名人潮

名媛有火

Ads by Google

最近學運由罷課演變成佔中,激發近十萬人上街,警方更出動前所未見的 87枚催淚彈,武力清場,事件轟動全球。身為香港人,無論支持與否,相信一樣徹夜難眠。一向不談政治的社交名媛,有人繼續馬照跑舞照跳,避談佔中,不過亦有不少敢言分子,齊齊發聲。

張寶華︰官逼民反

林建岳愛將張寶華,新聞界出身,對政治特別敏感。她表明撐學生,反警方暴力。「我不嬲都唔係支持佔中,問題係今日行到咁嘅環境,其實係政府攞嚟。如果唔係一個咁大、咁不合理壓迫,根本唔會有咁多人出嚟。佔中如果唔係出催淚彈、出防暴警察,根本冇乜人去參與佔中,好多人支持民主但唔會支持佔中。依家啲人係出嚟撐學生,同埋反對政府用咁大暴力。今次真係官逼民反。我都去現場過睇,希望呢件事圓滿解決,希望政府可以克制。因為當權者就係需要克制,因為你有權力,係需要理性對話。」


張寶華講明撐學生,周一( 29日),她到金鐘現場觀察,大讚學生守紀律。 

對於葉劉淑儀言論,張寶華極勞氣:「佢做訪問嗰陣,主持人話警察啲催淚彈掟向人群,佢就話梗係掟去人群啦!唔通掟去球場呀!我覺得政府裏面仲有啲咁嘅思維,問題係好難解決。」 

何倍倩︰要聽多啲唔同聲音

Zensation老闆何倍倩,指大家應包容,聆聽多方聲音。「我都有舖頭喺銅鑼灣,最多咪早少少收舖,等員工方便返屋企。我覺得冇人可以話其他人做得唔啱,唔可以淨係諗自己,應該要聽多啲唔同聲音。企出嚟嘅市民令我好感動,佢哋希望爭取更好環境俾下一代,大家要用和諧手段達到。」



何倍倩指有人會選擇移民,但未必人人有能力,應體諒、聆聽其他人苦況。 

馬詩慧︰政府要有實質方案

名模馬詩慧希望香港享有真正普選。「我唔想見到香港有呢一幕出現,好唔開心。因為自己喺度長大,見到啲畫面都喊過幾次。政府真係要做番啲嘢,唔係淨係出嚟擺平件事,要有實質方案,俾到大家睇我哋下一代真係有希望、有自由、民主嘅。
「明眼人都見到當大部分人好和平去表達自己嘅訴求,而警方都用暴力去鎮壓佢哋,有冇咁嘅需要呢?有畫面有圖有真相,唔係我哋齋聽人哋講。當咁大班人聚集,喺中間掟催淚彈,人踩人仲危險,根本愈鎮壓愈亂。今次睇到香港人精神,我好 pound of自己係香港人。」

周美鳳︰警察出催淚彈係應該

公關公司老闆周美鳳指學生唔應該罷課,希望事件盡快結束。「我最初都好支持學生有訴求、民主,想表達冇問題,但呢班人太自私,搞到暴亂。同埋班政客去咗邊呢?佔中三子做呢個動作為乜呢?我都係香港市民,希望香港繁榮,但咁嘅訴求根本係自私,令全港市民同你玩共存,好多問題出現。影響經濟最終都係害市民,大家都要食飯、要交租,搞到暴亂好過分,我覺得警察出催淚彈係應該。真係希望呢幾日打風落雨,等佢哋快啲返屋企。」

湛琪清︰希望有 peaceful solution

「雖然我唔喺香港出世,但我依家住香港都好有感覺,睇到新聞好唔舒服,希望大家好快有 peaceful solution。我都見到新聞有催淚彈場面,又有好多都係好 young嘅學生,希望大家安全第一。」

汪詩詩︰自己人唔應該打自己人

「作為香港人一定關注,我瞓得 3個鐘,成件事好唔開心。作為父母,見學生罷課好唔舒服。我覺得自己人唔應該打自己人,兩方面可以做得好啲,應該冷靜啲,警察方面又需唔需要去到咁呢?學生又應該做好啲、和平啲,大家要諗吓後果,注意安全。」


撰文:名人組
攝影:攝影組

    全站熱搜

    tvb4life 發表在 痞客邦 留言(0) 人氣()