姊弟戀開花
蝦頭和 6呎嫩男友日前深夜拍拖到土瓜灣火鍋店撐枱腳。二人年齡雖然相差整整十二個生肖,但外形頗合襯。

娛樂喧
狼嗒 26歲六呎男  38歲蝦頭:我愛花𡃁

Ads by Google

大台人才走了一個又一個,要靠外援幫拖,造就扮嘢耍家的蝦頭(楊詩敏),成功上位。今年 38歲的蝦頭,咪以為「硬件」唔夠省鏡冇人吼,實情爛玩豪爽性格多年來吸引唔少雄性動物,「 ex名單」水蛇春咁長。
本刊發現她十分識食,去年搭上比她細 12年、身高六呎的金融公司助理副總裁陸啟聰( Edwin),更去到見家長階段。
日前記者目睹二人在土瓜灣街坊火鍋店撐枱腳,其間蝦頭不時嘴嘟嘟撒嬌引男友,而男方細心為佢抹汗,細聲講大聲笑非常合拍。事後蝦頭回應時雖然聲稱對方只是好友,卻無意間自爆:「我呢個年齡最鍾意花𡃁㗎,我同佢好夾,家長都見晒。」姊弟戀有望開花喎!

蝦頭與舞台好拍檔泰臣(翟凱泰)都是由詹瑞文一手捧紅,其後二人自立門户合作演出多個「重口味」搞笑劇,要幾鹹有幾鹹,大獲好評。故外界一直以為二人是拖友關係,但原來純屬美麗誤會。


蝦頭與 Edwin志趣相投,二人喜歡劈酒,打邊爐期間隊了多杯啤酒。

嘟嘴賣萌
蝦頭和男友 Edwin在火鍋店內逗留至半夜,其間旁若無人細聲講大聲笑。蝦頭食蝦時,更嘟嘴賣萌在男友面前撒嬌,男友亦識做地拎起手機為她拍照。

輕撥劉海
雖然比女友細 12歲,但當晚 Edwin卻反過來全程照顧蝦頭,用紙巾幫女友抹汗再撥女友秀髮,而蝦頭對男友溫柔舉動亦顯得十分受落。
執銀包邂逅
蝦頭雖然年屆 38,加上水桶身形,唔少人以為佢係賣剩蔗,查實憑住豪邁爽朗性格,蝦頭歷年獵仔無數。早年她曾在訪問中透露:「唔同嘅對手先會帶嚟唔同嘅衝擊。」實戰經驗豐富。
據知她去年 8月與拍拖一年的中學教師男友分手後,隨即投入另一段戀情,而新歡卻是僅得 26歲、任職金融集團助理副總裁的 Edwin(陸啟聰)。

演藝學院修讀導演系和戲劇系的蝦頭,畢業後跟恩師詹瑞文搵食,近年開始作個人發展。早前拍住男神黃子華拍電視劇,漸為人熟識。
細心抹嘴
早前本刊發現蝦頭偕 Edwin到土瓜灣一平民火鍋店撐枱腳打邊爐,戴帽的蝦頭不避嫌面向街外坐。二人點了成枱食物,其間 Edwin不時夾餸俾女友。當蝦頭心血來潮拿起大蝦欲自拍, Edwin即醒水主動揸機,更細心為女友整理劉海,又幫女友抹嘴,癡纏得過分。二人盡興至舖頭打烊先捨得走。
「其實蝦頭同 Edwin認識得好戲劇性,早兩年 Edwin喺街執到蝦頭個銀包,咪打電話相約交還,劇情之後點發展大家都預計到。不過嗰時蝦頭有拖拍緊, Edwin又啱啱畢業冇耐,所以佢哋一直 keep住 best friend關係。蝦頭同中學阿 sir散咗後,就自自然然同 Edwin一齊咗!」知情人透露。

刻意扮 young
與男友仔拍拖,原本肥嘟嘟、打扮師奶的蝦頭,試過戴上大眼仔梳齊陰頭扮 young,藉此拉近和 Edwin距離。

MV奉旨拍拖
早前蝦頭拍了一個 MV放上微博,便情商男友客串演出,奉旨拍拖。
蝦頭:見過佢媽咪啦

扮嘢耍家
蝦頭近年憑扮鬼扮馬,扮嗰個似嗰個,令她成功入屋。早前在扮嘢節目扮王菀之和麥玲玲,令人捧腹大笑。

除了前度男友國籍猶如聯合國外,蝦頭早前更透露《新紮師妹》編劇火火也曾跟她有過一段情,「中、日、韓、泰嘅男友都交過;有做廚師、銀行家、大學教授、街頭賣藝嘅都有;有大過我 10年,又有細過我 10年,所以年齡絕對冇問題。」
蝦頭講起一眾前度毫無顧忌,但對與 Edwin剛萌芽的姊弟戀相當保護。周一( 6日),記者致電她求證拍拖一事,她一味強調「我哋係 best friend」,但不久又忍唔住大讚男友,並透露 Edwin正在身旁:「我同佢好夾,佢雖然年紀細過我,但我哋以兄妹相稱。佢好識照顧人,我哋相處好好。(你哋見晒家長?)係呀,有乜問題?佢同我父母去過旅行,我又成日同佢媽咪飲茶。(咁你哋約會通常去邊?)多數食嘢,因為佢知我鍾意食嘢!仲有飲吓酒、掟吓鏢咁,都係呢啲!(唔介意對方細過你?)我呢個年紀最鍾意花𡃁㗎啦!」當記者再追問二人關係時,蝦頭卻忽然緊張地說:「我同佢冇嘢㗎,好朋友嚟㗎咋!」表現飄忽。
至於 Edwin則在電話中大方表示:「大過我冇問題,最重要溝通到。(見到你同蝦頭抹嘴!)我好鍾意照顧人,好鍾意照顧佢,同佢抹嘴好似幫緊自己抹嘴咁!」嘩!使唔使肉麻到咁!
花𡃁有才
蝦頭男友 Edwin畢業於科技專上學院商業系,自小便嚮往娛樂圈,經常參加各類型的歌唱比賽。 10年仍是學生的他參加過校草選舉,其後入行當兼職模特兒,拍過多個硬照廣告,演出經驗絕不遜於女友。而他正職是金融業, 11年大專畢業後, Edwin加入金融集團任助理副總裁,但間中亦有客串亮相電影和 MV。

金融才俊
外形不俗的 Edwin,在微博透露現時任職新鴻基金融集團助理副總裁,專幫客戶投資。


發歌星夢
一直熱愛唱歌的 Edwin,每逢以合唱歌參加歌唱比賽, partner一定係蝦頭。

客串電影
偶有參與幕前演出的 Edwin,早前於古天樂、高圓圓主演的《高海拔之戀 II》客串。

撰文:娛樂組
攝影:攝影組

    全站熱搜

    tvb4life 發表在 痞客邦 留言(0) 人氣()