用 bumper嘅另一好處,就係一睇機底,就知係 iPhone 6 Plus。 

ILIKE

換新殼

Ads by Google

iPhone 6 Plus到手,雖然外國有人試過部機好襟跌,但都係搵殼保護佢好啲。其實一直以嚟特別鍾情 bumper款(只圍住機邊)機殼,因為唔使搞到部機咁厚,尤其係 iPhone 6 Plus咁大部。不過,近年 Apple已經再冇出 bumper殼,其他雜廠嘅質素又信唔過。

 


@林勇 

最終搵到呢個美國手機殼品牌 Spigen出嘅專用 bumper( iPhone 6 Plus Neo Hybrid EX•$378),採用雙重膠邊保護,裝完手機依然夠 slim。上兩代 iPhone都曾經用過呢個牌子嘅機殼,由美國設計、韓國生產,用料比一般國產貨靚得多,點都有信心啲!

唔使打嘅 game

打機,不外乎係想有成功感,難過嘅關、難打嘅怪都俾你搞得掂,可以喺班 game友面前威吓。不過,好似我哋呢啲要返工又要湊仔嘅「中佬」,邊有咁多時間打機先?最近就發現喺 Google Play入面有隻由台灣推出、叫《天天掛機》嘅 RPG(角色扮演) game,最大賣點係唔使玩 game,角色都會自動打怪升呢,仲自稱為「放置類 RPG」。開咗隻 game唔夠五分鐘,未㩒過掣已經無啦啦升咗三個 level,要升到破百,其實唔難。不過,老實講,半自動系統(即部分遊戲進程交由系統玩)都還可以接受,完全唔使自己打,仲有乜好玩呢?


隻 game叫《天天掛機》,唯一要你玩嘅係每日 login。靠乜賺錢? game入面其實都有裝備道具,幫你個角色快啲升呢,想贏過其他玩家?睇吓邊個錢多囉。 

@勞耀全 

行山交友

針山,獨立嚟講唔難行,但喺香港嘅百公里山賽裡面,好似毅行者、 HK100,由於被安排喺賽道尾段,每次嚟到針山已死吓死吓,所以平時見到佢,印象麻麻都好合情理。早排喺山友邀請之下,冇乜考慮就報咗個「針山十登」賽事,規則好簡單,就係來回針山兩邊山腳五次!雖然加埋得 21公里,但成條賽道只得上同落,幾乎冇平路回氣位,真係諗起都有啲腳軟。不過掉番轉頭諗,其實又幾過癮,因為唔理快慢, 113位參賽者沿路必定會兜口兜面遇到幾次,到時嚟個 high five打氣又好,一齊爆粗發洩亦得,行完之後,點可能識唔到一大班新山友?


來回針山一次約莫上 2200級石梯,五次就行過萬級,重陽嗰日行過呢度,唔該為我哋打打氣。 

@周群雄 

虛擬錶板揸車似打機

上星期,出差西班牙,去咗 Marbella嘅 Ascari賽車場試第三代 TT同 TTS(辣版)。試車啲嘢,留番喺《壹號幹線》至講,而家想講,係關於新 TT個虛擬錶板。上網睇相睇片,點都唔夠親身玩咁過癮,衞星導航用咗 Google Maps襯底,速度錶轉數錶可以放大縮細,調校汽車設定用圖像顯示,甚至連後波 Cam畫面都喺埋度,布局歸一,就手順眼,而感覺就好似打緊賽車 game,虛擬現實一齊出現眼前!係就係好玩,不過只限於駕駛者,作為新 TT嘅乘客,會變得好無聊,因為想轉轉收音機台,都會搞亂錶板啲顯示,都係乖乖哋坐定定玩電話好過。


揸新 TT,確係好玩,因為成個駕駛艙都係以駕駛者為中心。 

12.3吋屏幕,大細適中;顯示資料之多,要花啲時間先至習慣。 

@劉定邦

text:科技組

    全站熱搜

    tvb4life 發表在 痞客邦 留言(0) 人氣()