589期( 2006年 11月) 

媽咪姐

忽然 1000期經典重溫

Ads by Google

經典重溫之 baby
《忽周》已經跨越 1000期,早前回顧過藝人婚後出軌,今次睇番啲開心嘢。
最近娛樂圈突然吹起一陣生仔風,等我哋睇吓圈中女星佗 B有喜嘅片段。
袁詠儀同歐倩怡當年佗住巨肚等生、生完一胎又一胎嘅徐淑敏,仲有啱啱宣布再有喜嘅陳茵媺,而最勁一定係李美鳳同鄧梓峰分別都生孖胎,真係幸福滿瀉!

袁詠儀超巨肚走樣

張智霖同袁詠儀呢一對拍拖咁多年嘅金童玉女,經歷風風雨雨喺 2001年結婚, 2006年仲有咗佢哋嘅愛情結晶㖭!當年靚靚佗住魔童(張慕童)嗰陣,真係犧牲唔少,挺住個巨肚面腫兼走樣,而老公 Chilam當然識做盡顯廿四孝老公本色。老婆佗住張家嘅慈姑椗, Chilam陪住佢出出入入,仲一齊掃高鈣奶補胎,兼教埋老婆做孕婦體操,原來好老公就是這樣煉成的。


553期( 2006年 3月) 

當年老婆有咗張家金叵羅, Chilam貼身傍實靚靚,兩公婆專揀啲有營養嘅食物。金童玉女搖身一變廿四孝老公同慳家老婆。 

被封「魔童」嘅張慕童,轉眼已經 7歲,個樣仲愈嚟愈似 Chilam,呢個先係「正牌 Cool魔接班人」。

歐倩怡佗 B好擦得

提起巨肚,又點可以唔講下歐倩怡,佢 2006年嫁咗俾大佢 15年嘅郭晉安, 2008年有咗囝囝郭令山。歐倩怡為咗肚入面嗰個,除咗戒煙戒夜瞓之外,仲去報讀營養學。全心做個全職媽咪嘅歐倩怡,佗住 60吋巨肚真係好擦得,老公郭晉安陪住佢去超市掃特價即食麵,咁識幫老公慳錢,認真持家有道! 2011年仲生埋囡囡郭以雅,依家分別已經 6歲同 3歲。


660期( 2008年 3月) 

郭晉安與老婆行超市大手掃入即食麵,歐倩怡大肚時食量驚人, 60吋巨肚絕非浪得虛名。 

郭晉安同歐倩怡嘅一對仔女十分乖巧,今年初一家四口為慈善活動出動㖭!

徐淑敏中 3Q

徐淑敏 09年同結識兩個月嘅飲食界商人黃浩奉子成婚,翌年誕下女兒黃心瑤, 2011年繼續成功造人, 9月誕下二女黃心柔。臨盆前兩日,黃浩更親自操刀做攝影師,幫老婆影大肚寫真,之後又陪 Suki去富匯半島睇樓,送四千萬豪宅慰勞老婆!一不離二,二不離三,個多月前 Suki再幫老公生多個囡囡黃沁誼,連中三元仲唔夠,最近仲話想追多個仔,果然有心有力呀!


843期( 2011年 9月) 

733期( 2009年 8月) 

徐淑敏同老公黃浩特登搵楊天命擇日開刀,喺養和醫院剖腹誕下二女黃心柔。 

連生三女嘅 Suki未肯收爐,個多月前生完細女黃沁誼,日前又話想追多個仔。 

陳茵媺兩年抱兩

陳豪陳茵媺呢一對結合,得到大家一致認同及祝福。去年 6月喺巴黎大住肚神秘結婚,雖然有個「愛妻號」老公,但 Aimee唔想「攤大手板」,想自己搵銀證明實力,去年懷有七個月身孕仍然如常出席活動,就算老公勒令安胎都唔聽。不過佢就話 BB出世會專心湊 B,一年後再復出拍劇。但係依家 Aiden出世九個月, Aimee再次有喜,復出應該遙遙無期。


951期( 2013年 10月) 

933期( 2013年 6月)囝囝 Aiden嚟緊就十個月大,陳茵媺又再宣布有咗 3個月身孕,老公陳豪上星期獎老婆去馬爾代夫旅行,仲默認今胎係女。 

李美鳳龍鳳胎

有「電眼美人」之稱嘅李美鳳 96年嫁俾台灣富商鄭翔中,過住少奶奶生活,結婚兩年就幫老公生咗對龍鳳胎鄭寶兒同鄭中福。現時李美鳳中台兩邊走,間中出席活動打發時間。


159期( 1998年 8月) 

嫁咗去台灣做「過埠新娘」嘅李美鳳,幫老公鄭翔中誕下龍鳳胎,一對仔女甚少喺香港露面,只有李美鳳間中來港出席活動。

鄧梓峰添孖仔


130期( 1998年 1月) 

鄧梓峰除咗係飛機師之外,原來佢仲係多仔公, 98年鄧梓峰大女鄧瓊芝 4歲嗰陣,老婆意外懷有孖仔鄧柏暉同鄧松暉,佢哋當時住緊嘅千呎豪宅都唔夠住,翌年鄧梓峰家庭又再添新成員細女鄧淑芝,湊成兩個「好」字。

    全站熱搜

    tvb4life 發表在 痞客邦 留言(0) 人氣()