靚抽王

緣份車站之鋒菲交匯點

Ads by Google

謝霆鋒同王菲復合,喺中港台嘅娛樂圈嚟講,絕對係類似柏林圍牆倒下、中美建交、南北韓合作等等嘅世界大事,古語有云:分久必合,合久又必分,分分合合都好平常。不過,王菲同謝霆鋒兩人,一個 45歲,一個 34歲,兩個都唔細啦,應該都唔會再有機會分完再合啦?衰啲講句,唔通之後又分開,然後霆鋒又同番栢芝一齊咩?咪玩啦!總而言之,呢段感情確實係夠神奇,其神奇之處,就咁講係唔明嘅,所以今次我哋就以地鐵站路線圖嘅方式講解一下:

謝霆鋒線

1997年 趙學而
當年同為英皇藝人嘅趙學而同謝霆鋒,雖然年紀相差 9年,但係就不斷傳出拍拖緋聞。不過呢啲陳年舊事,算罷啦,謝霆鋒衰衰哋都係一線影星,趙學而就去咗大台《皆大歡喜》,唔襯就係唔襯。列車好快就到咗下一站。

 

1999年 盧巧音
謝霆鋒對比自己年長嘅姐姐特別有興趣,上一站差 9年,冇幾耐就搵咗大自己 6年嘅盧巧音姐姐,仲喺某音樂會度獻花俾姐姐。不過呢段戀情都係唔捱得幾耐,你懂的。一架又年輕又 chok嘅火車係唔鍾意喺同一個站停留太耐嘅。

 

2000-2002年 王菲
兩人嘅感情線第一次世紀交匯,確立咗呢段長達 14年嘅奇情。當年嘅事彷彿在目前,兩人喺梁朝偉嘅金馬影帝慶功宴首次公開牽手,謝弟弟仲多次喺公開場合度表示要娶王姊姊。當大家以為佢哋係天下無雙嘅一對姊弟時,程咬芝就出現喇!

 

2002年到站, 2006年-2011年長期停站 張栢芝
唯一同霆鋒同年(但都大 3個月),唔算係姐姐嘅栢芝,同謝霆鋒極速捲入愛海。雖然呢段感情中間夾咗啲蛋散喺度「影相」,搞串咗個 party,但係兩人總算係長期埋站,結埋婚生埋 BB。可惜好景不常, 2011年宣布離婚,栢芝有一段時期都非常嬲豬,令到霆鋒躋身浪子之列。

2011年 周迅

謝霆鋒再一次同比佢大嘅姐姐傳出緋聞,大家已經開始覺得冇乜驚喜,雖然單嘢傳得好熱,不過兩人都冇真正承認呢段感情,唔通真係相逢恨晚,造物弄人?講時講,如果兩人一齊咗都幾搞笑,因為咁證明咗謝生同李亞鵬嘅品味非常相似,唔好唔記得,李亞鵬都分別同過周小姐、王小姐一齊。

王菲線

1996-1999年 竇唯
同音樂老師竇唯結婚,雖然王菲紅過竇唯嘅程度好比南韓富有過北韓 N倍,不過佢哋依然恩愛(離婚之前),仲誕下囡囡竇靖童。呢段感情最後以竇唯宣布分手而結束,據聞同佢搭上高原有關。(高原唔係一個地方名,係一個人名呀唔該!)

2004年到站, 2005年-2013年長期停站 李亞鵬

已經歷兩次傷害嘅王菲,終於都遇上好人,李亞鵬同王菲終喺 2005年結婚,仲誕下一女……咦,啲劇情點解似層層嘅?係,雖然李亞鵬對王菲同佢前夫生嘅竇靖童都唔錯,不過最後都係逃唔過分離嘅命運。據說又係有第三者介入,令人驚覺到唔通世界上所有男人都係大哥,會犯男人都犯嘅錯?

2014年 最新!北京激吻

除咗唱歌之外,我諗唔到有乜嘢可以表達我哋對呢段感情嘅感覺, music!

假使當初可以為了你 忘了愛所有人
分開手去追尋 足可擁抱千萬人
即使天空海闊沒有愛 還有你這個人
燒光一個森林 將灰燼裏的熱能
當做一點陪襯

謝霆鋒〈愛後餘生〉

荒謬現象學

每期荒謬現象學為你解構娛圈嘅不尋常現象!


撰文:娛文樂

    全站熱搜

    tvb4life 發表在 痞客邦 留言(0) 人氣()