Cafe有四十個座位,不設訂座。

飲食特務 B 

Kumamoto Cafe 地址︰觀塘道 418號 apm LG一田 電話︰ 2803 9188

熊本熊樣熊本菜 

Ads by Google

熊本縣自從設計隻大黑熊 KUMAMON做吉祥物,呢位營業部長四圍去,推廣熊本縣,大小朋友都被吸引,策略非常成功!早前有 cafe推出 KUMAMON食物,今次終於開第一間熊本熊官方 cafe,由門口的七呎高廚師熊、坐卡位伴食的毛毛熊、牆上熊海報、電視播着熊跳舞,在店內根本被主角 KUMAMON包圍。 Cafe暫定只營業半年至九個月,遲啲去就冇, fans們預備鬥快排隊啦!


作為全球首間 Kumamoto Cafe,由日本食店 Izumi Curry合作經營,除了招牌咖喱飯之外,仲有炸雞、炸蝦、漢堡等熱食主菜,甜品有班戟、朱古力蛋糕、奶凍等,有熊樣的菜式共十多款,選擇算多。另有沙律、煎餅、炒飯、焗飯等洋風料理,雖然冇砌到熊樣,但碗碟杯總有 KUMAMON嘜頭,連餐墊都有幾款不同造型,夠仔細。 KUMAMON既然叫得做營業部長,並唔係齋賣樣, cafe選用熊本縣直送的食材,包括米、雞蛋、豬扒、車厘茄、番薯、士多啤梨、牛奶,俾大家試真啲熊本出產。炮製亦有心思,漢堡扒以牛肉豬肉加豬腩打成,質感油潤,太陽蛋煎至脆皮底,甜品的紅豆醬也是自家炮製,唔係得個樣㗎。
嚟得幫襯,最重要都係影相,記得留意餐墊上的 QR Code,下載 app,有多款相框同貼紙可以裝飾相片,攬住毛毛公仔自拍完,可以加番個靚相框先 po上網。而 cafe旁邊的精品店,獲得官方認證,日本最新出的 KUMAMON精品,立即由日本直送到港,現有近百款精品,文具、擺設、日用品、食材乜都有,單單是毛公仔都有好幾個 size,花多眼亂,要揀都幾頭痛。遲些還有 KUMAMON SQUARE,展示各大品牌 crossover的限量精品,例如 Baccarat水晶熊、德國 Steiff毛公仔, BE@RBRICK等等, fans應該要去多次喇。

廚師造型是全場最大的 KUMAMON,場內還有多個毛公仔可供合照。

奄列吉列豬扒咖喱飯$148
Izumi一向以咖喱為主打, KUMAMON咖喱略有不同,帶點辣,頗開胃。

太陽蛋炸雞肉飯$138( 11:30am後供應)
炸雞伴以自家調製的日式甜醬,薯仔沙律有火腿青瓜等配料,水準不錯。套餐可配湯或飲品,另加奶凍或紅豆白玉。

草莓朱古力蛋糕配迷你軟滑雪糕$69
蛋糕質感似較實淨的海綿蛋糕,有可可香而不太甜。

杏仁蛋糕配迷你軟滑雪糕$59
原隻熊造型只有牛奶蛋糕或杏仁蛋糕, size大過手掌,配意式泡沫咖啡加$25。

獲官方認證的精品店,地方不大,但種類多,雨傘$119。

 

Kumamoto Cafe
地址︰觀塘道 418號 apm LG一田
電話︰ 2803 9188
營業時間: 10am-11pm

撰文:黎狄敏
攝影:胡春輝

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()