洛文話好喜歡 Enterbay隻完成品,唔只像真,仲真係雕到佢個 style、佢陣除出嚟! 

漫遊毒物

洛文快閃訪港會 fans 「我係 One and Only!」

Ads by Google

上星期,前 NBA公牛隊冠軍人馬兼 7屆籃板王 Dennis Rodman,應 1/6figure製作公司 Enterbay之邀,來港為佢隻蠟像級超像真 NBA Real Masterpiece 1/6 figure搞簽名會,當日有幾十個買家能跟佢見面合照,開頭主持笑言驚佢發惡打人,但其實洛文根本就勁 nice,雖然開口就話全世界都搵唔到第二個洛文,但就絕對親民,不論男女老幼佢都一樣貼晒身合照,冇托過手睜!

冇第二個做到 7屆籃板王


洛文話自己退役多年,估唔到香港仲咁多 fans,好想留耐啲,同香港後生仔交流籃球心得。 

好多人認為洛文係瘋癲而不可理喻,但記者見過真人後,覺得一切都只係假象,洛文根本就係一個「食神」,永遠唔畀你估到佢諗緊乜。總之佢想做就去做,但工作起來係超投入,好似當日訪問咁,雖然係短,但開口句句中冇廢話,佢認為世上每個球員都係獨一無二,好鬼謙,但謙得來又強調世上只得一個洛文,雖話都幾欣賞 Kevin Love同埋 Kenneth Faried,跟佢一樣唔介意做 dirty work,但兩位後輩有排都未可以好似佢咁做到 7屆籃板王,霸氣!

識得揀 一定係 Shaq做對手

記者大擔挑戰佢,問如果要 Enterbay出隻 figure跟你 1 on 1,邊個夠格跟你對戰?佢話:「一定係 Shaq O N'eal啦!佢高我成個頭,又大隻,同佢對打真係唔易。」自認強者,但亦識英雄重英雄,自信同自大係兩樣嘢!經此一見,我相信好多 fans跟我一樣,比以前更了解、更愛洛文!呢隻 figure,要買呀!


「万刀甲」都去做小 fans,簽名要簽埋件洛文 tee!你睇 Alex興奮到濕晒呀! 

當日有幾位 fans抽中玩遊戲,用 Enterbay呢隻超靚 figure扭出經典動作。 

畀你估到就唔係籃板王啦

洛文來自單親貧窮家庭,曾經做過洗車同機場看更, 21歲忽然再發育飆高至 6呎 8吋,正式踏上籃球路,後在別名「 Bad Boys」的 NBA底特律活塞隊中,搵到一班值得賣命流血嘅好兄弟,更奪得兩次 NBA總冠軍,活塞的星散令洛文再嘗失去「家人」的痛,在自傳中更透露過曾萌生自殺意欲。
好在後來禪師 Phil Jackson成為佢第二位伯樂,頭髮染成紅色的洛文在球場內盡力「做好自己」,甘於在佐敦、柏賓身後做粗活,而在場外就盡力「做自己」,各種瘋癲事一次比一次喪!畀你估到就唔係籃板王洛文啦!


洛文 2011年入選 NBA名人堂,由公牛禪師 Phil Jackson負責頒獎。 

洛文成名於活塞隊, 10號球衣亦為佢永遠封印。 

原來《古惑仔》入面都有個老翻版洛文,不過係奸角。

《男兒當入樽》籃板王櫻木花道,正係向洛文致敬。 

96年出自傳,竟然反串扮新娘舉行簽名會,果然係想到乜做乜。 

近年最爆就係去北韓作親善訪問,跟金正恩主席咬耳仔。

見 ISIS領導人!洛文:「我講你又信?」

好多人認為洛文已經痴鬼咗,但記者覺得佢頭腦其實非常清晰,好似 9月尾出發到香港見 fans時,洛文同 L.A.跟尾到機場的狗仔隊笑言係去同 ISIS伊斯蘭國高層會面;後來卻聲明自己只係睇唔過眼 ISIS所在所為,希望佢哋唔好再濫殺無辜,但唔會傻到去戰場,只係吹水玩記者,究竟係佢傻定係聽乜寫乜嘅美國記者蠢?


撰文:鍾世傑
攝影:彭自維

全站熱搜

tvb4life 發表在 痞客邦 留言(0) 人氣()