歐洋風

一人一相睇星學生

Ads by Google

一人一相撐學生!個個喺 fb po相,先知道朋友仔細個原來咁得意。
其實荷里活明星嘅學生相都好多元化㗎,有薯嘜又有肥仔嘜,既有面目全非亦有天生麗質,估你唔到咁爆趣。

Class of Hollywood 天生麗質 A班 畢彼特

入選學校籃球隊、只得 14歲嘅畢彼特(左圖),講真,有啲男生女相乸乸哋。不過愈大佬味愈出,大學嗰陣(上圖),已經見到男神雛形,依家生埋鬚,佬味更加濃郁,抵你紅足咁多年。

奧蘭度布林

有啲人經過時間洗禮,先會慢慢變靚。奧蘭度布林則由細到大都咁靚。你睇佢面仔紅卜卜幾可愛,真係想搣爆佢個面珠登。

羅拔唐尼

Iron Man羅拔唐尼不論過去或者現在,都係咁靚仔。最大分別,咪條髮線囉。歲月唔單止催人老,仲會逼人有個大海景。

珍妮花羅倫絲

珍妮花羅倫絲細時好 pure好 true,雖然近日受慾照風暴拖累,影響咗形象。不過珍妮花美貌演技兼備,點都有捧場客嘅!

髮生咩事 B班 喬布斯

已故蘋果教主喬布斯發明無數,其創意亦展現喺髮型上。呢個長毛 look,經典啦啩。

湯漢斯

跟教主生於同一年代嘅湯漢斯,喺高中時同樣留咗一頭長髮。不過影帝頭髮攣曲,多咗份 19世紀初嘅老爺味。

瑪麗嘉兒

望個樣,就知佢係樂壇天后瑪麗嘉兒。但望個髮型,似貴婦狗囉。

布斯韋利士

嗱,呢位同學嘅髮型本身無問題,但硬係怪怪咁嘅……!梗係啦,平時睇慣佢光頭吖嘛!佢係邊個?咪布斯韋利士囉!

面目全非 C班 美瑾霍絲

呢位女同學雖然好好笑容,但有啲醜樣喎……唔怕,後天有得救嘅,箍箍棚牙又得,執執個樣亦得,得咗,終於變成性感女神美瑾霍絲。

技安真人版  Russell Brand

佢唔係姓「死」,名字亦唔係叫「肥仔」,佢真實名字係 Russell Brand。由昔日肥仔變成今日瘦蜢蜢嘅笑匠,你都咪話唔勁。

豬膽樽形好易認 荷爾芭莉

幾時都話有圖有真相。昔日嘅荷爾芭莉同今日嘅樣,完全兩回事,可以話係面目全非班中嘅典範。

Eminem

Eminem係音樂界嘅潮人,回顧過去,嘩——薯到呢,簡直唔想同佢做朋友。

最佳進步獎 佐治古尼

啱啱做咗老襯嘅佐治古尼,係公認嘅世界級型佬,誰會想到學生哥嗰陣,竟然會係薯到咁。難得佢力求「變型」,由薯嘜(左)到臭飛(中),再演變到高中時嘅官仔骨骨(右),變化之大,唔頒個最佳進步獎都對你唔住。


撰文:娛樂組

    全站熱搜

    tvb4life 發表在 痞客邦 留言(0) 人氣()