靚抽王

娛樂圈民主聯軍 VS演藝界建制勢力

Ads by Google

9月 28日警察出動催淚彈同防暴隊對付手無寸鐵嘅示威市民,全城轟動。娛樂圈都係社會嘅縮影,當然係有人會大聲疾呼,為學生出頭甚至出力;另一方面,又總有人會昧住良心講膠話。究竟呢場戰役誰勝誰負,真係冇人會知。就等我哋依家計算吓雙方嘅戰鬥力,分析吓贏面先。

娛樂圈民主聯軍

何韻詩
何詩詩不單着黑衫落場為學生及示威者打氣,連日來亦不斷 update臉書支持,可謂身體力行。佢仲喺臉書度問特首瞓唔瞓得着,霸氣非常,就連微博被封都唔理,足證其驚人嘅戰鬥力。
絕招:號召大愛同盟
戰鬥力: 9000點

 

黃秋生
秋生哥一向敢言,被認為有建制因子嘅佢,今次都企出嚟支持學生,仲叫啲示威者向催淚彈屙尿。姑勿論呢招 work唔 work,但係以佢大飛哥嘅江湖地位+大聖劈掛功夫+整人肉叉燒包嘅嚇死人演技,有佢喺度,成個陣營都好難輸。
絕招:大聖劈掛
戰鬥力: 10000點

 

葛民輝
古代就話要打肉搏,可惜今時唔同往日,打仗嚟講,一定係講裝備,如果唔係啲美國佬都唔會年年使咁多錢買軍備啦!阿葛今次着住成副武裝話要支持學生,呢件嘢,連身為高達迷嘅我都計算唔到佢嘅能力值,姑且俾佢 10000點啦!
絕招:變做柯柏文
戰鬥力: 10000點


 

阮民安
孫子兵法有云,戰爭要出奇制勝,下下都咁正路好易俾人捉到嘅。所以我哋既有黃秋生、何韻詩呢啲做前鋒,亦都會有一啲奇兵做秘密武器。而我哋嘅秘密武器就係——登登登凳:火星異種打不死小強阮民安喇!佢戰鬥力雖然非常有限,但係佢就有一個絕對嘅優勢!咪就係打不死囉,人類絕種佢都仲喺度呀!
絕招:你踩我唔死
戰鬥力: 5點(生存力:無限)

演藝界建制勢力

高志森
長期維穩嘅愛國森,喺 fb轉發名為《多個政黨強烈譴責學生暴力行為》、《警方譴責破壞法紀行為》嘅報道,似係分享自己嘅政治立場。不過佢今次連嘢都唔敢講,只係轉發,似乎係體會到自己勢孤力弱,眾怒難犯,同時心底裏又老 PATPAT發作,點都要宣泄一下。
絕招:進擊的老 PATPAT、美國護照(有咩事即閃)
戰鬥力: 1000點

 

羅家英
家英哥近年身體唔好,都仲咁關心時事,認真難得。不過佢話「香港烏煙瘴氣,佔中是禍首」,仲話學生係被利用……其實佢有冇見過啲示威學生?佢知唔知依家啲學生有幾醒?算啦,佢身體唔好嘛,唔好話佢,我哋唔係警察,我哋有同情心的。
絕招:身體唔好(唔忍心攻擊佢)
戰鬥力: 50點

 

結論:仲使講,梗係民主勝利啦!

荒謬現象學

每期荒謬現象學為你解構娛圈嘅不尋常現象!


撰文:娛文樂

    全站熱搜

    tvb4life 發表在 痞客邦 留言(0) 人氣()