今日好玩嘢

笑住入喊入出  Fright Dome@山頂廣場

Ads by Google

萬聖節年年有,鬼屋年年多,今年就有美國拉斯維加斯驚嚇巔峰嘅鬼屋 Fright Dome空降香港山頂廣場,成為亞洲首個兼全球第二個 Fright Dome嘅所在地。
話明「驚嚇巔峰」點會係小兒科,成個 Fright Dome設有兩個主題區:「殺人小丑」&「德州電鋸殺人狂」,保證令你精神崩潰,笑住入喊住出!

「殺人小丑」 Killing Clown 4D演技 1st Class

你問 10個人最驚鬼屋啲乜,我相信有 9點 9個都會答你「係人」! Jason Egan係 Hollywood數一數二嘅鬼屋創作人,花咗超過十年時間創作 Hollywood最頂尖嘅鬼屋人物角色,當中有唔少仲曾經喺 Hollywood驚嚇電影中演出!今次佢親自訓練本地演員,訓練到佢哋 24小時、每分每秒都喺度入緊戲!你……小心啲啊……


「殺人小丑」當然係 sell小丑,不過咁易比你估到晒就唔算頂級啦!呢間鬼屋最大特色係入場之前要佩戴一副勁 3D嘅眼鏡,先可以感受到勁 4D嘅現場感! 


館入面有真人扮小丑,亦有高像真度道具小丑,根本分唔清邊啲真邊啲假!你以為係真嗰陣,竟然係假;你以為係假嗰隻,竟然向住你尖叫,嚇到你走夾唔抖!果然「真的假不了」!

企喺個比人更大嘅小丑隔離,下面仲要不停「動 L」郁郁吓!咪心邪,只係講緊佢對腳凌空飛踢你啫! 

戴住 3D眼鏡嘅你雙眼迷迷矇矇,用力 focus望真啲呢間螢光色系嘅鬼屋時,突然就有隻螢光小丑彈出嚟,係咪好驚嚇呢? 

Fright Dome HK

日期: 2014年 9月 26日至 11月 2日
時間:星期一至五: 14:00至 22:00
星期六、日及假期: 10:00至 22:00
地點:香港山頂道 118號山頂廣場 L3
售價:星期一至五: 14:00至 18:00(紅日除外)每位$199、其他時段每位$299、 Fast Pass每位$399
查詢: 3488 3282
網址: http://www.facebook.com/frightdomehongkong 
http://www.frightdomehongkong.com 

德州電鋸殺人狂 血肉橫飛


好似《疾走羅拉》咁疾走狂奔嗰陣,竟然撞正殺人狂,仲擸埋架生準備隊冧你,問你死未! 

有睇過《 Texas Chainsaw Massacre》嘅都會話:「我呢一世人都唔要聽到電鋸聲!」冇錯,嗰種又刺耳、又惡頂嘅電鋸聲,真係午夜夢迴都揮之不去!入到去呢間鬼屋,相信你真心想拮穿自己耳膜!
一間看似普通嘅屋入面,竟然有個人倒吊住喺度?!佢好似郁緊,未死㗎喎,不如解開條繩去救佢啦!點知,原來縛喺佢條腰度嘅,係佢肚入面條腸嚟㗎!

「猛鬼出籠」隨時嚇破你個膽

喺山頂觀景台嘅驚嚇區,會有唔同嘅恐怖場景、照相區,同埋驚嚇遊戲俾你玩,將真正嘅恐懼延續,隨時嚇到你膽汁都嘔埋出嚟!


其實入鬼屋都係諗住開開心心咁玩啫,做咩要逼到人癲先安落呢? model都頂唔順要反擊喇,如果唔係點走?! 

嚇破膽巨蜘蛛好核突,好核突,好核突 x100000 

爆膽瘋狂公牛不解釋,明啦吓嘩?!

夠膽死瞓棺材冇利是收瞓棺材,你敢唔敢瞓先? 

返歸睇鬼戲 一齊驚喇喂!

真係衰啲都要講句:「人係犯賤!」好似鬼屋咁,又要驚又要玩,貼錢買難受!鬼片又係,又要怕又要睇,睇完又要唔敢去廁所,麻鬼煩!編輯部同事再推介最最最驚嚇嘅驚慄片,等你可以朝頭早睇鬼片,晏晝鬼屋,黃昏再睇多次鬼片,自己搵嚟驚!

《咒怨》( 2003) directed by清水崇

記者 Vincent:「肢體不合乎常人咁扭曲,我好鍾意!」
被譽為「日式恐怖」嘅經典力作!清水崇將整個驚嚇畫面演譯得淋漓盡緻,令你半夜三更準備入睡嗰陣,都會不其然望下有冇個𡃁仔匿埋係你嘅被竇入面!噢,好驚呀!



新一集 10周年紀念作《咒怨:死結的開端》就快上映。 

《鳥 The Birds》( 1963) directed by Alfred Hitchcock

總編輯 Denniz:「到𠵱家都仲驚緊雀!」
「驚慄大師」希治閣嘅大作之一!小鎮入面所有雀一夜之間突然發狂,癲咗咁狂啄你塊面!無血肉橫飛嘅場面,但驚嚇氣氛嘅營造真係一流!睇完包你以後唔敢去米埔!


當年希治閣冇透露過佢點樣控制到班雀聽聽話話。 

《勾魂遊戲 Needful Things》( 2013) written by Stephen King

記者 CoCo:「最恐怖嘅係人心!」
魔鬼化身古董店老闆,放一樣你好想要嘅嘢擺喺你眼前,唔使用錢買,你只需要做一個小小嘅惡作劇就可以換到佢,你願意嗎?可能真係無傷大雅,但人心中的惡魔已經將你蠶食,一發不可收拾!


《閃靈 The Shining》( 1980) directed by Stanley Kubrick

編輯 SK:「阿仔踩住三輪車撞見對孖女真係堅恐怖!」
喺金田一式雪山旅館內,老豆忽然被鬼上身,決定拿起斧頭殺自己全家! Stanley Kubrick最出名就係佢嘅畫面構圖,一條平平無奇嘅走廊,時而出現一對天真孖女、有時又會成地紅,成個氣氛陰森詭秘,搞到你個腦會諗勁多嘢!想像比真實可怕,問你怕未!


後記:

嚴選過後,發覺原來大家心目中嘅「驚」唔一定係血腥核突,又或者突然之間彈出嚟嚇你一餐,反而最重要係氣氛營造。所以話,一套成功嘅驚慄片或者一間出色嘅鬼屋,都唔係得個「嚇」字咁簡單,而係嚇完你之後,仲會成為你人生嘅陰影,咁就為之 Very Good喇!


撰文:陳可兒
攝影:傅新發
Model: Yoyo Fung

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()