亞熱帶

影壇魔童染谷將太 大小通殺

Ads by Google

日本藝能界近年雖然俾韓流淹沒,但亦唔係話佢哋冇好嘢㗎!就講電影《戀上春樹》(香港正上映中)男主角染谷將太,呢個𡃁仔就真係犀利啦﹗
染谷將太其實同「韓國新人王」、 17歲嘅呂珍九好相似,兩個都係年紀細細但成就大大。染谷 19歲奪得威尼斯電影節「最佳新人獎」後,即成藝能界搶手貨, 22歲,電影加劇集,已經拍咗近 50部有多,嗌佢做「日本影壇魔童」絕不為過。

 

樣,染谷將太唔係靚仔男,反而仲有啲呆呆哋,加埋只有 172公分身高,絕對係路人甲乙丙貨色。不過千祈唔好睇小佢,事關個樣麻麻啫,演技先係王道嘛。電影《戀上春樹》導演矢口史靖就係睇中佢嘅戇樣,搵佢去演 90後考唔上大學兼俾女飛嘅雙失學生哥,無所事事走入深山學斬樹。呢啲都唔係乜,最正係要佢成日着住丁字褲、打出大屁股走嚟走去,真係面皮薄啲都做唔嚟。


喺《戀上春樹》入面,染谷將太着住丁字褲喺山頭樹林爬上爬落,難怪佢話拍完之後,大髀、 pat pat同小將太都瘀到一笪笪。 


染谷將太喺電影《戀上春樹》入面,為咗接近「林叢見習班」導師長澤正美,竟然走入深山學斬柴劈樹。

影壇搶手貨

近年已成為日本影壇搶手貨嘅染谷將太,雖然年僅 22歲,但影齡絕對唔短,事關佢 9歲已經以童星身份開始演藝生涯,先後演出過《相棒》、《 M的悲劇》、《龍馬傳》等劇集,電影則有《貞子 3D版》、《惡之教典》等。 11年,奪得威尼斯電影節「最佳新人獎」。因為係第一個日本男演員獲得此獎項,所以染谷攞到呢個獎後,片約、劇約就排山倒海咁湧埋嚟,至今大大話話已拍咗超過 50部電影同劇集。
依家成個日本影壇好似得染谷一個咁,呢部都未落畫,新片又排住隊上啦。 12月會有同深津繪里合拍嘅話題片《寄生獸》,電影仲會分成上下兩部上映,因為內容依足漫畫版嚇人場面,所以一早被視為年尾最矚目嘅日本電影。明年 1月則有同 AKB48前成員前田敦子合演嘅《再見歌舞伎町》,呢部片更入圍「多倫多國際電影節」及「韓國釜山電影節」。染谷真係紅到呢,成個日本影壇俾佢玩晒囉﹗


染谷將太同韓國嘅呂珍九現時都係日、韓藝能界炙手可熱嘅年輕演員,兩人相似之處係冇樣但有演技,尤其染谷將太,愈睇愈似王祖藍㖭!你哋點睇? 

2011年電影《庸才》導演園子溫、女主角二階當富美及染谷將太亮相威尼斯電影節首映禮(右),而染谷亦憑《庸才》奪走電影節「最佳新人獎」(左)。 


9歲嘅將太第一次演出第一部電影《 STACY》,之後戲接戲、劇接劇咁拍,完全冇停過,絕對係多產王。 

將太(左)於 2013年獲得「日本第 36屆中影學院獎新人獎」,而東方神起昌珉(右二)亦憑日本電影《擁抱黃金飛翔》獲獎。 

喺新片《再見歌舞伎町》入面,將太同 AKB48前成員前田敦子飾演一對戀人。

將太同深津繪里主演嘅恐怖電影《寄生獸》,更被指定為今年 10月舉辦嘅「第 27屆東京國際電影節」閉幕電影。 


撰文:姜培綺

    全站熱搜

    tvb4life 發表在 痞客邦 留言(0) 人氣()