金秀賢出席代言活動同 fans見面,有幸可以上台同佢合照,呢位 fans就識把握機會同佢傾吓偈,不過 oppa好似聽唔明喎。 

外太空

金秀賢 15分鐘速逃

Ads by Google

呢兩個星期,韓星接二連三來港舉行活動見 fans,最矚目,一定係男神金秀賢,嚟兩日,出席兩個代言活動, fans跟住走兩場,想攞到入場券先要俾錢買手機買行李箱,仲要唔知抽唔抽到,真係難中過 iPhone 6。
最後見面會歷時 15分鐘,眨吓眼就過, fans用幾千蚊換張證,睇吓金秀賢微笑點頭講嘢,抵唔抵?你懂的!

買手機換入場證

《來自星星的你》令金秀賢升上男神之位,紅遍亞洲,尤其是大陸嘅代言商演不絕,金秀賢差唔多每個星期都飛一轉內地,隨時喺大陸仲多過喺韓國。今次係金秀賢相隔 5個月再次到訪香港,都係出席代言活動,仲要打孖上,先有 Samsung,實行同 iPhone 6打對台。今次嘅見面會招待 100位 fans,可以同偶像近距離接觸,想入場一啲都唔容易, fans要預購價值六千幾蚊嘅 Samsung手機,由於先到先得,聽聞幾日前排通宵,先至可以得到入場券,活動舉行地點甚至係之前一日先獲通知。不過喺 fans眼中,呢一切都係值得嘅,因為呢 100位有錢又有運嘅幸運兒,可以同金秀賢合照!還記得上次金秀賢出席活動,一班闊太想同佢合照都唔成功,今次可以名正言順唔係靠攝位咁合照,雖然係 10個人一組嘅大合照,都好過無!


簡單一套黑色西裝, T-shirt,無花巧打扮,已經令閃光燈閃個不停,男郎之稱並非浪得虛名。 

之前有內地工作人員喺網上數金秀賢大牌,隨行工作人員過多,呢日現場所見,確實係有多名黑人保鏢,慎防有人埋金秀賢身。 

無劇在手努力搵真銀

見面會原定兩點開始,金秀賢遲咗 15分鐘先出場,一身西裝官仔骨骨,加上佢個招牌「都教授」齊蔭髮型,現場 fans興奮尖叫,好幾次大聲到嚇親金秀賢,搞到佢講唔到落去,要出聲叫 fans冷靜,佢哋先識收聲。金秀賢自爆自己同普通人一樣,機不離手,仲會上網睇 fans俾佢嘅留言。買電話就話自己係低頭族,呢個代言人真係好識做。自從拍完《星星》之後一直未有新作品推出,金秀賢話自己今年內都唔會有新劇,不過工作已經排到密密麻麻,言下之意即係專注搵真銀,難怪有傳佢想賺夠先入伍, fans真係要儲多啲錢先夠。去到最緊張嘅環節,就係金秀賢親手抽出 5位幸運兒,可以同佢單獨合照, fans立即拎出票尾,好似對六合彩咁緊張,抽到嘅好似中咗一億五千萬咁興奮。以為佢哋上台會大叫嚎哭,點知又表現得非常咁冷靜,握手、頒獎、合照、落台,清脆利落,可能喺偶像面前,點都要有少少矜持。頒埋獎金秀賢就急急返後台,餘下嘅合照環節就喺後台進行。望望錶,原來見面會只係 15分鐘, fans夠唔夠喉呢?


有得上台嘅 5位 fans,都係由金秀賢親自抽出,被抽中的仲開心過中六合彩。 

金秀賢露出招牌笑容,同 fans揮吓手,已經令全場尖叫聲震耳欲聾,可惜佢今次無講廣東話,差啲誠意喎。 

100名 fans,話多唔多,話少唔少,為咗可以令金秀賢望到自己, fans又舉手又舉牌。

撰文:關錦雯
攝影:梁炳權

全站熱搜

tvb4life 發表在 痞客邦 留言(0) 人氣()