有傳周融已被阿爺雪藏,反佔中大聯盟幾近摺埋,但吳秋北死撐話無,只係將精力轉搞國慶活動。 

八卦陣

反佔中摺埋 賴國慶

Ads by Google

去飲日子臨近,學生更加等唔切,以行動重奪公民廣場,抗命派氣勢一時無兩,但係一直打對台嘅「反佔中保普選大聯盟」,最近就完全銷聲匿跡,鋒頭更被前律師會會長何君堯搞嘅「保衞中環」運動搶晒,究竟反佔中係咪已經摺埋?大聯盟發起人兼發言人吳秋北死撐話,大聯盟依然存在,只係呢排集中精力搞國慶活動,亦無計劃去民主盛宴踩場。

 

至於前排紅到爆 seed嘅周融,左派流傳佢已經被雪藏,但「唔抽得」話無啲咁嘅事,因為罷課係學校事務,唔係佢擅長嗰瓣喎。咁薑蓉仲係唔係大聯盟中堅分子?佢就意有所指咁答:「唔好話淨係周生係中堅分子,所有參與大聯盟嘅人,都係中堅分子囉!」原來大聯盟個個都變咗鄭融、張融、孔融……收到收到。
唔搞活動,又無曝光,咁之前嗰條舉報罷課「恐怖熱線」又如何呢?根據吳秋北講,原來熱線仲運作緊,近日已隨時打得通,只收到零星滋擾來電,但佢答唔到每日收到幾多個舉報來電,又反問記者有乜好建議:「你有乜好建議?你有無啲更爆嘅方法?」睇嚟大聯盟已經江郎才盡,唔知係咪阿爺啲維穩費用晒?

戴耀廷囝囝參加罷課


戴耀廷星期五突然現身立法會外搵參加罷課嘅囝囝,有中學生好似追明星咁,即時要求同佢合照。 

學聯同學民唔等佔中去飲,上星期六凌晨開始同警方多次衝突,三子雖然講明唔會因此提前佔中,但仍然親身到場撐學生。不過,我哋發現戴耀廷早喺上星期五,已經靜雞雞去咗立法會對出嘅罷課場地,記者追問之下, Benny笑住話原來佢落嚟係搵仔,又承認囝囝參與罷課,但唔肯講係咪兩個囝囝都嚟咗,同埋究竟參加學聯嘅大專生罷課,定係學民嘅中學生罷課。
其實 Benny舊年接受傳媒訪問,已經大方承認,開過家庭會議後,其中一個囝囝唔贊成佔中,佢自己亦覺得仔女未滿十八歲唔應該參加佔中,又話教仔應該引發佢哋主動思考,尊重佢哋嘅想法,只不過事後多間左派傳媒即刻以此大做文章,大肆抹黑。而家 Benny囝囝坐言起行罷課,唔知呢啲左派傳媒會唔會出番篇文澄清吓。

遇襲學生獲免費牙


宣傳罷課被打崩門牙嘅周嘉浩話,暫時專注抗命爭普選,遲啲先去免費補牙。(郭永強攝) 

上星期五,千五名中學生罷課爭普選,可以話締造香港歷史。但罷課前一日,就讀沙田崇真中學嘅中六生周嘉浩,喺大圍呼籲市民支持罷課嘅時候遇襲,因而撞崩咗隻門牙。
事件曝光後,周同學話好多校友關心佢嘅情況,最驚喜嘅就係有牙醫主動聯絡佢,話會免費幫佢整番好隻牙。周同學喺遇襲當晚,仍堅持到禮賓府緝拿梁振英。佢同一位喺日本留學嘅男士吹水,對方同佢講,參與行動係因為嗰朝有人受襲。周同學好尷尬咁講咗句:「其實係我嚟囉。」佢覺得有人因為佢受襲一事,主動了解香港政治環境,就算受傷都係值得,但希望大家唔好將光環套喺佢身上。
周同學話,佢以前唔單只政治冷感,直頭係政治反感,對於你鬧我、我鬧你嘅政治新聞,完全係不聞不問。直至人大落閘,覺得俾人踩到上心口,於是決定行出嚟。為咗應付嚟緊嘅抗爭,周同學決定暫時唔理隻牙,一心一意繼續抗命,爭取普選。

    全站熱搜

    tvb4life 發表在 痞客邦 留言(0) 人氣()