獅子山上「我要真普選」直幡傲視香港廿四小時後,被忽然勤力嘅漁護署、消防處同飛行服務隊合力拆去。(曾春南攝)

八卦陣

靚仔蜘蛛 唔識攀山

Ads by Google

獅子山頂上星期掛出嘅「我要真普選」直幡,振奮無數港人人心。雖然廿四小時後政府部門收柯打速速將直幡拆走,但直幡上嘅訴求已非常堅實,從此每個港人心中都有座獅子山。


Andreas著起蜘蛛俠戰衣俾記者影相。

成就呢項創舉嘅蜘蛛仔團隊有勇有謀,已成為新世代嘅代表人物,人人讚不絕口。不過,由於唔準備被人拘捕,各人都冇打算將身份曝光。所有對外發言一律交由 Andreas處理,佢亦係率先喺網上對事件「承認責任」嘅成員。
過去幾日 Andreas以蜘蛛仔發言人身份接受咗好多報紙訪問,但集中講團隊問題,少談個人經歷,影相都要著住蜘蛛俠嘅戰衣。原來 Andreas本身愛好行山,但攀山其實唔係佢嗰瓣,游繩掛出直幡嘅責任落喺五名隊友身上。不過, Andreas係其中一個負責繩索安全嘅人,要留到最後所有攀山者都爬番上嚟先可以離開,所以落山時撞見差人都一額汗。據聞, Andreas身材高大、外形俊朗,係一個陽光型大男孩,平時最鍾意睇區家麟嘅作品。
反佔中簽名 發水效率差
佔領行動持續,維穩費無人嫌多,呢排愛字頭、內地大媽同古惑仔不斷出動搞搞震,沉寂一輪嘅周融為收復失地,上週六發起「還路於民」簽名運動,首日聲稱收到超過二十七萬個簽名,表面上「業績」比七月反佔中簽名好,但簽名增幅同今次額外動用人力物力比較,完全不成比例,究竟係有人 hea做,定係良心發現,唔好發水發得太過分?
今次活動首兩日聲稱累積收到六十五萬個簽名,其中街站首日有二十七萬八千個,比七月搞嗰次第一日多咗接近八萬,周融班友梗係搶住向西環領功。不過,心水清人士發現,上一次首日街站只有四百一十六個,但今次膨脹到九百零八個,推算平均值之後,上次每個街站收四百八十四個簽名,今次大縮水得番三百零六個,成本效率大跌。
唔單只實體簽名,上次出過事嘅網上簽名,今次依然係好兒戲,繼續可以用假名、虛構身份證號碼同電話成功簽署,有人用「戴耀廷」、「公民提名」、「梁振英下台」都成功簽名,甚至前 TVB主播黃大鈞上載「周融找數移民」成功簽名截圖,證明追周融找數都得。睇嚟簽名活動呢一招已經唔多掂,「找數融」係時候要搞新意思!

周融死撐簽名無發水,實情是發水效果差強人意。

「黃絲帶」又得、「公民提名」又得,連「戴耀廷」都得,「還路於民」簽名依然好兒戲。
李卓人勇救 Lester

面對 Lester一眾粉絲,李卓人(右二)企喺人群中幫手截龍,其後伺機以開會為由救走佢。(羅國輝攝)

回講到學聯秘書長周永康( Alex)深受少女粉絲愛戴,咁佢嘅親密戰友副秘書長岑敖暉( Lester)又有幾受歡迎?上星期五晚,記者路經添美道,見到大批市民聚集,以為又有藍絲帶挑機,不敢怠慢,點知跑到過去,原來只係市民排緊隊同 Lester合照。
記者眼見 Lester面露疲態,笑容都僵埋,睇怕都影咗一段長時間。粉絲們相當雀躍,一個接一個咁上前合照,年齡層仲非常廣闊,唔單只有少女,仲有少男、中女,叔叔、婆婆……受歡迎程度絕對拍得住晚晚落現場嘅歌手黃耀明同何韻詩。立法會議員李卓人仲喺人群中幫手截龍,最後亦由佢以開會為由,先至可以救走 Lester。學運領袖嘅魅力,真係唔講得笑!
新華社反佔中炮手燒鬚
新華社上週六發表署名英文文章,點名批評香港四大富豪獲習近平接見後仍未明確表態反佔中,連田北俊要求 689辭職都照寫,令政商界中人竊竊私語。不過,呢篇文章上載七小時即被刪除。政圈中有人認為撰文者唔熟悉香港情況,加上編輯無仔細審稿出事。真係信不信由你。
有人分析,文章上載後刪除,其實反映北京統戰部與宣傳部不協調;另一種講法係北京今次要向香港大孖沙施壓,為新一輪反佔中輿論戰做準備,所以都唔排除有人要食死貓,被人秋後算賬。
今次撰文嘅記者顏昊絕非省油的燈。呢位仁兄來港只有幾個月,已經官拜新華社香港分社採訪部主任。來港後佢不時以新華社及《亞太日報》記者身份撰寫多篇佔領區現場觀察及記者手記,包括反佔中者被圍毆、批評示威者對一般市民不尊重等,係反佔中炮手。

顏昊來港未夠半年,今次出事未知使唔使調回北京。

炮轟富豪文章上載七小時後被刪除,但已引起政商界關注北京是否要向大孖沙施壓。

centipede@nextmedia.com

全站熱搜

tvb4life 發表在 痞客邦 留言(0) 人氣()