仔仔現時仍未能試食全部瓜菜,好似這碗薯仔番茄 ABC粉,佢就把番茄全挑出來,不過方太話佢肯吃其他已經好叻叻。

家長日

偏食大作戰

Ads by Google

經常聽到港孩營養過剩或癡肥,其實香港都有班小朋友係偏食,佢哋唔食菜唔食肉,仲要食飯掛住睇電視玩 iPad走來走去。解決仔女偏食問題,做父母可能已出盡法寶都搞唔掂,唔使咁快氣餒。有註冊營養師和兒科醫生合力搞咗個改善偏食大行動,搵出小朋友偏食原因,並一對一提供針對性服務,務求糾正小朋友偏食的習慣。

 


方太仔仔今年 3歲,佢 1歲多開始偏食。方太話:「佢主要係唔食菜,逢青菜瓜類全部挑出嚟,就算切粒撈飯放入口,咬到唔對路都照吐。但食肉佢無問題,仲好鍾意食唔停口。」
飲菜湯當食菜
小朋友發育,最重要營養均衡,方太想盡辦法要仔仔吃菜。「試過不同的烹調方法,買好得意的兒童餐具放靚靚吸引佢,佢照樣唔理。後來把菜弄碎撈飯,佢成碗飯唔食。亦試過煮到好冧,佢都唔理。後來改煮瓜類、西芹、番茄,佢都係唔食。」
兒子向來體重偏輕,曾試過低於正常水平 10%。容易感冒,幾乎每月一次,一病兩、三星期才會好。好似訪問時,佢就不斷流鼻涕。
方太話:「佢好固執,我迫佢食佢愈唔食,最後發脾氣,大家都唔開心。經過半年,到最後我都放棄,只是偶然用青菜煲湯俾佢飲當食咗菜。」
仔仔的情況,方太都無特別想過搵營養師幫手,直至幾個月前,看電視知道有個 1對 1的營養師諮詢計劃,決定試試。「畢竟小朋友都要均衡營養。」方太說。
計劃為期 4個月,由營養師和兒科醫生先後跟方太和仔仔見面,了解仔仔偏食原因,並提供各類解決方法。
一齊煮引發食慾
方太回憶說:「最有趣係第一次見營養師,佢問我仔仔食唔食菜,我話唔食,點知仔仔即刻喺旁邊反駁話自己食,第二日仲真係食㖭。雖然分量唔多,但至今仍然保持住。原來外人講一句,就解決咗問題。」
仔仔開始肯食菜,營養師即教方太為他訂立進食時間表,改善其飲食習慣。「白天老人家湊,見仔仔想食就任佢食。營養師又教規定甚麼時候他才可進食。佢開始食菜但分量唔多,營養師教我哋逐少逐少加菜的分量。

方太偶然會跟仔仔一起煮,以提升佢進食的意欲。

親子烹飪班主要是讓家長從旁觀察孩子進食的習慣,多點了解他們。

吃自己親自包的三文治,小朋友吃得特別滋味。

現時方太在仔仔的餐單中,盡量多加蔬菜和水果。

每次見營養師前三天,方太都要把仔仔每餐吃過甚麼和分量記下來。

「此外,又有兒科醫生檢查過,幸好佢偏食無影響口腔肌肉及語言發展等問題。但營養師建議我哋唔好再剪碎啲菜給他吃;盡量整塊葉成條莖,鍛煉其咀嚼能力。」
在營養師眾多建議中,方太覺得跟仔仔一齊煮最能引發佢吃菜的意欲。「有次整壽司,我把紅蘿蔔、青菜切粒,溝埋沙律醬,叫佢用嚟包壽司。平時這些佢放入口就吐,但嗰次居然全部食晒,話係自己整的,呢招真係幾有效。
「仔仔依家仲唔肯食瓜類、番茄、西芹,但起碼肯食菜莖菜葉,對我來講已是最大的恩賜。」
Info


方太參加的是「一對一營養師諮詢計劃」,由香港幼兒教育及服務聯會及惠氏營養產品合辦,於 2010年推出至今,已服務超過 3,000位家長,當中不少兒童都有偏食問題。
服務以一對一形式進行。每個家庭會跟營養師見 3次面,評估小朋友的進食情況及提供飲食建議,及開辦烹飪班教導均衡煮食方法,亦有兒科醫生評估小朋友的行為發展。服務一般為期 4個月,費用全免,聯絡熱線 3563 5053。
專家意見
註冊營養師陳國賓和兒科專科醫生杜蘊瑜均在計劃中提供專業意見。

兒科專科醫生杜蘊瑜

杜醫生指:「會個別見每位小朋友,了解他們的偏食原因,並建議家長如何糾正。更會視乎情況轉介至語言治療師、職業治療師等,作進一步跟進。」
杜醫生更指,一般 1至 2歲的小朋友開始進食固體食物,家長便要留意他們有否偏食問題。而小朋友的適當進食時間為 30至 45分鐘內完成。

註冊營養師陳國賓

陳國賓則認為,很多時孩子偏食,都與家長的錯誤觀念有關,會加強家長的教育。「如孩子有飢餓感是正常,亦唔代表餓,身體的蛋白質、醣分和脂肪酸無晒,所以唔好不停讓孩子進食,以免影響正餐。
「家長亦唔一定要天天整不同的食物,或把食物弄得很精緻。其實同一款食物,好似炸魚柳,今天沾沙律醬吃,明天沾茄汁吃,已有不同變化。甚至同是青瓜,今天刨絲炒肉片,明天刨片包紅蘿蔔,已可令孩子主動進食。」
何謂偏食?


只要小朋友在五穀、蔬菜、水果、魚/肉及奶中(見表),有一項或以上的類別攝取過多或過少,都算是偏食。

撰文:馮淑玲
攝影:劉玉梅
錄影:蔡政峰

全站熱搜

tvb4life 發表在 痞客邦 留言(0) 人氣()