金秀賢自嘲話呢排去得外地多,食咗唔少好嘢搞到肥咗。睇佢再係咁落去,會再大兩個碼。 

韓氣逼人

一個養「全家」 金秀賢捱到病

Ads by Google

「都 min俊 C」金秀賢自從拍完《來自星星的你》,呢半年嚟出國多過返屋企,睇吓佢上個禮拜嘅行程, 5日去咗 4個活動,掃勻北京、深圳同香港。所以病咗囉!陰功豬。
查實「都教授」近期唔怕戲,出外搏命拍廣告搵快錢,真係多得金賢重唔少。皆因兩位都係裴勇俊旗下 KeyEast最賺錢藝人,但金賢重又唔生性, 8月嗰陣涉嫌打傷女友,搞到一身蟻,依家全面停工。而老闆裴生又俾人告緊呃人投資,幫公司賺錢嘅重擔,仲唔係喺晒金秀賢度?

 

啱啱過咗嘅周末,肥咗成個碼嘅金秀賢,嚟咗香港兩日,為代言嘅品牌做宣傳。佢喺兩個記招加埋見面會,全程夾埋只現身半個鐘,但因為呢幾日真係太奔波,休息唔夠,一嚟到就喺台上打咗幾個乞嗤,之後仲要同全場 100位 fans分組合照。難怪佢第二晚出席最後一個活動,會嗌翻譯爽啲手譯快啲,「嗱嗱聲」完騷趕去機場。快啲返屋企唞吓,好過賺埋唔夠睇醫生吖。
不過,金秀賢咁仆心仆命為公司,其實都啱嘅。話說當年做童星嘅佢,拍咗幾套劇,都冇乜發揮。自從 2010年轉會去咗裴勇俊旗下,真係好似中獎咁,《 Dream High》、《擁抱太陽的月亮》同《來自星星的你》都係爆紅劇。冇裴生嘅獨到眼光,佢可能仲有排等機會!


呢幾個月好頻撲嘅金秀賢,今次嚟到香港疑似感冒,不斷打乞嗤。睇嚟佢梗係冇食自己代言嘅維他命,抵抗力差咗啲喎! 

裴勇俊自從 07年拍完《太王四神記》之後,處於半退休。梗係啦!捧紅咗個金秀賢,仲使自己出山咁操勞咩! 

老闆裴勇俊好識揀

話時話裴勇俊又真係識揀!好似佢入行咁耐,唯一承認嘅女友,就係上年俾日本傳媒踢爆,陪佢去日本琦玉縣參加下屬婚禮嘅千金小姐。傳聞話呢位 170身高、 28歲嘅女友,係韓國 LG集團始創人胞弟嘅孫女,即係 LG集團分拆產電公司 LS集團副會長嘅二女具紹熙。呢位千金曾經結過婚,但名下有 12萬股 LS集團股票,市值接近 110億韓圜(約 8,500萬港幣),做裴生女友一啲都唔失禮。


Angelababy同金秀賢拍過廣告,但現場睇,佢哋全冇交流。一話記者會結束,金生仲第一時間拍手兼落台速閃。「海綿蛋糕」可以好放心! 

粉絲繼續癲手機活動上,成功入場嘅粉絲唔多,但係樓下就有「金粉」團自資整易拉架宣傳,幾多人爭住影! 

旅行用品活動上,有多個金秀賢人形牌,成班 fans含情脈脈咁攬住硬晒嘅金生紙牌合照。

 

 


金秀賢呢幾個月四圍飛做宣傳,難得可以出外食飯,踢拖都去。咦!呢對似係酒店紙拖嚟喎! 

裴生女友有傳係 LS集團太子女。千金喎!好神秘㗎,呢張已經係網上流傳嘅唯一玉照。(照片原先已打格) 

裴勇俊同崔智友喺 2002年憑《冬季戀歌》上咗神枱位。裴生因為呢套戲喺日本搵夠上岸,但佢拍檔崔智友依家仲要靠拍戲搵食。 

金賢重喺 8月尾因為涉嫌打女友,搞到形象插水,連開緊巡迴騷都「被取消」。少咗佢幫公司賺錢,真係靠金秀賢頂住。(照片原先已打格) 

撰文:張韋弘

    全站熱搜

    tvb4life 發表在 痞客邦 留言(0) 人氣()