專題 Log In

小房車環保價大翻身

Ads by Google

Audi A3 Sedan 1.4 TFSI Ultra Mazda3 Skyactiv-G 1.5 JDM
人人想環保,但唔係人人願意付出代價。
但環保得嚟有着數,就係人都肯為地球出力!
香港買車就有環保車選擇,係咪真係環保未必知,但必定有稅務寬減,車價可以平幾萬!
利用呢個制度,仲可以谷起唔少車款。
正如沉寂已久嘅小房車,今年就終於有兩款環保車,約$0.9/km油費認真經濟,外形設備仲夠晒高級,減稅後只係 30萬有找,有望再次帶起小房車熱潮!

減足 45%

過去幾年 1.5公升級小房車市場畀揭背車仔搶晒,除咗因為設計老套之外,攞唔到環保車稅務優惠令車價唔吸引亦係原因之一。今年上半年冇一部 1.5公升級房車係環保車,但下半年歐日車廠就齊齊發力!今年 Mazda3出最新第 3代,年初抵港嘅 1.5房車版都未做到環保車,不過上月就引入 Mazda3 Skyactiv-G 1.5 JDM日本本土版,耗油由 17.54km/L降至 19.5km/L,終於達到 1,311-1,421kg車重級別嘅標準,可減免汽車首次登記稅 45%,雖然廿幾萬車價減唔足上限$75,000,但都減咗$39,426稅款,而且全數反映嘅車價上面,令定價只需$235,000,買家變相慳咗成 4萬蚊!

 

另一方面, Audi入門級 A3一向冇房車版,但上年轉款出完揭背版 Sportback之後,今年就力谷 Audi A3 Sedan 1.4 TFSI ultra,雖然原價比揭背版貴$46,116,但車身重咗 30kg,升上 1,311-1,421kg車重級別,令 5.1L/100km耗油達到呢個重量級別嘅環保車標準,取得$52,041稅務優惠後反而比揭背版平$5,925,不單成為全廠最平車款,外形又更似 A4、 A6等高級房車,吸引力自然大增!


1.5公升房車用到 18吋十柱軨夠晒誇,好在唔使加錢兼耗油數據只係 19.5km/L。 

原裝已有 Bi-Xenon頭燈連 LED日行燈,仲有自動開關同轉向功能。 

環保車之沿革


BMW 750 LiA用 4.4公升 V8 twin turbo引擎,有成 450匹,平均耗油達 8.6L/100km, 2013年都竟然做到環保車。 

正常邏輯下,耗油同廢氣排放愈低嘅車就愈環保。不過香港環保署 2010年開始嘅環保車制度並唔係咁,而係將車輛以重量劃分成多個組別,愈重嘅組別容許嘅耗油同廢排就愈多,車輛只要喺佢個重量組別內達到標準,就可以成為環保車享有首次登記稅優惠。
有咗呢個制度,汽車代理就開始因應環保車規格而選擇性引入新車,有啲差不多可以升高一個重量級別嘅車,就加 option加到佢夠重,再配上最細 c.c.嘅引擎,咁就可以輕易攞到稅務優惠。所以 2013年高峰期時就有成 161款環保車,連 M-Benz S350L同 BMW 750L呢啲成兩噸幾嘅長陣豪房都竟然係環保車!好在環保署今年開始收緊規例,踢走大堆「抽水」豪車,令今年環保車銳減至 33款,「相對環保」嘅程度更高!

 

歷年環保車目錄:http://www.epd.gov.hk/epd/tc_chi/environmentinhk/air/prob_solutions/Profits_Tax_Deduction_EFV_Models.html 

日版升級  Mazda3 Skycativ-G1.5 JDM

其實 Mazda3 1.5房車版 3月已抵港,但當時 spec.並入唔到環保車之列,不過半年後再引入 JDM(Japanese Domestic Model)日本版就終於達到環保車規格。奇怪嘅係減稅後嘅 Mazda3 JDM竟然比初期嘅 R-Grade豪華版仲要賣貴一萬!甚至貴過高一級 Mazda6新出嘅 2.0 JDM超齋版 2萬幾!難道代理食水深咗?非也!寬減嘅稅款的確全數減番喺車價上面,只係 Mazda3 JDM本身嘅車價貴咗,原因就係加咗更多 option設備。外觀上,輪圈由 16吋 upgrade成 18吋;操控上,軚盤加咗+/-波掣;享受上, 6聲道音響升級為 9聲道 BOSE Premium Sound音響,是但加一項嘅價值都超過一萬,加晒之後設備同 30萬嘅 Mazda6 2.5 T-Grade已經冇乜分別,所以 Mazda3 JDM係真係抵咗嘅!


