新車激試

你呃人!  BMW 225iA Active Tourer

Ads by Google

當 BMW公佈會為 2系增添新成員時,筆者以為會遵循 2系特色係雙門小跑,點知原來係名為「 Active Tourer」嘅全新車種!睇佢外表肥嘟嘟,就知佢好似 M-Benz B-Class咁唔會好飛得,而且更爆係 Active Tourer採用前輪驅動!同以往強調尾驅嘅 BMW好唔同,其實冇咩期望。點知筆者試過車後,都忍唔住扮唐唐鬧爆狼振英咁:「你呃人!」因為代理安排咗部 225iA Active Tourer試車, 231匹配前驅好飛到暈!外表與行車表現唔相符!

 

一直以來尾驅就好似係 BMW嘅代名詞,啲人成日話 BMW啲車好好揸、又靈活又好玩,都係因為尾驅。不過前驅嘅優點係生產成本平、結構簡單、車廂空間大,呢啲都係尾驅比唔上嘅。冇前驅車,令到 BMW喺細車市場舉步維艱, M-Benz A、 B-Class,甚至 Audi A1及 A3都空前成功, BMW終忍唔到手,搞出 2系 Active Tourer。


225/45R18前胎配搭適宜,唔會影響轉彎靈活性,相信用 17吋會冇咁穩定。 

小尾翼內置 LED剎車燈,亮度比一般燈泡更高。 

扮豬食老虎格

2系 Active Tourer擺到明就係向 M-Benz B-Class挑機,而且因為要做到車廂空間闊落,外表都搞到似發水麵包一樣,冇晒以往 BMW出品嘅瀟灑感覺,現時車身比 B-Class短 17mm、闊 14mm、高 29mm,可見兩者體積非常接近,但 2系 Active Tourer軸距只有 2,670mm,比 B-Class短 29mm。其實要講出 2系 Active Tourer車身特點都幾難,因為筆者覺車身冇乜搶眼位,筆者唔會懷疑設計師功力,反而覺得係刻意低調,扮下傻仔先,試完車後就知邊個係傻仔。


老老實實, 225iA Active Tourer嘅外表都算係近年最冇驚喜嘅 BMW。 

225iA Active Tourer車長 4,342mm,只比 M-Benz短 17mm, size非常接近。 

其實 225iA Active Tourer用上雙出尾喉,洩露佢扮低調、隱藏實力。

肯定同級最勁

225iA Active Tourer嘅直接對手只得 M-Benz B-Class一個,由外表以至車廂都對着幹。不過其實要細車身、大空間,又唔只呢 2款,剛剛喺歐洲出、預料下年頭到港嘅 VW Golf Variant都係唔錯選擇。

變種始祖  M-Benz B-Class

其實類似 225iA Active Tourer嘅歐洲 RV一直都有,不過大多係平價車,第一款由高級車廠做出嚟嘅 RV,絕對係 05年已推出嘅 M-Benz B-Class。 B-Class嚟自 A-Class,車身就好似吹脹一樣,外表似 225iA Active Tourer,但性能表現就柔好多。就算最強 B250都只係 211匹馬力,懸掛亦以舒適為重。車價$404,000起

即將到港  VW Golf Variant

其實第 5代 VW Golf喺香港都推出過一款同 225iA Active Tourer類似嘅 Golf Plus,不過到第 6代冇再引入,反而旅行車 Golf Variant初次到港即有好好反應。第 7代 Golf Variant喺今年中已經喺歐洲推出,預料明年初到港,如車價保持$240,000左右價位,要大紅唔難。

實用過旅行車

好多人都會諗:「 BMW喺邊度搞個前驅底盤返嚟?」其實 BMW一早搞緊前驅, MINI嘛!冇錯! 2系 Active Tourer整個底盤至引擎都來自 MINI,但 MINI強調 compact, 2系 Active Tourer就唔同,車廂放大到比 3系 Touring更大!後座背部獨立分 3件向前摺疊,而且坐墊都可以前後滑動,比任何一款 Touring都要靈活。尾廂方面,正常情況下有 468L容量,但只要撳一按式摺座位掣,即貫通車廂及尾廂,得出 1,510L驚人容量,實用性強橫。此外, 225iA版本設有自動感應開關尾門,只要單腳喺車尾底掃一掃,即可開關尾門,方便攞到成手嘢上車嘅人用。


尾廂門首次加入自動開關功能,只需袋住車匙行近尾門,再用腳喺車底掃一掃就可開關。 

後座其實可以 4:2:4分開摺,方便中間位放置滑浪板等長物件。 

後座向前摺疊後,尾廂空間高達 1,510L,真係乜嘢戶外活動用品都放得落。

後座地台有冷氣出風口,啱晒大熱天時走上車即時消暑。 

後座腳位、頭頂都有充足空間,再加上天窗大到去後座頂,視野極之開揚。此外,座墊都可以 6:4分割前後移動, 3系都冇咁好用。 

豪版前座有電動調校及記憶功能,如果冇電動,椅背仲可以向前摺平。

巨形天窗前半截可以完全趟開,唔用時又有布料遮光。 

全新設計駕駛艙,同 2系 Coupe唔同款。 

BMW 225iA Active Tourer Spec.

引擎: 1,998c.c.直四 turbo
馬力: 231hp/4,750-6,000rpm
扭力: 35.7kgm/1,250rpm
傳動: 8前速自動、附+/-系統
懸掛:前麥花臣支柱、後多連桿
制動:前、後透氣碟
車身: 4,342× 1,800× 1,586( mm)
車重: 1,505kg
0-100km/h: 6.6秒
耗油: 5.8L/ 100km
車價:$457,900
查詢: BMW Concessionaires
(HK) Ltd.( 3129 9000)


意想不到地快

BMW即係 BMW!「好玩」基本上就已說明所有 BMW產品,筆者以為前驅 2系 Active Tourer會係一個例外,但都被佢扮傻外表呃咗!由於引擎同底盤都來自 MINI,所以 Go-Kart感覺都幾濃烈,行車時車身動感唔似得 M-Benz B-Class咁柔,懸掛 Sporty得多,而且入彎時車頭指向好 sharp,軚反應快,有 3系風範。
此外,第一次出現喺 BMW上嘅前驅橫置引擎都係嚟自 MINI, 225iA版採用 2.0公升 turbo引擎,即係 MINI Cooper S同一副,不過馬力由 192匹提升到 231匹!扭力有 35.7kgm!仲勁過 Golf GTI!雖然車重比 GTI多 154kg,但每次出彎加速仍然可以感到車頭扯住出去,性能完全 K.O. M-Benz B250。而且打開窗行車,可清楚聽到引擎吸氣及 turbo放氣 valve聲,一樣提供到揸 Hot Hatch嘅快感。


引擎雖然來自 MINI Cooper S,但馬力上調到 231匹!加速力唔係講笑。 

新款波棍可以容許喺波棍上操作+/-系統,方便過軚波棍。 

設有自動停車熄匙系統,令耗油量低至 5.8L/100km。 

中控台最下方有行車模式調節,分別有 SPORT、 NORMAL及 ECO PRO,冇咗 SPORT PLUS選擇。 

撰文:袁國基
攝影:葉偉豪

    全站熱搜

    tvb4life 發表在 痞客邦 留言(0) 人氣()