家長日

拆解 3大開學問題

Ads by Google

開學不久就有學生自殺,聞者心酸。
有資深輔導員話,有關學生的問題開學初期未算嚴重,過多兩個月會有更多情緒問題浮現,做家長真係要留意。
現提出 3大常見問題,讓家長們早作預備。

 

黎潤芬(陳太)
資深輔導員及美國輔導協會會員。曾任港大社會工作及社會行政學系兼職導師,負責教導輔導碩士學生。現從事輔導工作,經常開家長講座、工作坊,針對家長跟子女的相處技巧,及講解孩子唔同階段嘅需要。曾出書《有機良方—關心孩子輕鬆教》及《向扭計說不》。

個案 1

兩歲女首次上學,媽咪已做足預備,帶佢去學校周圍行一圈,又閱讀有關上學嘅圖書。但開學兩、三日,女孩就話唔想返學,仲日日扭計。

坦誠跟學校講

陳太:剛上幼稚園、剛升小或剛升中,都是小朋友人生嘅轉折位,特別多適應問題。有時父母可能已做足預備,但現實跟理想總有落差。這位女孩係真實個案,原來女孩班中有 3位老師,其中 1位特別惡,女孩唔鍾意,於是唔想返學。媽咪用盡方法利誘,但小朋友都扭計。建議家長坦誠跟學校講,女兒需要特別溫柔對待,希望女兒若有問題由另外兩位老師處理,才是治本嘅方法。

個案 2

做輔導最棘手係逃學,尤其初中女生最常見。有女學生開始時因唔鍾意某位老師,每有他的課就唔返,久而久之經常逃學。更去睇精神科話自己患抑鬱,攞正牌唔返學。但跟佢接觸後完全唔覺佢有抑鬱。

提升返學動力

陳太:學生好多時都以老師惡為由唔返學,家長要跟子女了解是否單單為咗老師惡這個原因,還是有其他。切記溝通時要心平氣和,處理唔到最好搵社工、老師幫手。了解原因後,便要提升子女返學嘅動力,例如告訴他們老師惡但仲有好同學。當然最怕連好同學都一齊逃學,就最棘手。這時就要搵其他東西吸引他們,試過有媽咪知道女兒鍾意跳舞,便幫佢報班乘機鼓勵佢返學,都有幫助。所以近年有學校搞 cosplay學會、動漫學會吸引學生上堂。

個案 3

中學生自小唔特別叻,但父母想佢入名校,結果從小一開始,功課跟唔上,年年考包尾,自我形象非常差。

要逆向思維

陳太:父母選校應審慎考慮子女的資質和性格。要知道小朋友在不同發展階段有不同能力,以為 3歲學 5種語言好叻,其實好傻,要視乎小朋友嘅學習能力,不要過分催谷。有父母覺得以前被人迫,現在迫子女都係為佢好,但要明白以前父母對你係咁,唔代表你要咁樣對番自己的仔女,而且撫心自問自己是否快樂?有父母可能不介意親子關係差,不過要有承擔後果的勇氣。曾見過三、四十歲的 client讀名校從事專業,賺好多錢但唔開心,話從小父母迫佢入名校攞高分,所以畢業後無再跟父母來往。做父母的,唔好成日着重俾乜嘢小朋友,應該用逆向思維想,你要從小朋友處攞走乜嘢,如壓力、唔開心等。


撰文:馮淑玲 
攝影:周芝瑩
插圖:王紹堅

    全站熱搜

    tvb4life 發表在 痞客邦 留言(0) 人氣()