞
攝影:郭永強
news@nextmedia.com

全站熱搜

tvb4life 發表在 痞客邦 留言(0) 人氣()