爆壹爆

壹傳媒愈打愈紅

Ads by Google

今個月頭,一班黑暗勢力,不斷派人堵塞壹傳媒大樓出入口,揚言要搞到《蘋果日報》運唔出市面發售。點知《蘋果》愈被打壓,反而愈多人買。


上個禮拜三凌晨,又有黑幫吹雞再搞壹傳媒,爆哥收到風,今次係由勝和落柯打手下做嘢。今次呢班古惑仔,唔再圍住壹傳媒大樓做騷,反而改變策略,拎出豉油淋落一疊疊報紙度,手段愈來愈小學雞。一招淋豉油,以為可以打殘《蘋果》,點知愈打愈紅,反而令《蘋果》變得特別搶手,唔少網民仲以搶到豉油版特別開心,認為特別有紀念價值。《蘋果》嗰邊有消息傳來,話有讀者來電,說要訂一百份染咗豉油嘅報紙。同時間,網民又再力撐,豪情十足咁話,「就算蘋果得張 A4紙照買」,上週五行去旺角報攤,檔主都話呢排蘋果和壹仔一出就好賣,真係吹佢唔脹。
佔鐘者想切割旺角
佔領旺角至今已一個月,中間發生過無數次流血衝突,暴力處處。爆哥收到內幕消息,話原來金鐘佔領區,曾有人不斷游說學聯同佔中三子與旺角切割,話旺角現場暴力事件頻生,會影響整個運動形象。
爆料者話雖然多人贊成將金鐘佔領區同旺角切割,但學聯同佔中三子基於道德責任,始終無答應成事。「學聯話唔可以冇義氣丟低旺角班人,認為班人係佢哋叫出嚟嘅,但其實好戇居,人哋根本唔當自己係你叫出來。」
爆料人仲話,其實學聯都有諗過接管番旺角主導權,也都主動出過旺角呼籲冷靜。但旺角嘅佔領者有一種特色,就係必須要展示出堅毅勇武,即係夠膽先會有人聽你講。「基本上得 Alex、 Lester同黃之鋒夠分量,但你要佢哋三個放棄金鐘,日日去旺角,留守旺角展示堅毅咩?又無可能㗎嘛,咁邊個留守金鐘去面對國際傳媒? The world is watching you(世界在看着你),佢哋責任係要用世界嘅力量,去令真普選成事。」結果旺角不能切割,但學聯也須攬上身。

打人總督察

水房坐館大孖婚宴

多年反黑講開「光明磊落,暗角打鑊」七魔警,當中職位最高係總督察黃祖成。出嚟跑黑社會新聞嘅記者都知,每逢黑幫紅白二事,好多時會見到黃 sir帶住 O記班手足到場,鎮住黑幫氣焰,佢係反黑老手。
好似今年年初水房坐館大孖結婚,水房一眾高層在場慶賀,但現場見到黃 sir出現,就變到學生見老師一樣,個個恭恭敬敬打招呼,當晚勝和坐館沙田 Me揸架林寶堅尼,被警察捉住吹波仔,佢大唱黎明經典金曲《對不起,我愛你》冧黃 sir同佢班伙記。當時黃 sir同過爆哥講,其實佢好 enjoy做警察,特別係夜晚突發 operation,佢會第一時間趕到現場。黃 sir係紅褲子出身,在警隊內跑過不同部門,爆哥聽聞黃 sir已經見 board,事業本可更上一層樓,但打人事件後,黃 sir已經被停職,佢下屬同爆哥講,佢係最有人情味阿頭,對下屬亦講道理。雖然同袍幫佢講盡好說話,但傳媒影到警察濫用私刑,有圖有真相,爆哥覺得打人嘅警察可以喺黑夜鎮到班古惑仔,但面對和平示威者係另一回事,打人只會影響自己和警隊形象。
爆哥乜料
金融界撈家,穿梭黑白政商界,朋友遍布旺角至中環,每星期都八到唔同料,同《壹》仔讀者過吓癮!

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()