唔對比吓都唔知,原來 Mazda3 JDM中控台設計同 A3 Sedan都幾似,都係簡單而 sporty,仲一樣用一條過金屬裝飾,不過個 7吋 mon.唔可以收埋,勝在有雙區恆溫冷氣,設備搭夠。 

極之少見房車會將大轉數表擺正喺表板中間,左右兩邊仲有 LCD屏幕,設計似足 McLaren! 

JDM賣貴過年初嘅 R-Grade版,但加咗 keyless着車掣、軚盤+/-波掣同智能藍芽 handsfree。

大銀幕底設有投射表板,唔只可以睇車速,連簡單導航方向提示都有。 

Mazda高級車先會用嘅 Bose音響,喺 JDM版係原裝設備,提供 9聲道環迴立體聲。 

7吋圓邊銀框大 mon.設計好似 M-Benz新車, JDM版取消咗 iELOOP系統,但仍有 iStop停車熄匙系統。

以今日準則衡量,天窗算係細咗啲,但總可以略略提高開揚感。 

司機位有電動調校嘅半桶形皮座用紅色縫線外觀夠晒辣,但唔夠貼身,包圍力未算出色。 

後座空間同 A3 Sedan差不多,但皮革用料明顯較薄同包裹得唔夠緊致,配格仔地毯亦 over咗。

平買豪牌  Audi A3 Sedan 1.4 TFSI ultra

雖然 Audi A3 Sedan同 Mazda3 JDM都係小房車,但品牌形象爭得遠,以前想買 Audi嘅房車最平嘅 A4都要 40幾萬,但今次 A3 Sedan 1.4 TFSI ultra有環保稅務寬減,只係 30萬有找!當然,$287,800嘅定價只係基本,喺 Mazda3 JDM身上嘅原裝設備如 keyless著車掣、軚盤+/-波掣、天窗同藍芽 handsfree等,喺 A3 Sedan身上都係 option,如果要好似測試車咁齊料同加埋 S-Line包圍、 17吋軨等,就要加多未連稅都要近 4萬嘅 Luxury Package同 Sports Package,車價起碼 35萬!不過除咗空間細少少,其實齊料嘅 A3 Sedan已經接近 A4咁豪,而且外形更加 sporty。最緊要係唔追求設備嘅人,真係可以 30萬有找揸 Audi房車!


雖然個款差唔遠,但 A3 Sedan中控台用料造工都高兩班,而且伸縮 mon.夠 hi-tech、圓形出風口更 sporty,將功能掣收入金屬裝飾條入面又有 design味。 

表板同其他 Audi冇乜分別,簡單易睇,中間仲有小屏幕。 

軚盤遙控掣係標準裝備,但呢款有埋+/-波掣嘅粗身平底軚環就要加錢先有,未連稅$4,400。

5.8吋 mon.配合 MMI控制器可以操作全車電子系統,而可以伸縮,唔用時收入中控台底。 

金屬飾條之間設有功能掣, Audi drive select駕駛模式同停車熄匙系統開關都喺度。 

Audi drive select有 5種駕駛模式,其中最勁係 Individual模式,可以設定引擎、波箱反應及軚盤重力。

Panoramic天幕係比 Mazda3 JDM個傳統天窗大,但都未伸到去後座。 

前座款式基本上同 S3一樣,而且兩張都有電動,只係冇咗格紋車花同 S3標誌,承托力同包圍力都好出色。 

後座腳部同頭部空間都足夠載成年壯漢,但同 Mazda3 Sdean一樣中間位地台有大凸槽,如中間位載成人,雙腳會好迫。

 


Audi A3 Sedan車身比 Mazda3 JDM短 124mm、闊 1mm、低 34mm,硬朗線條加上拍攝車 option嘅 S-Line大包圍,比流線設計嘅 Mazda3更有跑格。 

Mazda3 Skycativ-G1.5 JDM spec.
引擎: 1,496c.c.直四
馬力: 111ps/6,000rpm
扭力: 14.7kgm/3,500rpm
傳動: 6前速自動、附+/-模式
車身: 4,580 x 1,795 x 1,450(mm)
車重: 1,320kg
耗油: 19.5km/L
售價:$235,000
查詢:宏益汽車(3768 4888)

Audi A3 Sedan 1.4 TFSI ultra
引擎: 1,395c.c.直四 turbo
馬力: 122 hp/ 5,000-6,000 rpm
扭力: 20.4kgm/ 1,400- 4,000 rpm
傳動: 7前速雙離合器自動、附+/-模式
車身: 4,456 x 1,796 x 1,416(mm)
車重: 1,330kg
耗油: 5.1L/100km
售價:$287,800起
查詢: Audi HK(3465 0000)

