探熱針

石頭出血 抗無綫涼薄 發哥王晶吹雞派錢

Ads by Google

無綫賺錢照炒人,大好友曾志偉及譚詠麟也睇唔過眼,齊撐黑衣行動,大鬧大台涼薄。算到石頭都出血,但對有份投資,重酬請來周潤發、張家輝兩影帝孭飛的《賭城風雲 2》一班台前幕後員工就扮闊佬,搞煞科宴大吃大喝,又使大幾十萬玩大抽獎。

馬會包廂開餐

《賭城風雲》在過去的農曆年大收旺場,香港錄得三千五百萬票房,內地更收過五億人仔,添食拍續集,發哥周潤發繼續留低外,加碼搵埋張家輝、劉嘉玲製造巨星陣容班底,有份出錢,無綫唔蝕底,安插親生女高海寧、朱晨麗和黃德斌落場演一角。上週五(九月二十六日)晚,《賭城 2》在跑馬地馬會搞煞科宴,平日拍劇要藝人自掏腰包食飯慶功的無綫,破例做闊佬,聯同其他投資者包括太陽娛樂包起馬會廂房,請百五人食自助餐。
晚上七點,工作人員和無綫友高海寧、朱晨麗、張慧雯及黃德斌陸續出現,而近日剝贏陳靜做女一的晶女郎文凱玲、盛品儒緋聞女友 Hazel亦孖住到場;主角發哥發嫂、張家輝同經理人鍾珍等,亦於八點坐七人車抵達,女主角劉嘉玲跟余文樂因身在外地未有出席。
有得食,大家開心,一班老細更加識做,一早傾好會派錢搞餘興。
「其實大家都冇諗過有抽獎,除咗一齊食餐飯,班手足最開心係排隊同發哥合照,發哥好識做,食完飯自動埋位同我哋玩自拍,之後老闆話派錢抽獎,又食又拎,大家都開心。」一名工作人員透露。


劉偉強、發哥和王晶三個男人在台上講完一輪,即開始抽獎派錢。 

Hazel抽到五百蚊,由張家輝負責頒獎。 

代表太陽娛樂的 Paco,當晚一早到場,跟幕後工作人員傾足成晚。

未開飯前,黃德斌跟幕後工作人員雞啄唔斷。 

無綫力捧的高海寧,在現場開心玩影相。 

《賭城 2》在泰國取景,陪住發哥的發嫂跟一班藝人都十分老友。 

朱晨麗當晚帶住經理人一齊出席煞科宴,齊齊抽到獎。 

發哥要加碼

莫講話食,大台藝人做節目隨時冇得計騷錢,極其縮骨,今次肯夾份請食一餐仲有現金抽,破晒例!據了解,當晚有超過一百個現金獎,數目由五千蚊到五百蚊。
「本來只係準備咗一百個現金獎,不過有啲幕後抽唔到,發哥唔想大家失望,即場叫家輝、王晶、劉偉強再加碼,攞多一嚿錢再抽,最後加到一百二十幾個現金獎,班老細前後應該攞咗幾十萬現金出嚟。之後有幕後吹雞去唱 K,晶哥都認頭埋單,比起企業化大台賺少咗都即刻炒人,電影班底始終較有人情味。」工作人員說。


何超蓮跟住王晶女王子涵到煞科宴湊熱鬧,半場才出現的她,之後又跟黃德斌、何浩文(右二)齊齊離開。 

《賭城 2》除有發哥外,更有影后級劉嘉玲,陣容強勁。 

晶女郎文凱玲近日得寵指數高,有份拍《賭城 2》的她,準時出席煞科宴。

發哥同發嫂走人,導演劉偉強送他們上車。 

被踢爆節目《 Sunday扮嘢王》無騷錢計,一班藝人為求有得留低繼續做,唔敢出聲投訴無綫。 

苗僑偉跟曾志偉唱雙簧,大鬧無綫賺錢依然裁員。

撰文、攝影:娛樂組

全站熱搜

tvb4life 發表在 痞客邦 留言(0) 人氣()