10月 13日 午夜
到壹傳媒大樓行行企企,睇「十月圍蘋」。(郭永強攝)

八卦陣

紅底肥佬 大媽首領 反完佔中圍蘋果

Ads by Google

維穩費長派長有,佔領行動啟動,金鐘、銅鑼灣、旺角都需要大量臨時演員扮反佔領人士,上星期仲要開多一壇圍堵《蘋果日報》,雞頭要搵到足夠臨記真係頭都大埋。不過,記者發現亂世中唔少人仍能頻頻接 job,包括「紅底肥佬」同「大媽首領」。

 

紅底肥佬其實係本刊兩年前揭發大搞撐國教集會嘅李炏烜(音:海喧)。上週一晚十一點幾,佢同一男一女嚟到壹傳媒大樓,三個人坐喺欄杆,記者上前問攞住攝錄機嘅同行中男嚟做乜,佢話係網絡記者,問佢媒體叫咩名即刻唔肯講。查實呢位中男叫 Morris Cheung,都係中港青年文化聯合會成員,紅底肥佬做主席,名譽會長係陳勇同洪為民,「紅」到極。肥瘦雙佬特意喺官方 facebook上載當晚圍堵照片,並寫上「蘋果日報應有此報」、「圍堵蘋果日報進行中」等,話俾老細聽佢哋有做嘢。
轉個頭,週日晚喺維園舉行嘅反佔中集會,記者又見到紅底肥佬喺大台附近行行企企,另一邊廂就見到熟口熟面嘅大媽首領愛港之聲副主席 Jessica陳波儀同「保衞香港運動」發起人傅振中密斟。大媽首領曝光頻頻,上週一圍堵壹傳媒大樓時,不斷向派發禁制令嘅律師咆哮,又叫其他臨記大媽「唔好接呀,掉番俾佢啦」。
到咗週四,大媽首領又現身金鐘,自稱市民自發抗議李卓人反中亂港。網絡媒體 SOC REC喺 facebook指大媽首領叫口號時,大叫「辭職下台」,圍觀市民即時叫「梁振英」。首領再嗌「可恥」,市民即接口「梁振英」,變成鬧劇。大媽首領被人玩番轉頭,套用 CY金句:反佔中已經失控。

10月 13日 午夜
黃衫加迷彩褲,如果去金鐘,會誤以為佢係佔中支持者。(何少忠攝)

10月 16日 下午
到金鐘聲討李卓人,叫口號時被現場群眾玩番轉頭。

10月 19日 晚上
去維園冇做首領,跟傅振中咬耳仔。

10月 19日 晚上
去維園反佔中集會做旁觀者。(莫智謙攝)

李[!90A6]烜兩年前搞撐國教活動。(王偉洪攝)
女粉絲排隊見周永康

左手拎住女 fans送嚟嘅杏仁糊,右手幫女 fans簽名,一睇就知 Alex幾受歡迎。(郭永強攝)

學聯秘書長周永康( Alex)同副秘書長岑敖暉( Lester)嘅「 gay情」繼續備受關注, facebook專頁「捍衞 Lester Alex佔領巫山 HeHe團」讚好人數高達兩萬,但千祈唔好以為呢段男男「緋聞」嚇得走一班女粉絲。
上星期五晚, Alex喺雨傘廣場主台下接受傳媒訪問。一名身穿校服、心口掛上黃絲帶嘅中學女生喺隔籬情深款款咁望住 Alex,一見佢做完訪問,即刻向佢送上自製心意卡同埋一袋暖笠笠嘅杏仁糊,當然唔少得拎簽名同埋影合照啦!只見 Alex笑得靦覥,但依然禮貌地同粉絲傾兩句先走人。
所謂一而再,再而三,當 Alex轉身諗住離開,又有三名少女拎住由佢做封面嘅《黑紙》行埋嚟。 Alex見狀,再次面露尷尬神色,但依舊來者不拒,繼續簽名、影相。 Alex咁受歡迎,唔知女朋友同 Lester會唔會呷醋呢?
許 Sir大勝許曉暉
自佔領行動開始以來,政府每日都開兩次記者會,旨在批評佔領人士,包括最為人熟悉嘅「四點鐘許 Sir」,同埋由民政事務局副局長許曉暉主持嘅跨部門記者會。不過大家都知道人氣最高嘅一定係許 Sir啦,到場記者嘅數目已經反映出嚟,每日都起碼有十幾個記者去搵許 Sir,差唔多坐足一個鐘先走。
相反,跨部門記者會由最初十月二號有七個部門出席,去到尾段得番三個,有行家話曾經有一日一個文字記者都無。我哋上星期五去咗睇吓,當日朝早旺角清完場,但都係得四個文字記者,記者會歷時十二分鐘,最後許曉暉仲宣布呢個舉辦咗十六日嘅記者會「腰斬」。
以網絡嘅受歡迎程度比較,「四點鐘許 Sir」嘅 facebook專頁,短短一個星期已經有超過五萬個 like,「曉暉與你」開咗個幾星期都只係得一千個 like。不過提提大家,「四點鐘許 Sir」原本嘅 facebook專頁,已經因為曾健超俾警察打而決定摺埋,依家嗰個變咗由五毛開㗎,唔好俾佢呃 like。

「四點鐘許 Sir」每日起碼吸引到十幾個記者、十幾部 cam嚟搵佢,差唔多講夠一個鐘先走,不過「曉暉與你」就差好遠,成個記者會得十分鐘多啲。(羅國輝攝)

 

長毛愛上陳淨心

劇中嘅長毛會愛上淨心 BB,但係現實中,梁振英落台嘅機會應該仲大啲!

TVB除咗新聞部員工聯署「起義」,同埋《東張西望》主持「明撐」佔領之外,星期一晚劇集又有話題之作,三十集嘅《老表》第二輯秉承上一輯嘅特點,將香港現實社會元素加入劇中。就連角色造型都有參照現實嘅政治人物,郭晉安同萬綺雯嘅角色分別係扮長毛同淨心 BB,安仔仲以抗爭作為使命。舊年開始寫劇本之前,編審團隊曾經去過淨心 BB出席嘅論壇,感受吓氣氛添!
呢啲大家都可能知,不過有消息就話朱咪咪飾演嘅議員角色,藍本係「元秋」蔣麗芸同葉劉嘅混合體。再爆啲嘅就係,長毛最尾會愛上淨心 BB,真係諗起都恐怖!

centipede@nextmedia.com

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()