Mazda3都有 hybrid

香港嘅 Mazda3分為 1.5公升房車版同 2.0公升揭背版,但其實日本房車版仲有一個 hybrid型號,以 2.0公升引擎為基礎,但馬力就由 155匹降至 99匹,另外再加一個 82匹電摩打同喺後座、尾箱之間裝充電池,令耗油低至 30.8km/L,以香港油費計即係行$0.54/km!裝備方面, Mazda3 Hybrid同 Toyota啲 hybrid車一樣用 CVT波箱、有 hybrid模式運作圖睇,夠電同低速亦一樣可以用 EV純電動行走,但喺日本車價就貴 1.5公升型號成 68萬日圓,如果引入香港應該要賣 30萬,完全超過咗日本小房車嘅價格層。

A3仲有開篷版

Audi A3車系初期只有三門同五門揭背版,但其實第 2代款尾時已追加咗雙門開篷版,只係香港冇引入。而最新第 3代除咗首次出現嘅四門房車版外,其實一樣有雙門開篷版,同其他 Audi開篷車一樣用軟篷, A柱同車廂外圍加咗銀色金屬框,開、關篷時間只係 18秒, 50km/h下都可運作,而尾箱空間喺開、關篷時就分別有 275L同 320L。 A3 Cabriolet一樣有 1.4、 1.8或 2.0公升 TFSI引擎選擇,因為軟篷機構只重 50kg,所以 1.4開篷版只比房車版重 15kg, 10.2秒 0-100km/h時間亦只係慢咗 0.9秒。

性能隔世


喺西貢上斜路停定再起步時,兩車力量差距最明顯, A3 Sedan全力加速仍然可以有彈出嘅感覺,但 Mazda3 JDM就谷一陣等高轉數先有力,始終 A3 Sedan扭力大 5.7kgm,而且 turbo偈低至 1,400rpm已經可以發出最大扭力。 

A3 Sedan同 Mazda3 JDM價錢相差咁多,當然唔只係品牌效應,性能上嘅差別亦好大。雖然大家嘅耗油都係 5.1L/100km,油費即係約$0.85/km,但 A3 Sedan用嘅係 VW集團出晒名慳油好力嘅 1.4公升 turbo引擎配 7速雙離合器波箱,仲連駕駛模式選擇系統都有; Mazda3就只係自然吸氣,而且 JDM版嘅 Skyactiv-G引擎為降低耗油而改良,仲取消埋 iELOOP電容式動能回收系統,所以馬力就由前期版嘅 120匹下降至 110匹,數字上已經比 A3 Sedan少 12匹,實際上嘅加速感更起碼差 30%。
不過喺操控上 Mazda3 JDM亦唔係輸晒,車架紮實程度都拍得住 A3 Sedan, 6速波箱反應亦唔算慢,而且彎路極限高,喺日本小房車之中已經係出類拔萃。只係避震設定以日用性為主,激劈時車身傾幅較明顯,但柔住揸可以話係舒服得嚟有駕駛樂趣。反觀 A3 Sedan嘅操控就硬橋硬馬得多,溝通感好似跑車咁強烈,好玩程度唔會輸畀揭背版,令人好有衝動開快車,設定同 Mazda3 JDM完全係兩回事。

Mazda3 Skycativ-G1.5 JDM

 


日本版 1.5公升 Skyactiv-G引擎以慳油為大前題,比前期版少咗 9匹,但耗油由 17.54km/L降至 19.5km/L,成功打入環保車之列,性能同其他日本 1.5公升引擎差唔多。 

今代改用傳統 6速波箱令+/-波更好玩,雖然反應比唔上 A3 Sedan嘅 7速雙離合器波箱,但一樣有歐洲車常見嘅多媒體操控器,而且雙區恆溫冷氣高級啲。 

Audi A3 Sedan 1.4 TFSI ultra

 


1.4公升 turbo引擎全 VW集團通用,性能同可靠性唔使懷疑,雖然房車版比揭背版調低咗 3匹,但 0-100km/h一樣係 9.3秒,而且 211km/h極速高咗 5km/h。 

加咗 Sports Package連波棍都有型啲,而且 MMI多媒體操控器同其他 Audi一樣款,仲比 Mazda3 JDM多出一個 hi-tech電子手掣。 

VW Jetta GT更加抵

冇被列為環保車嘅 1.5公升小房車都唔一定唔抵買, Volkswagen趁住呢期大家都谷小房車,就乘勢谷吓 Jetta。但為咗唔同同集團 Audi A3 Sedan 1.4 TFSI入門版正面對撼,就攞高一級嘅 Jetta GT做特價減 3萬,配上 160匹 1.4公升 twin-charge引擎配 7速 DSG雙離合器波箱,都係賣$249,880, 6.0L/100km耗油亦只係比兩款環保小房車高 0.9L/100km。最吸引係原裝車已極齊料, 17吋軨、天窗、電暖前座、軚盤+/-波、雙區恆溫冷氣等設備,唔使加錢畀晒你!


撰文:陳致新
攝影:葉偉豪

全站熱搜

tvb4life 發表在 痞客邦 留言(0) 人氣()