少女時代秀英首次喺大台擔正,喺《我人生的春天》做女主角,同甘宇成玩父女戀,希望可以進身一線演員行列。 

電視精

少女時代秀英 拍住拖喊住紅

Ads by Google

少女時代變成戀愛時代,隊員逐個被私有化,最近又傳出 Jessica同阿嬌前男友權先生好事近,一隊組合同時有咁多個成員傳戀情,難怪少女時代拆夥嘅消息又再次鬧得熱烘烘。
趁未拆,要好好把握上位機會,第一個公開戀情嘅成員秀英,同鄭京浩感情穩定,形象健康,最近更加升呢喺大台擔正做女主角,演出慘情電影劇《我人生的春天》。
公開咗戀情之後仲好發展,其他姊妹恨都恨唔到。

記憶細胞換心續緣

韓劇最近喜歡拍新題材,甚至不倫不類,反而令人懷念昔日喊到不似人形嘅愛情劇。《我人生的春天》可以話係回歸苦情,賺人熱淚。故事講述秀英身患心臟病,接受器官捐贈後得以續命,機緣下遇到心臟捐獻者的老公甘宇成,發展出一段愛情。故事以記憶細胞為素材,即係接受捐贈嘅患者,會繼承捐贈者性格與習慣,咁似劉華套《再說一次我愛你》。甘宇成見到秀英,就好似見到去世太太一樣。呢個故事背景同發展,已經可以聯想到會出現好多哭崩長城嘅情節,劇迷可以預備定紙巾。最大隱憂係,男主角甘宇成同秀英相差 20年,做得佢老豆,外形上實在唔多襯,秀英要表現出成熟嘅演技,做到似甘宇成老婆先至可以吸引到觀眾。尤其是同檔期嘅對手強勁,今季水木劇(即係逢星期三、四播出)除咗《我人生的春天》,仲有 Rain嘅《對我而言可愛的她》及李東旭嘅《鋼鐵人》,幸好播咗三個星期,平均收視都有 9%左右,唔使包尾已經好好!


秀英同甘宇成嘅相遇,其實係由男方嘅一對仔女開始,秀英同小朋友有好多戲份,一下子由少女變後母。 

話晒都係少女時代成員,秀英話對佢嚟講唱歌跳舞容易得多,所以佢更加想喺演技上向高難度挑戰,要佢不顧形象都得呀。 

挑戰哭戲男友教路

少女時代人多勢眾,每個成員有唔同嘅單飛範疇,秀英一早就已經揀好咗向演戲發展,呢幾年都有演電視劇,不過都係做配角多,今次《我人生的春天》係秀英首次擔正做女主角,當然唔可以馬虎。為咗令秀英有更多發揮機會,特別安排咗幾場高難度戲份。好似第一集入面,做營養師嘅秀英,為咗叫病人食飯,突然打開心口,露出一條手術疤痕,揭開自己曾經身患重病嘅底蘊,非常感動。鏡頭 close-up影住雙峰中間嘅疤痕,令觀眾嚇咗一跳,以為秀英真係為藝術而脫,後來先知道原來係替身,認真無癮。另外有一場戲,男朋友向秀英求婚,導演要佢喊足 4分鐘,果然做到。劇組人員讚秀英嘅表現大有進步,喺記者會上,佢就話原來有向演員男友鄭京浩請教,男友叫佢自然舒服咁演出就好。男友嘅事都可以光明正大咁講,證明咗拍拖唔一定係壞事,唔知其他姊妹幾時至可以好似秀英咁暢所欲言?


呢一幕騷胸戲,本來秀英想親身上陣,不過最後都係用替身, Fans們無眼福。 


甘宇成今年 44歲,秀英 20歲,二人相差足足廿年,行埋一齊話係父女都有人信。 

男二由李浚赫飾演,之前做過《城市獵人》,今次做秀英男朋友,襯好多。 

撰文:關錦雯

全站熱搜

tvb4life 發表在 痞客邦 留言(0) 人氣()