中環人語

李福兆感言:十月淡市 雪上加霜

Ads by Google

呢幾日香港「佔中」嘅情況,係無人估計得到;真正如火如荼,股市大幅震盪。小宗本週一搵來「股壇教父」、見證過多次港股風浪嘅李福兆詢問,他直指對股市的影響「很大」。他表示,每年十月都多數是淡季,佔中啟動,可說是「雪上加霜」。

 

全世界人都有影響,唔單只我,除非完全不揸股票!」李福兆認為,反對佔中不會有成效。「普選唔到你講,《基本法》、人大定咗,中央實唔會變,你做乜嘢,都不會改。」他對梁振英應否下台不予置評,但指現時亂局會為香港帶來損失:「香港是金融中心,有國際市場,搞衰咗佢,全香港人都受害。」對於恒指後市,李福兆承認暫時睇唔通:「要睇耐啲先知,最好係以不變應萬變。」

Joyce Ma 女婿好猛料


Joyce Ma女婿 Norman專炒殼股。 

老牌百貨公司先施的第三代掌舵人馬景華月初逝世,並於本週二舉行安息禮拜。馬景華最為人熟悉嘅係佢喺七O年同老婆郭志清(即係 Joyce Ma),創立時裝王國 Joyce Boutique。 Giorgio Armani、 Dolce& Gabbana、 Hugo Boss等國際一線名牌全部係由 Joyce引入本地。兩公婆只得兩名女兒美域及美儀,其中長女嘅老公,原來就係何添細仔何厚鏘( Norman)。
Norman活躍於金融界,唔係時裝圈人士,所以無乜人知 Joyce Ma有個咁猛料嘅女婿。本身係會計師嘅 Norman,同何厚鏵係堂兄弟,又係何添私人旗艦公司德鴻集團嘅揸弗人,睇住約百億資產之餘,近年同彤叔掌櫃魯連城及誠哥頭馬陳國強經常拍住搵食,蒙古能源、海通證券、第一視頻、德祥地產等殼股都曾留下腳毛,如今仍任執董嘅 Vision Values,又係由魯連城任主席,年初炒作過一輪,近期又歸於平靜,不過,根據往績結局都會係賣殼喇。

《文匯報》記者處處都在


處處現身,(記者杜法祖)報導嘅新聞又有幾堅呢,又? 

毛主席要超英趕美,強國貴為當今天下第二大經濟體,革命可謂成功咗一半矣。咁另一半又點呢?冇有怕。只要十三億同胞發揮黨的喉舌《文匯報》「記者杜法祖」無處不在、處處都在嘅本事,爬花旗頭指日可待也。何以見得?
你睇,同一日,藍田躁翁淋鏹水由「記者杜法祖」跟,法庭審肥龍又係佢跟,此外審反東北滋事分子、警長英文差、大專生傷人、樊偉軍打假波、龕場告地政署都係佢跟,但咁都唔止喎,佢仲跟埋深水埗班南亞漢群毆,以一敵九。十三億人個個學得杜法祖呢位記者哥哥咁,強國真係經濟唔起飛都難也!

中環寸嘴

楊國佳  K.K. Yeung
工廈大王楊耀松大仔,家族的收租物業,遍布港九,屬正牌收租公。自認寸得起,謂「有我咁得閒,無我咁有錢;有我咁有錢,又無我咁得閒」,經常流連富豪飯堂品嘗美食,仲喜歡到新開食肆「踢竇」試新菜。

中藥港到善終一條龍


我「𡃁仔」時(左),跟霍英東(右)去南沙考察,估吓我喺佢身邊講乜,聽到佢頭側側。 

寸嘴楊我今期無心情搵食,週日落咗去金鐘感受吓學生嘅氣氛;香港真係不×知所謂,之前睇報紙話老董成立個智庫,為香港未來十年 road map策劃,嘩!香港係咪無人呀?愈玩愈老,個榮譽顧問饒宗頤九十七歲,名單仲有八十五歲嘅楊鐵樑,最後生嗰件梁錦松都六十二歲啦,人民銀行行長周小川六張幾咋,都話要退休啦,我哋咪同中央對着幹?老董嗰時搞嘅中藥港拉咗柴,呢班智庫可以再搞個人瑞中心以及殯儀中心,善終服務一條龍吖,笨!嗱,人人話香港係福地,所謂福蔭子孫,吸引吓啲人葬喺香港,大時大節,清明、重陽等啲人來香港拜山,咁智庫班友得閒又搞吓「千歲宴」,刺激吓消費囉。
當年霍英東帶團去佢南沙考察,去到睇到個開荒咁嘅環境,喺佢眼中,我仲係𡃁仔,同佢老前輩講:「呢度無雞叫,搞唔起喎!」佢聽到頭耷耷,老霍唔聽我點,南沙夢依家咪飲恨……。我最憎搵啲「老嘢」嚟壓住啲𡃁,我啲嘢,聽落戇×,嗒落有味。睇到班學生企出嚟感同身受,呢班係香港精英嚟㗎!梁振英當人哋 LuLu,侮辱人智慧話受到煽動;大學生而家可以講無前途,有嘢做儲唔到首期都供唔到樓,公屋又無資格攞,計我話邊個做特首都無問題, honour個八萬五就掂啦。今年九月閏月,古時重九登高係為避難,今鋪要避難兩次,後市不容樂觀。

金牙大狀講嘢 朗尼陳夠晒市儈


朗尼陳唔似係發錢寒嘅人,但把口則夠晒市儈! 

超級梁粉朗尼•陳啟宗繼續撐 689(搵勻全香港冇第二個似得佢咁有正氣、咁有能力, end of quote),進而鞭撻佔中,話大陸「俾你發達你唔要,仲要踢人上下五寸。」三個手無寸鐵嘅書生有冇咁狼死呀?
聽講朗尼係教徒,而且諗過做牧師,咁佢肯定聽過呢句馬太福音:「人若賺得全世界,賠上自己的生命,有什麼益處呢?人還能拿什麼換生命呢?」( 16: 26)佢兩兄弟一次過捐咗差唔多成三十億銀俾哈佛,點都唔似係發錢寒嘅人,但把口又何其市儈也。
況且佔中為咗乜啫?極其量要班人說話要算數、做人要有口齒之嘛,請問《聖經》上邊度話咁樣做係有罪先?

中環人語迷你版

"佔領中環 正式啟動"

估中邊個中環人講呢句說話,送你 JWatch J-33藍寶石鏡面限定版手錶一隻有意參加者,請於十月一日(星期三)下午一時後,將答案、姓名及聯絡電話電郵至 mailto:centralman@nextmedia.com小宗只接受電郵,郵寄免問。

上週人語揭曉

"即使你只是想來觀禮,也是無任歡迎。"

答案:戴耀廷
得獎者:葉劍迅
中獎時間: 1:00pm 24/9/14

本刊員工及直系親屬不得參加。
為求公平及杜絕偷步搶答起見,請於每個星期三下午一時後來電郵競猜答案;在此之前發出之電郵作廢。
超過一位讀者估中,先到先得,恕不接受上訴。
答案及中獎者姓名將於下期本欄揭曉。

廣告時間

你有某財團嘅黑幕想爆?你知邊間上市公司造假?
你仲想舉報地產霸權嘅不公?
歡迎你將財金界嘅寃屈或過癮八卦事,爆俾《壹仔》財經組知,一切報料,均會保密!

爆料熱線/whatsapp:6829 5929

    全站熱搜

    tvb4life 發表在 痞客邦 留言(0) 人氣()