在 6月,(右起)Katy、 Man、阿寬及 Wing等人合資開設執到寶二手傢俬店,希望在二手傢俬這條路上殺出一條生路。 

創業通

二手傢俬店 租 8千呎陳列室搞大佢

Ads by Google

二手物品市場一直存在,在很多人眼中是微不足道,對於 Katy來說,卻是大有所為。最初在拍賣網賣二手物品,到今年吸引到身邊朋友一同合資,在 6月成立執到寶二手傢俬店,租下 8千呎的陳列室,主賣二手傢俬,以經濟實惠行頭,吸引不少客人青睞,決心成為二手傢俬市場的領頭羊。

 

位於葵涌的執到寶二手傢俬店(下稱執到寶),佔地 8千多呎,店內放滿過千件不同的二手傢具,包括床、梳化、衣櫃,甚至連投影機、雪櫃及電飯煲都有,老闆之一的 Katy表示︰「啱啱由 3千呎倉搬過嚟,好快又堆滿,香港真係好多新淨嘅傢俬冇人要,其實有好多有需要嘅人會買,呢個市場真係有得做。」
今年 6月正式成立的執到寶,由 6位股東合資,主要是由 Katy及阿聰牽頭,「 Man係開室內設計公司,之前幫襯過我哋,由客變朋友再變埋合伙人;阿寬、 Jackie及 Wing都係朋友,佢哋見二手傢俬市場有潛力,都決定一齊夾份。」組合看似無厘頭,但現時執到寶每月盈利超過$30,000,是否又覺得他們獨具慧眼?
二手傢具事業由 yahoo拍賣網開始,今年 30歲的 Katy,在 11年還只是一名普通文員,接觸二手買賣只因受環境所逼,「當時同男朋友阿聰住喺深水埗天台屋,我做文員,佢就打散工,經濟唔係太好,咁就想清吓屋企啲嘢賣返出去。阿聰之前分別用$80同$120喺 yahoo拍賣網 bid咗拳擊球及茶几返嚟,見阻地方就放番上 yahoo賣,加埋竟然賣到$409,賺咗 2百蚊,個數唔大,但畀我意識到二手產品可能有市場。」

搜羅舊貨

心動的 Katy決定馬上行動,與阿聰四處搜羅舊貨,「深水埗大南街附近一到夜晚就會有好多賣舊嘢嘅地攤,諗住行吓搵貨源,見到有膠櫃桶賣,日本城、實惠標價都要$200至$400,見佢賣$30至$50一個,就買返去試吓。搬返屋企清潔完就影相放上 yahoo拍賣網,好快就有人買,每個賣到$100至$200不等,可以話本少利大,我哋開始主攻膠櫃桶。」
做二手買賣最重要的是有辨識貨物價值的眼光, Katy就交了不少學費,「之後麻雀、枱、床、公仔、雪櫃……覺得可能有升值空間嘅都會收嚟賣。初頭真係估唔到邊啲嘢有人買,試過用$40收咗對 B女( Blythe)公仔,賣到$1,000;好有信心用$200收咗張 48吋雲石枱,點知擺咗幾個月都冇人要,最後要掉,係呢段時間都訓練緊自己嘅眼光。」
慢慢 Katy及阿聰的二手買賣開始步上軌道,「買賣嘅嘢愈嚟愈多,行樓梯搬上 9樓天台真係好辛苦,先後喺屋企附近租咗百幾呎嘅分租單位嚟擺貨,但成日出出入入,隔離租戶投訴。去到 12年中,喺大角咀租咗 3千呎單位做倉,自己辭咗份工全職投入。」


