《木桶忍者》的成功,令 Kenneth投放更多資源在手機遊戲上,並成立遊戲開發團隊 4 Play Studio。今年 9月上架的手機遊戲《魔卡勇者》,是 4 Play Studio的第一個作品,希望進一步發展手機遊戲市場。 

青雲路

手機遊戲 木桶忍者 滾出 3千萬

Ads by Google

早前手機遊戲《神魔之塔》被收購股權的消息,雖然最終未能成事,但令更多人看到手機遊戲市場的發展潛力。李建和( Kenneth)一直對 IT有濃厚興趣,與朋友在 10年創立四方創意有限公司,主要開發手機 app。在 12年首次推出手機遊戲《木桶忍者》,成功在今年吸引另一集團以 3千萬收購中國營運權,他以此為契機,成立手機遊戲開發團隊,希望可以擴闊公司的業務。

 


《木桶忍者》角色設定走可愛路線,故受年輕人歡迎。 

《木桶忍者》是四方創意有限公司(下簡稱四方創意),開發的首個手機遊戲,在 12年以英文版在香港推出後,累積下載超過 25萬次,今年更被彩虹集團看中其潛力,以 3,000萬收購遊戲的中國營運權。 Kenneth說︰「當時只係出咗英文版,反應都唔錯,估唔到半年後內地出咗好多類似嘅手機 game,知道有市場,但對點進入內地市場唔熟悉,無幾耐彩虹集團話對《木桶忍者》有興趣,中國營運上嘅嘢可以交畀佢搞,最終喺今年年頭傾成合作。」
今年 40歲的 Kenneth是四方創意的行政總裁, IT夢早在十多年前開始萌芽,他在工業學院修讀工程,但他對 IT業情有獨鍾,於 00年與朋友創立 IT公司,「讀書時有學過編寫 programme,畢業後入咗政府做嘢,試過編寫程式。當時好興 IT嘢,自己仲去 OU讀 computer science,之後同朋友一齊整咗個幫人訂機票嘅網頁。」

科網爆破

怎料科網爆破,及後又發生 SARS事件,令 Kenneth的創業生涯受到很大打擊,「訂機票要墊支機票錢,做落發覺唔夠資本,科網爆破於是唔做。因為幫人訂機票,我哋拎咗旅行代理商牌照,諗住轉做幫人訂度假屋嘅生意,點知又撞正 SARS,覺得冇得做於是結埋業。之後先知啲人喺 SARS期間諗住去郊外避難,度假屋租金升咗 3倍都 book滿,真係揼心!」
兩次創業,雖帶來了失敗,但 Kenneth也賺了不少營商經驗,「有理想係好,但有時都要面對現實,創業都要穩陣行先,有咗資本先容易開創自己嘅夢想。」 03年尾, Kenneth在天后開了藝術家咖啡店,成為他創立 IT事業的基地,至今仍在經營。

由 cafe開始

10年, Kenneth看見手機 app市場的發展潛力,決定與 3名朋友合資開設四方創意有限公司,為企業開發手機 app及提供技術支援,「公司成立時,手機 app仲未喺香港好盛行,有個朋友之前幫外國公司寫開 app,自己又想做番 IT嘢,幾個朋友傾傾吓就決定搞 IT公司。當時喺我間 cafe一個角落當辦公地方, 4個人就逼喺一張枱上做嘢,租金同伙食費都唔使,成本慳唔少。」
半年後,公司已開始步上軌道,「有位拍擋同出版業嘅人士都熟,第一單生意係幫電子漫畫雜誌《 DCT Manga》寫一個電子書架 app,估唔到推出冇耐就成為中國同香港地區 Apple App Store排行榜 Top 10。雖然個 job只係賺到幾萬蚊,但吸引到其他企業留意,好似新鴻基、數碼港及三聯書店等,都搵我哋寫 app,每件 job製作費大約 10至 40萬不等,令公司發展得好快。」


