靚抽王

熱烈慶祝第 2個亞視登陸香江

Ads by Google

亞視喺香港免費電視界長期佔領二奶地位,加上霉到爆嘅人氣同埋不斷派膠嘅行為,經常都令人非常驚訝,點解頂到咁耐都未執嘅呢?亞視有今時今日,大台當然唔抵得。我哋預言家經過一輪分析,列出三項預兆,發現大台取代亞視,似乎係必然發生嘅事呀!

預兆一:不斷自 high

亞視長期以自 high為樂,當中最經典包括台慶向空凳掟壽包,逼岩布仙尼唱 Happy Birthday To Me等。近年大台亦都有樣學樣,經常喺節目《西張東望》度 hard sell,譬如喺節目度大讚收視偏低嘅《膠遊記》有幾好睇;又請咗中咗風嘅劉家輝上節目,大打溫情牌,但可怕嘅大台員工逼家輝哥笑,仲送 TVBuddy俾人,令觀眾極為不安。

預兆二:培育「超級員工」

亞視最擅長嘅係培育以一敵百嘅藝員,由從前陳啟泰到今日朱慧珊都係身兼多職,由台慶主持、報新聞、拍劇同唱歌都係佢哋一手包辦。近日大台因為收視不佳而裁員,據稱兒童節目組嘅幕後員工, 12人裏面只係炒剩 1人。咁做無非都係想培育一個能夠以 1個人嘅力量做足 12個人嘢嘅「超級員工」啫,真係用心良苦。

預兆三:電視台唔可以窮

亞視冇錢出糧、買節目,呢啲大家都知,估唔到大台都會有樣學樣!近日有報道指,參與《扮嘢王》最尾嗰集嘅藝員竟然唔會出騷錢,而以贊助代替。哇,你諗吓,我去食麥記冇錢俾,我搵幾包 Tempo嚟當俾咗錢得唔得吖?所以話,大台絕對有望取代亞視成為膠台一哥就係咁解嘞!

預言家

呢個世界無奇不有,所以先要有我哋呢啲智者指點天下。預言家每期以高瞻遠矚嘅眼光幫你看透世事。


撰文:娛文樂

    全站熱搜

    tvb4life 發表在 痞客邦 留言(0) 人氣()