新車激試

超班馬 Porsche Macan Turbo

Ads by Google

一早已預告今年嘅中小型 SUV市場競爭會好激烈,全因 Porsche Macan年初以低至$628,000公開發售,所有車廠都嚴陣以待,務求喺 Macan登陸前盡散貨,又或火速引入現貨新車,搶頭啖湯。 Macan同 Macan S都供不應求,而最頂級嘅 Macan Turbo都唔見得容易買到!據知今日訂車都要 2015年底先交車!比 911 Turbo S更巴閉!好彩代理有引入 demo car,唔使等出年,今日即刻有得試呢部由內到外都係超班馬嘅 Macan Turbo。

Turbo車型好易認

唔理係乜型號 Macan,總之今日有車出到牌揸出街,都代表你係首批貴賓客戶,又或係肯付出炒價買水貨。 iPhone6一星期就因大量供貨炒燶,但 Macan就堅係造唔切,今年內都罕有,情況比 iPhone6有過之而無不及!最頂級 Macan Turbo外表一定係 3個型號當中最有跑味,車頭、車尾底都有專用導風設計,而且泵把位嘅橫間巧妙地藏有日間行車燈同指揮燈,低調得嚟好易認。此外,測試車已經裝上額外選配嘅氣壓避震,可以設定 3階段高度,包括「 Normal」、「 Sport」及可降低 10mm嘅「 Sport Plus」模式同升高 40mm嘅「 Off-Road」模式。唔好睇少升高 40mm,配合自動分配動力嘅四驅系統,可以有相當唔錯嘅越野表現。


泵把入風口橫間藏有指揮燈及日間燈,令人一望就知係 Turbo型號,唔使靠誇張包圍 showoff,型! 

車尾底用銀色金屬擾流板,與同樣銀色嘅四出式尾喉襯到絕。 

後座可以摺平同尾箱成為一個平坦空間,而且尾箱內有按掣,一按即可令車尾下降至最矮水平,方便上落物件。 

後座門加設手動太陽簾,一來可阻隔猛烈陽光;二來增加車廂私隱。 

跑感興舒適並存

 


後座空間唔算好寬敞,當成雙座位看待會更好,中間位留作臨時使用吧。 

前座表現極好,有多個位置可調節承托力,筆者甚至覺得佢比 Cayenne嘅前座更出色。 

後座冷氣風口有簡單設定掣,而且可調節坐墊電暖功能。 

天幕車頂覆蓋面至後座頂,令到空間感更強,而且前半部可以打開,秋天用一流。 

可能係最好飛 SUV

曾經以為 BMW X5及 Porsche Cayenne會係最好飛嘅 SUV,但 Macan Turbo完全超越前者!主要原因係車身實在小巧,配合精確嘅四驅系統同氣壓懸掛,令到彎路表現異常地靈活,扭軚令車頭入彎,車尾就同時緊隨,表現中性又穩定。當然,要令 Macan Turbo好飛,出色下盤都唔夠, 400匹馬力、 3.6公升 twin turbo引擎先係重點!以「 Sport」模式大概只發揮 7成功力,用「 Sport Plus」模式先係精髓所在!波箱會刻意保持高轉行車,往往可以自主令轉數達紅區先轉波,榨取最大馬力!出彎向油門施壓,感到力量源源不絕扯部車出彎,筆者印象中冇一部 SUV可以做到同樣效果。此外,懸掛其實都會進入最硬狀態,轉向比例亦快啲,一個「 Sport Plus」掣就可以即時變身!


駕駛艙佈局有 Panamera影子,大部份操作系統都喺波棍旁操作。 

3圓表板以轉數表置中,右旁就係一個多用途顯示屏,近年 Porsche出品特色。 

波棍左旁一列按鈕主要係令 Macan Turbo「變身」跑車,其中懸掛(綠圈示)就算以「 Normal」模式行車,都有 2段軟硬設定。

全車最貴 option就係呢套 Burmester High-End音響系統,稅前價要$34,000,不過勁靚聲,物有所值嘅。 

「 Off-Road」按鈕(綠圈示)開啟後,車身會升到最高,而且自動解除「 Sport」或「 Sport Plus」模式。 

全新 3.6公升雙 turbo引擎能輸出 400匹馬力,已去到 Cayenne S嘅 4.8公升 V8水平,同級中無敵手。

裝上氣壓懸掛之後,車身可以升高離地距達到 230mm,令到車頭進入角增加至 26.6度!爬坡冇難度! 

真係超班冇對手

以 Porsche Macan Turbo咁嘅身形配 400匹馬力,仲要唔加 option都要百二萬車價,市場上根本冇對手!全因差唔多大細嘅 SUV如 Audi SQ5及 BMW X3 xDrive35i,馬力只去到 3百幾匹水平,車價更只係 Macan Turbo嘅 5至 7成,冇得鬥!但另一個角度睇,呢兩款車都抵玩!

Porsche Macan Turbo Spec.

引擎: 3,604c.c. V6 twin turbo
馬力: 400hp/6,000rpm
扭力: 56.1kgm/1,350-4,500rpm
傳動: 7前速自動、附+/-模式
懸掛:前雙搖臂、後梯形連桿
制動:前、後透氣碟
車身: 4,699 X 1,923 X 1,624( mm)
軸距: 2,807mm
車重: 2,000kg
耗油: 8.9L-9.2L/100km
0-100km/h: 4.8秒
車價:$1,260,001起
查詢: Porsche Centre HK( 2926 2911)

同根兄弟 Audi SQ5

SQ5同 Macan用同一底盤已經唔係秘密,不過 SQ5取向就斯文好多。配用 354匹、 3.0公升 supercharged引擎,加速只比 Macan Turbo慢少少,同埋 Off-Road設定冇咁多元化。舒適性方面, SQ5可能更勝一籌,空間大少少,同樣有天幕車頂。
車價$789,800起

有待升級 BMW X3 xDrive35i

當 Audi同 Porsche都有高性能 SUV時, BMW仍然未為 X3車系推出頂級 M版,現時最堅只係 X3 xDrive35i,配 306匹、 3.0公升 turbo引擎,加速同 Macan Turbo有距離。不過操控方面攞分,車身重心比較低,揸起上嚟似旅行車。
車價$668,000起


撰文:袁國基
攝影:葉偉豪

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()