孫太和囡囡 Hilary都話,把一塊 2D樹葉變成 3D擺設,猶如在空氣中畫畫,像在變魔術。 

四圍學

學畫 3D模型

Ads by Google

去年底美國推出 3D筆,全球轟動。據聞不少港人都買咗支嚟玩,但聽到更多係買咗唔識玩,最後把筆束之高閣。別以為支筆係蠔油,一唧就有碟餸出,其實乜都要學,故 3D筆課程應運而生。

 

眾多課程中,要數該筆香港代理開辦的最正宗。導師 Carl Eng係設計和電腦繪圖出身,有畫畫根底,加上從小習字,對 3D筆操控非常純熟。被代理商發掘,一起合作開班。
Carl現時操控 3D筆已出神入化,隨時能畫花寫字,更造出 Ironman面罩、巴黎鐵塔和摩天輪等。「操控 3D筆有點似寫書法,提筆、吊筆、運筆,還加埋能控制支筆嘅唧膠速度,能自如就甚麼都可以畫。好似小擺設、高塔、鐘樓,甚至廁所用嘅毛巾掛鈎,都可以畫出嚟。」


(圖一)Carl花了 3小時完成的 Ironman面罩。先畫了個框(圖一),再慢慢打紋修飾(圖二),再加盞燈,真係街都買唔到(圖三)。 

(圖二) 

(圖三)

手力重要

初上體驗班, Carl會用 15至 20分鐘,介紹筆嘅結構和用法,講解材料、工具及一些基本畫 3D模型嘅技巧,跟住讓學員試畫。
Carl話:「課程內容把很多用呢支筆嘅經驗,綜合成最簡單快捷嘅方法教學員,務求大人、小朋友都學會,無畫畫底都無問題。」所謂快捷方法係先學畫楓葉。「因楓葉轉變位很多,對學習操控支筆非常有幫助。」
操控像臨帖,把膠片放在楓葉圖畫上,拿着筆照畫。咪以為容易,因幼膠芯塞進筆後就不停軟化,學員不能停止膠軟化,只能控制其唧出速度,但這速度只在幾秒間,否則膠很快變硬會塞住支筆,或無法固定造型。故此,指力和腕力都很重要,較平時用普通畫筆畫畫更花技巧。


工具有 3D筆( a)、膠片( b)和鐵鉗( c)。膠片方便把作品畫上去再撕出來,又可重用。鐵鉗修飾作品。膠芯( d)分 PLA膠及 ABS膠。 PLA膠從粟米提煉,唔臭無味有透明感。 ABS膠多做大件模型或邊位。($78-$88/包) 

初學有草圖,讓學員臨帖。 

控制支筆手力好重要。 

完成後用鉗修剪飛出的膠絲。 

耐性重要

初見學員個個畫得非常慢,有些未夠純熟畫下停下弄出很多膠碎;有些速度控制不好更塞住咗支筆;更有學員唔集中無耐性,成日搵幫手,最後畫出來的楓葉粗幼不一,好似散開咁,要導師幫忙補救。 Carl:「學畫 3D畫好需要耐力,要好有耐性去揣摩筆的速度,畫大件模型,更要不停思考點樣畫,所以絕對係腦力和耐性的鍛煉。」
學員孫太畫完一塊樹葉,似已能掌握筆的技巧,便放膽用女兒 Hilary的名字,畫了個名牌座。見佢把 2D作品變為 3D,再在空氣中不停來回唧膠造出一個座,最後作品站起來,感覺好似揮動魔術棒,好神奇啊!


3D跑車做法較複雜。先畫好每一面,再接駁成一個框,打紋修飾才成。 

咪以為 3D模型無用,呢盞燈就係證明。 

法國凱旋門。因為作品係膠造,非常耐用、實淨,永久不變。

自畫 3D花,情人肯定冧! 

Carl話平時畫畫是由上至下畫,但畫 3D模型像起基建,由底畫上去。 

Info

3D繪畫筆 workshop
體驗班,教授筆的結構、用法及畫畫的基本技巧,並能畫出楓葉和單車小擺設。 1.5小時,$248/人,沒資格限定,大小朋友均可參加。
主題班,就某主題進行創作,好似情人節學造花;中秋節學造燈籠。最少 4小時,$668起/人,要參加過體驗班。
查詢: 2818 4444/www.the3doodler.com.hk/fb 3DoodlerHK
地點:尖沙嘴柯士甸路 33號 2樓
備註:立體筆套裝$750,包 3D筆 1支+50支 3D顏料。
筆套裝+1.5小時工作坊$888。


撰文:馮淑玲 
攝影:劉玉梅(部分圖片由被訪者提供) 
錄像:蔡政峰

    全站熱搜

    tvb4life 發表在 痞客邦 留言(0) 人氣()