爆壹爆

國內記者結局悲慘

Ads by Google

話說上個禮拜四,南方報業旗下嘅《廿一世紀經濟報導》,又被中共整頓,聽聞當日成班公安衝上報社,捉咗發行人兼報系執行老總沈顥、營運總經理陳東陽走,跟住下落不明,成個編輯部都呆咗,冇人敢出頭,只得沈顥老婆手持標語在報社外尋人。《廿一世紀》係國內數一數二嘅財經媒體,向來都算大膽爆料,幾年前仲夠膽爆溫家寶家族涉及商界利益,國內讀者都睇到 O晒嘴,估唔到份報紙夠膽咁樣「玩命」,當然有人又估,份報紙幕後財源係上海幫商人,可能牽涉更高層權鬥都未定。

 

當大家仲諗緊《廿一世紀》幾時出事,公安今年就終於搵到呢份報紙嘅「錯誤」,指控佢哋報紙搞「敲詐」,大公司肯俾廣告費就唱好,否則就唱衰,跟住就火燒連環船拉廿幾人,最終連最高層都落網。講開個發行人沈顥,佢係北大畢業高才生,《南方周末》新聞部出身,國內知名度好高,佢一手一腳搞起份《廿一世紀經濟報導》,其間都經歷好多嘢,個前妻更加因病早逝,多年來想上市也不成功,付出咁多冇點享受成果,唯一安慰都叫四十幾歲出人頭地啦,點知一場政治鬥爭就一鋪清袋。國內好多記者都講,跑新聞就係夾縫中打擦邊球,先領略到自由可貴,就算只係一剎那!


沈顥被公安捉走,其妻寫詩寄情﹙節錄﹚。 

政協個位有價講

若論資排輩,全國政協正副主席屬國家級領導人,當然比特區首長大啦,而政協委員又分全國及地區兩種,全國政協當然比地區政協高級啦,雖然當政協委員沒有什麼實權,但在名譽上及其他方面係有着數,難怪不少江湖人士,千方百計都想撈個政協來做,據江湖傳聞,以前全國政協底價要一千萬,還未計其他應酬使費,而地區政協則視乎在哪一個省市,如去到窮鄉僻壤地方,三、四十萬已可搞掂,依家江湖大哥冇番個政協牌頭,都叫做撈唔掂。
當上政協除咗有個名聲,仲有其他着數,例如過關出入境時可以行 VIP通道,甚至在內地遇上交警抄牌,只要 show一 show政協證件,即可以免抄及速速放行。爆哥有不少江湖朋友都有政協身份,佢哋一來可以享有以上着數,二來佢哋當呢個銜頭幫自己江湖身份洗底,上去識人及做生意時,遞上政協卡片,內地人唔多唔少都俾番幾分面嘅。

新義安細 B驚動向家龍頭

上月將軍澳、觀塘連環發生斬人事件,黑道即吹風,話係新義安上位古惑仔「細 B」,與同門「少君」內閧,雙方爭奪地下賭檔,搞到腥風血雨。 O記當然要即刻做嘢,諗住搵細 B傾偈,盡快平息江湖風暴,點知警察搵唔到細 B,原來佢走去歐洲歎世界,警察於是走去搵新義安家族龍頭,人稱「四眼龍」的華炎講數,叫佢「睇住」下面,唔好搞搞震,雖然華炎係新義安始創人個長子,但佢都八十歲,早已淡出江湖,不過影響力猶在。
細 B最近引起江湖熱話,話說佢認識好多大陸土豪,細 B打算牽頭收購勝和「刀文龍」隻賭船「中華之星」。細 B一向有生意頭腦,話說三年前佢捲入一宗勒索及恐嚇的法庭案件,案件指細 B曾聲稱:「我住半山,係有錢古惑仔。」其實江湖傳聞細 B喺佢尖沙咀地頭,開咗五六間藥房海味鋪,三年前有遊客在藥房被職員喊打喊殺,細 B都有份投資。

爆哥乜料

金融界撈家,穿梭黑白政商界,朋友遍布旺角至中環,每星期都八到唔同料,同《壹》仔讀者過吓癮!

    全站熱搜

    tvb4life 發表在 痞客邦 留言(0) 人氣()