爆壹爆

中石化怕人製燃燒彈

Ads by Google

爆哥一向政治中立,所以對今次佔中運動,都好少同朋友討論,免得有傷和氣,但政治嘅嘢,你唔理佢,佢都會搵上門,唔到爆哥唔關心。


想買電油等佔完中先啦。

好似爆哥開車房嘅友人阿華,佢不嬲去開九龍灣宏展街嘅中石化油站買散裝樽裝電油,但九月尾佔中運動開始,中石化所有油站便停賣散裝電油,據油站員工透露,係總公司怕有示威及佔中人士買電油自製汽油彈,所以停售散裝電油,至於幾時恢復有得賣,油站員工打趣話,咁要等佔中運動完咗之後。
阿華唯有行多兩步,去中石化旁嘅外資油站買貴啲嘅散裝電油,阿華仲幽默咁講, 689可能講得啱,佔中有外國勢力介入,所以外資油站照賣散裝電油,實行賺到盡。
阿華當然係講笑啦,佢話中石化根本係杞人憂天,若有佔中人士要整汽油彈,買火水或天拿水都可以啦,又或者由汽車油缸抽番電油出嚟,總之中石化過度緊張。
差佬打人真係傻


佔中運動至今,暫時未見贏家出現,反而大家都做咗輸家,輸得最慘係差人,被狼英擺上枱,佔中者鬧黑警,反佔中又鬧唔做嘢,專業形象一鋪清袋。爆哥都有唔少警察朋友,對佢哋呢排面對嘅壓力非常同情,雖然話被人淋不明液體好侮辱,但行私刑打被捕示威者就更蠢,伙記都講,呢一頓拳腳真係貴,分分鐘賠上七個警察事業和長俸,七個家庭都要面臨冇飯開。
警察朋友傾開呢單嘢,佢哋睇法都有唔同,因佢哋日常面對古惑仔及窮凶極惡嘅犯人,若果真係要做到斯文有禮,係無可能治到惡人,可能因此關係,有部分差人在工作期間對使用武力已成習慣。通常疑犯被帶上警車後,在警車內被人「開波」就最常見,因為一句話你反抗襲警,就打到你豬頭都無證據。當返至警署時,更不在話下,可以一路叫襲警一路開你波。依家七名打人便裝警員咁公然喺街郁手「出咗事」,警界內有人嘆氣,又有人發起募捐行動去幫助呢七名同事及其家庭,今次仲規定捐款要一千蚊或以上,因除官司費用外,七個家庭可能將失去宿舍、房屋津貼、子女留學津貼、退休金及每月長俸等一大筆福利金,捐款可能成為七名警員日後的安家費。又有人話,打份工啫,咁勞氣為乜。
百花蛇官仔骨骨上台頒獎

百花蛇(右)積極從商,退出江湖。(電視畫面)

百花蛇近年積極拓展飲食業王國,除咗經營百樂門酒樓同恒香餅家,爆哥聽講佢睇好茶餐廳業務,最近佢喺元朗開茶餐廳,遲啲可能開分店添。之不過爆哥最估佢唔到係百花蛇上電視,同鮑魚「一哥」楊貫一出席業界頒獎典禮,睇嚟百花蛇真係好想做香港嘅飲食天王。不過爆哥見佢上台有啲緊張,可能唔慣對住鏡頭啦。
百花蛇雖然差唔多六十五歲,但佢依然滿腦子生意大計,佢生意拍檔同爆哥講,百花蛇每朝早指定要做一項運動:睇樓兼睇鋪,百花蛇會走遍全港各大商廈同地鋪,希望撈底執平貨,佢仲會直接同業主「講數」,一開頭當然唔會表露身份,只係話老闆派嚟嘅「員工仔」,乘機同業主討價還價。百花蛇咁精明眼,加上財來自有方,身家至少過廿億。難怪不少江湖人士視他為偶像,希望好似佢咁有錢啦!
爆哥乜料
金融界撈家,穿梭黑白政商界,朋友遍布旺角至中環,每星期都八到唔同料,同《壹》仔讀者過吓癮!

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()