為了應付所需,執到寶租了 8千呎的陳列室,很快已堆滿傢俬, Man表示︰「近排收得太多貨亂咗啲。」 

回收較大型的傢俬時,由工人將其拆散方便搬運,回來再組裝。 

主動收貨


租下 8千呎的陳列室後,客人除了透過執到寶網站看貨外,還可親身上去挑選合適的傢俬。圖為拍檔之一 Wing招呼客人時攝。 

所有的二手買賣, Katy都是靠網上平台來經營,「開始喺 yahoo拍賣網賣,見生意愈嚟愈好,就搵朋友幫手整咗個哈哈笑二手店嘅網站,當時阿聰會去工廠區搵專幫人清屋嘅貨車司機派咭片,叫佢哋揀啲質素好啲嘅二手傢俬賣畀我哋,亦都開始有客人搬屋問我哋收唔收傢俬。」
今年 2月, Katy結束了哈哈笑二手店網站,「因為哈哈笑賣嘅嘢比較雜,我哋發現二手傢俬最好賣,就朝住呢個方向發展。」

利好二手

現時樓價高企,令二手傢俬市場大有所為,客人以三、四十歲剛置業的人士為主,「𠵱家樓價同租金咁高,畀完個首期或者新開嘅公司,裝修預算未必好充裕,二手傢俬就係一個唔錯嘅選擇;另外,有啲大肚婆會驚新傢俬有甲醛,影響到 BB,都會買二手傢俬;環保意識高咗,都會多咗人買。最多單會係新年前,好多人為屋企換傢俬,見平一大截,就會向二手傢俬埋手。」
執到寶的二手物品在訂價上都是有根有據, Man表示會參考市場價,「店內物品由幾十蚊到 1萬都有,一般用 4、 5百蚊一車咁收返嚟,再用原價 3成到一半價賣番出去。我哋都收過唔少 designer chair,出面賣$3,000至$5,000一張,我哋只賣$999至$1,600,吸引到唔少有品味嘅客人嚟買。」運費則另計,每件傢俬收費$50至$500不等。


現時 Katy主要負責公司的文書處理,而 Man則負責市場推廣,他們不時會討論公司一些發展方向。 

現時香港居住面積普遍不大, Katy表示一些中小型的傢俬最受歡迎,「好似碌架床、 3至 4呎嘅闊衣櫃、雙人梳化等,都好受歡迎,收返嚟唔使 1個月就賣到出去。」 

Jerry客人(買家)自己開咗新公司,打算買寫字枱,喺網上見到執到寶有賣寫字枱、櫃桶,上到去陳列室睇到啲貨都好新淨,而且質素都幾好,成本低咗 6、 7成,就決定幫襯佢哋。 

Ivan客人(賣家)啱啱搬去新屋,上手留咗好多舊傢俬唔啱用,掉去堆填區都要運費,有朋友介紹執到寶畀我,咪叫佢過嚟收囉,傢俬可以畀有需要嘅人用,唔使嘥咗佢,都幾好。 

爛嘅唔收

現時執到寶九成九的貨品都是二手傢俬,貨源是客人自己找上門, Katy說︰「做咗幾年,𠵱家貨源都係客傳客搵上門,我哋亦有喺 facebook、雜誌、街邊賣廣告,客人將唔要嘅嘢影相 send過嚟,我直接喺 office決定要唔要及定價,然後派工人去收,佢哋去到現場會 check過實物係咪無穿無爛再匯報返嚟,如果爛嘅我哋唔會收,仲會收返放貨人錢掉去堆填區。」
對於執到寶的發展,身為室內設計師的 Man希望可以讓更多人接受二手傢俬,「好多人搬屋會買新傢俬,其實舊嗰啲仲好新淨,掉去堆填區真係好嘥,不如收返嚟賣畀有需要嘅人,啱唔啱用先係最重要。將來當然希望執到寶愈做愈大,同時可以帶到少少環保意識畀更多人。」


Babel Chair byMarcel Wanders$900 

Sanyo投影機$1,800 

三菱雪櫃$780 

5桶櫃$500 

開業成本

租金︰$231,000( 2按 1上)
器材︰$160,000
裝修︰$40,000
總投資︰$431,000

每月收支

租金︰ 77,000
人工︰$150,000( 2名員工+6個老闆)
入貨:$5,000
雜費︰$35,000
營業額︰$300,000
盈利︰$33,000

執到寶二手傢俬店
查詢: 5442 3000


撰文:曾志恒
攝影:陳嘉元
部分圖片由被訪者提供

tvb4life 發表在 痞客邦 留言(0) 人氣()