創業通

即報名即畀錢 活動課程 app

Ads by Google

受到電影《社交網絡》啟發, Karl認為發展網絡及手機程式是大勢所趨,便拉攏 4位朋友合作,創立香港首個可即時報名的活動平台—— Bookclass,正式推出約 2個月已收支平衝,最近更成功申請科技園的網動科技創業培育計劃,拿得 30萬資金資助,希望藉此發展,成為一個體驗活動集中營。

 


左起: Roy、 Jay、 Alan及 Karl均認為手機程式是大趨勢,故將來會集中火力發展 Bookclass。 

Bookclass是一個搜集香港興趣班及體驗課程的網站和手機 app,可讓人即時報讀課程,十分方便! Bookclass是由 5名 80後成立的 IT公司 Techlabs HK Limited所推出,老闆之一的 Karl說:「用戶 download咗 Bookclass後,可以喺 app直接點入有興趣嘅活動,即時睇到邊日有位,用信用卡報名就 ok。」
現時 Bookclass搜羅了過百個不同的體驗活動資訊,包括 bubble soccer、直升機體驗、 D.I.Y.眼鏡、溪降、釀造紅酒及飛索等,網站每月的瀏覽人數超過 2萬 5千人, app亦已有過千人下載,「 android版喺 9月啱啱上架, IOS大約會喺 11月上架。」
Karl本是一名理財顧問,但一直懷有創業的念頭,「 3年前睇完電影《社交網絡》,畀啲情節激發,於是搵朋友 Roy商量,大家都覺得網站或者手機 app有市場,自己嘅小學學弟 Jay識寫 app,就拉埋 Jay同佢朋友 Webster加入,開始創業大計。」

台灣體驗

最初他們只是兼職參與,架設了以介紹旅遊資訊的網站 Maga Travel,但沒人瀏覽而失敗告終。「 Maga Travel失敗後,喺 13年頭,我哋轉而研發一個可以畀朋友間約地方聚會嘅平台 showup.la,同時寫咗個 proposal去參加亞洲創業競賽,嗰次喺台灣舉行,得 13隊入到決賽,估唔到入選咗,覺得好鼓舞,我哋仲辭職去台灣睇吓有冇進一步嘅發展機會。」
13年 6月,他們飛往台灣,當地的體驗,讓他們十大開眼界,「雖然我哋拎唔到獎,但其中一個評審推薦咗我哋加入創業培育計劃 AppWorks,佢哋專幫新創業者完善創業計劃,入到去學到唔少網上宣傳技巧,同埋知道發展 app會遇到嘅問題,包括改變人嘅慣性、點樣增加活躍用戶等,令我哋發現 showup.la會面對好多困難,要諗吓其他發展方向。」

即時付款

網上平台是發展趨勢, Karl認為普遍商戶沒有專業的程式編寫能力,這是一個商機,「 Roy嘅太太鍾意去報烹飪班,諗到一般舉辦興趣班及體驗活動嘅機構,都會有網頁或者 facebook專頁,但有能力整到即時網上付款報名嘅唔多。另一方面,消費者搵到課程時又要另外打電話去約時間,好費時失事,點解唔可以整個平台,等人可以快啲搵到個活動,同時又即時報埋名?」
找到方向後,他們決定回港發展,並找上 Jay的同事 Alan加入,因應各人的才能,各自負責不同的崗位, Karl和 Roy負責 marketing,而 Jay、 Alan及 Webster則負責開發程式, Karl說︰「我哋冇資金去請設計師,美觀度係我哋嘅弱項,開頭好多人都話個網站好簡陋,惟有參考唔同嘅國外網站,不斷作出優化。」

即睇 book活動流程

 