《木桶忍者》是一款益智類遊戲,玩家要操縱裝着忍者的木桶,在類似迷宮的場景滾動,把場上的怪物清滅掉,拯救村莊。 

《魔卡勇者》的玩法是利用手上的角色,將敵人擊敗作為通關條件,遊戲採用 3× 3撲克牌魔法陣的玩法,玩家每次可放進 3張撲克牌,在 9宮格內組出一對、同色、三條等不同組合,作出多段 COMBO以攻擊對手。 

管理難題


Kenneth好重視與員工的關係,不時會參與他們的打機活動,增強彼此的了解。 

公司發展迅速, Kenneth則要面對管理上的難題,「公司擴展得太快,中間嘅管理人手唔夠,公司有約 70%係 80、 90後,起初會覺得佢哋冇責任感,愈鬧愈反抗,慢慢先掌握到管理竅門。最重要係溝通,以平輩嘅語氣會令佢哋較容易接受意見;另外仲要畀到佢哋對公司嘅歸屬感,同事可以喺每星期五開會時提出一個自己嘅建議,我哋會討論可唔可行,好似近排出咗嘅《好代駕》同《魔卡勇者》遊戲 app,都係同事提出想法,之後逐漸完善開發出嚟。」
四方創意有限公司發展至今,除了香港外,在廈門及廣州也有成立分公司,員工由最初只有 Kenneth及 3名拍檔,現時合共有 2百多人,每年營業額過千萬。
身為行政總裁的 Kenneth, 4年來均沒有放過假,他笑說自己是公司打雜︰「公司創立前期得 4個人,啲嘢唔係你做就我做,趕 project時更加唔使瞓添!之後公司規模大咗,要管理人手,去到𠵱家除咗不時開會定下公司發展方向,仲要飛去世界各地,搵合作機會。當然,我都會參與員工培訓。」

打強心針

《木桶忍者》獲得收購中國營運權,讓 Kenneth和拍檔們猶如打上一支強心針,在今年加大對手機遊戲的投入度,成立獨立團隊 4 Play Studio,「最初成立公司時,我哋都已經想開發手機遊戲,喺發展穩定後,我哋有個手機遊戲開發團隊,但只係得 5、 6個人。收購事件令我哋增加信心,成立人數約 20人嘅團隊,嚟緊會投放多啲資源喺手機遊戲上,想喺 game app上有進一步發展。」
《魔卡勇者》在 9月初推出, Kenneth說:「 10月開始會加強對《魔卡勇者》嘅宣傳,我哋搵咗天堂鳥做代言人,仲會同新城電台合作搞女神選舉,畀大家投票選出最高票數嘅 15位女神,我哋會為佢哋度身設計一個角色,希望增強大家嘅參與感。 game app上我哋算係後起之輩,希望可以做出更好成績。」


4 Play Studio的工作地方掛滿了他們設計的作品,令工作環境更有歸屬感。 

作為四方創意起始基地的藝術家咖啡店位於天后,簡單的裝潢, 4個人的公司就是由一張桌上開始。 

Kenneth聘請了 Mark(左)作為業務拓展總監,把公司管理作一改革,如加設娛樂場所時間及重新設計辦公室,令 80、 90後有更多自由發揮的空間。

後記︰娛樂時間

想不到身居高位的 Kenneth,原來也是一名打機愛好者,「自己好鍾意打機,得閒就會玩吓,每個星期五 game組都會有個娛樂時間,我會同班同事一齊玩電腦遊戲。」對於同是愛好打機的記者來說,無疑非常吸引,公司應讓記者每週有固定的打機娛樂時間,可能會激發工作潛能。

點入行?

Kenneth表示隨着公司發展,不時會聘請手機程式設計員,「公司會畀應徵者做一份 MC測驗,考核基本能力後,再會安排面試,會睇番佢肯唔肯學嘢,同埋同人相處得唔得,最緊要係對工作有熱誠。」

晉升階梯

Senior Mobile Application Developer
$17,000-$20,000( 3年或以上經驗)

Mobile Application Developer
$13,000-$16,000( 2年或以上經驗)

Junior Mobile Application Developer
$11,000-$13,000(大學畢業)

*人工以坊間公司為參考
四方創意有限公司
mailto:recruitment@4d.com.hk


撰文:曾志恒
攝影:傅新發

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()