70分 

私口味

她消失以後/離開他以後

Ads by Google

諗到開拍《她消失以後》( The Disappearance of Eleanor Rigby: Him),搭《離開他以後》( The Disappearance of Eleanor Rigby: Her)的,可算是天才。天才的策略如下:一對夫婦,女兒過身,關係生變,老婆離家出走,咁都拍到兩套戲。《她消失以後》以老公角度出發,講解老婆走後自己有幾失落有幾淒涼;《離開他以後》以老婆角度出發,講解點解要離開老公再如何自救。不是前篇後篇有連貫性的發展,也不是湊佳苗小說般透過不同人物的觀點拆解一道羅生門,只係將一個普通愛情故事拍成兩齣普通電影,就好似唔普通。同一班主要演員,男女主角相遇時,順理成章在兩邊同樣出現。重複?係呀,兩齣電影加埋接近二百分鐘,有二十分鐘或更多是要你睇完再睇。

 

有綽頭,是好事。電影標榜同步,我就諗極唔明點樣同步。無論睇《她》先,還是《他》先,即使立即緊接睇另一齣,都係要睇完一齣再睇另一齣,你都係會知道晒成個事態發展,點都有前設,已經不能同步。如果,從不同視點可以看出截然不同的解讀,如此安排還可說得上有意義。無喎,我睇你好,你睇你自己好,你睇我好,定我睇我自己好,分別不大。咁,點解要咁無謂咁煞有介事呢?
創新,是好事。可惜創新的部分只停留在表達手法上,當中談及的婚姻意義,其實屬於日常生活中到處皆可見的常態。正因為要表達出常態,情節和節奏難免較平淡,即係沉悶。是我的問題,受到動新聞的磨練,唔奇情的,又唔關自己事的愛情故事,真係好難產生興趣。 OK,你唔使吓吓整個高才生亂刀斬死前女友咁激,至少都要有霆鋒王菲栢芝咁曲折離奇蕩氣迴腸先似樣啦。加埋李亞鵬,可以一個故事拍成四齣戲了。
是社會的錯。一般情況下,我們愛看電影中天花龍鳳的情節來找尋刺激,現實是你打開 C1,見到的愛情故事固然怪異,打開 A4,見到三代同堂食食吓麥記都俾人淋通渠水,你叫電影編劇要如何突破才可超越現實呢?何況,還未數更具張力的 A1頭條?


撰文:方俊傑

    全站熱搜

    tvb4life 發表在 痞客邦 留言(0) 人氣()