下載 Bookclass手機 app後,可分類查看不同活動。 

點入有興趣的活動,閱讀活動介紹。 

揀啱活動或課程後,即時在 app內選取適合的日子和時段。 

核實有關活動內容無誤後,便可以信用咭付款。 

客戶  Nick

當初 Karl向我哋介紹 Bookclass,覺得係一個幾好嘅宣傳方法,我哋合作咗 2個月,宣傳直升機維港遊嘅活動,效果都唔錯。

畀次機會

在 3月中,他們架構了 Bookclass網站,雖然概念吸引,但作為新公司首先就面對難以找到客戶的問題,「開頭我哋免費畀商戶試成效,喺網上搵資料,逐間商戶上門去問,但佢哋唔知我哋係乜水,好多都係答:『諗吓先,遲啲覆你』,聽到呢句已經知冇下文。覺得咁落去唔掂,即場講自己個面對嘅困難,求佢哋畀次機會,咁先搵到多啲商戶合作。」
Karl表示競爭對手是團購網站,「我哋會幫每個加入 Bookclass嘅活動撰寫文字內容,仲會派攝影師去現場拍照及錄製試玩片段,當有人報名,我哋先會收番商戶每位報名費嘅 20%做費用,相比團購要收 40%至 50%,會吸引到報名費較高嘅興趣班商戶。」
現時在活動上, Karl表示會作出篩選,讓消費者可以找到較高質素的課程,「起初我哋冇咩知名度,咩興趣班都會搵,但慢慢多咗人識,就想提供高質素嘅班畀消費者玩,好似釀造紅酒班、溪降、直升機體驗等。喺合作前,我哋都會先體驗同了解,再介紹畀人。」


Bubble Soccer 

直升機遊維港Bookclass搜羅了最新的活動,讓消費者有多一點選擇。 

蛋糕班

D.I.Y.眼鏡班 

射箭班 

風箏滑水

增信任度

今年 8月,他們成功申請科技園的「網動科技創業培育計劃」( Incu-App),獲得 30萬元資助及以優惠價租用園內的辦公室, Karl說:「除資助外,園內提供到唔同手機畀我哋測試個 app,成本降低好多;另外加強咗公司嘅企業信任度,之前同啲大型少少嘅課程舉辦者傾合作,唔會有回音,但𠵱家同佢哋講我哋係科技園內嘅公司,真係多咗反應。」
對於將來發展, Karl希望 Bookclass可以成為大家玩樂消閒時都會想起的名字,「希望同更多新奇有趣嘅體驗班合作,好似嚟緊秋天搵到 D.I.Y.臘腸班畀客人參加。目前會做多啲宣傳,令更多人認識到 Bookclass。」


13年 6月,他們遠赴台灣,與當地不同的創業團隊交流,擴闊不少眼界。 

Karl自言網頁及 app的美觀度是他們的弱項,「𠵱家不斷改進,比之前靚咗好多。」 

開業成本

租金( home office)︰$0
租用伺服器︰$6,000
宣傳︰$7,200
雜費︰$1,800
總投資︰$15,000

每月收支

租金(首兩個座位免費)︰$0
人工( 5名老闆)︰$30,000
雜費︰$25,000
營業額︰$60,000
盈利︰$5,000

網址︰ bookclass.net

點申請科學園資助?


Alan(左)和 Jay負責編寫程式,現得到科學園資助,主要由 2人留守在園內工作,每天最少用 6至 8小時進行更新及優化網頁及 app。 

網動科技創業培育計劃( Incu-App)是一項 18個月的創業培育計劃,如從事互聯網的應用程式、智能手機的應用程式、電子遊戲等科技領域的新公司便可申請,呈交申請時,公司成立不能超過兩年。在培育期間,公司可獲港幣 30萬津貼資助,以補助公司於業務及技術發展的開支,亦可於園內的 Incu-App中心以優惠價租用開放式辦公室,並得到一些技術支援。
網址: http://www.hkstp.org 


撰文:曾志恒
攝影:傅新發、葉偉豪
部分圖片由被訪者提供

全站熱搜

tvb4life 發表在 痞客邦 留言(0) 人氣()